Apostolkuéra 22 - Biblia en Guaraní - ?anderuete ?e’? Por? 2015

Páblo oñe’ẽ hetãyguakuérape, oñemoĩva’ekue hese

1Che ryvy ha che rukuéra, pehendumína umi mba’e che ha’étava che rekove rehe.

2Ohendu rire ha’e oñe’ẽha iñe’ẽme (Israelgua ñe’ẽme), okirirĩ ohóvo ojapysaka porãve hag̃ua, ha Páblo he’i:

3Che ningo peteĩ Judaygua, anaceva’ekue Társope, Cilícia departaméntope, akakuaánte katu ko táva Jerusalénpe, Gamaliel py renondépe añembo’euka ñande rukuéra rembiapoukapykuérare. Añeha’ãmba ajapo hag̃ua hekoitépe Ñanderuete rembipota ha che cherakate’ỹ Moises rembiapoukapy rehe, peẽ penerakate’ỹ háicha ko’ág̃a peve.

4Che aperseguiva’ekue umi Hesu Crísto rehe ojeroviávape, añapytĩuka kuñakuéra ha kuimba’ekuérape, ha amoinge ichupekuéra cárcelpe.

5Pa’iguasu ha ñane mburuvichakuéra voi ome’ẽ chéve peteĩ kuatiañe’ẽ ajapyhy hag̃ua Damáscope avei umi Hesu Crísto rehe ojeroviávape, aha agueru hag̃ua jepokuapýpe Jerusalénpe ojehavira hag̃ua.

6Ha ag̃uahẽmbotávo Damáscope asaje pyte rupi cheñu’ã sapy’a peteĩ tesape imbaretéva yvága guio oúva.

7Upémaramo che ha’a yvýpe, ha ahendu peteĩ he’íva chéve: Sáulo, Sáulo, mba’érehe piko cheperseguireína.

8Ha che ambohovái: Karai, máva piko nde. Upévo ha’e he’i chéve: Che ningo Hesu Nazaretgua pe nde reperseguíva reikóvo.

9Che irũnguéra ohecha avei pe tesape mbarete, nohendúi katu upe oñe’ẽva chéve.

10Upérõ che aporandu: Karai, mba’épa ajapova’erã. Ha Ha’e he’i chéve: Epu’ã tereho Damáscope, upépe oje’éta ndéve opaite mba’e nde rejapova’erãva.

11Pe tesape imbaretégui ndahechavéi, upévare che irũnguéra chesãmbyhy Damásco peve.

12Ha peteĩ kuimba’e, hérava Ananías, ojapovahína hekoitépe Moises rembiapoukapykuéra ha herakuã porãva opaite Judayguakuéra apytépe, ha’e oiko guive Damáscope,

13ou che rendápe, oñemboja che ypýpe, ha he’i chéve: Che hermáno Sáulo, ehecha jevy. Ha upevovete che ahecha ichupe.

14Ha he’ive chéve: Ñanderuete ndeporavo reikuaa hag̃ua hembipota, ha rehecha hag̃ua pe Heko porãvape, ha rehendu hag̃ua iñe’ẽ ijuruteégui.

15Ndehegui oikóta hechahare opavavépe g̃uarã, remyasãi hag̃ua opaite mba’e rehecháva ha rehendúva guive.

16Ha ko’ág̃a piko mba’e reha’arõve: Epu’ã ejebautizauka ha ejerovia Hesu Crísto rehe, Ha’e nemopotĩ hag̃ua opaite ne rembiapo vaígui rehenóivo Hesu Crísto réra.

17Ha ojehu che ajevy rire Jerusalénpe, ha añembo’e jave aína Ñanderuete rogaguasúpe, ajegueraha ojehechauka hag̃ua chéve Hesu Crístope,

18ha che ahechávo ichupe, Ha’e he’i chéve: Pya’e esẽ Jerusaléngui, ndogueroviamo’ãigui umi ñe’ẽ nde erétava cherehe.

19Ha che ha’e ichupe: Che Jára, ha’ekuéra imandu’a porã gueteri che aity hague ichupekuéra cárcelpe ha ainupãuka hague umi nderehe ojeroviávape Ñanderuete rogaguasúpe.

20Ha oñohẽ ramoguare hikuái Estéban, pe evangélio rechahare ruguy, che aĩ avei upépe ha añangareko ijukahare aokuéra rehe, ha Estéban ñemano chembovy’ava’ekue ahechávo.

21Ha Hesu he’i chéve: Tereho, Che romondóta mombyry tetã ambueyguakuéra apytépe.

22Ko ñe’ẽ kóva pevénte ojapysaka porã hikuái hese, uperire katu osapukái ha he’i: Peipe’a yvy ape árigui ko kuimba’e kóvape, naiporãi ha’e oikove.

23Ha osapukái aja omombo ijaokuéra ha oity pe yvy timbo yvytúre.

24Upérõ pe soldádo ruvichaguasu omoingeuka Páblope soldadokuéra rogaguasu ryepýpe, ha he’i oñenupã hag̃ua ichupe tukumbópe ojekuaa hag̃ua mba’erehépa hetãyguakuéra osapukáira’e péicha.

25Ha oñapytĩmbáma ramo Páblope oinupã hag̃uáicha ichupe, ha’e he’i ambue soldádo ruvicha’ípe oñembo’ýva ijypýpe: Ikatu piko oñenupã tukumbópe peteĩ kuimba’e Romayguávape oñembojovake’ỹre ichupe.

26Pe soldádo ruvicha’i ohendúvo péva, oho huvicha rendápe, ha he’i ichupe: Mba’épa rejapóta ko’ág̃a. Ko kuimba’e kóva peteĩ Romaygua ra’e.

27Upévagui pe soldádo ruvicha voi ou Páblo rendápe ha oporandu ichupe: Añete piko nde peteĩ Romaygua. Ha Páblo he’i: Che ha’e.

28Upérõ pe soldádo ruvicha he’i: Che ningo ame’ẽ heta pirapire, añehenói hag̃ua Romaygua. Ha Páblo he’i: Che katu Romaygua anace guive.

29Upévare pe soldádo ruvicha he’i isoldadokuérape ani hag̃ua oinupã Páblope, ha oipe’auka avei umi cadéna. Ha’e okyhyjete opytávo oñapytĩuka haguére Páblope oñeporandu porã’ỹre ha oñembojovake’ỹre ichupe.

30Ha pe ára ambuépe pe soldádo ruvicha oikuaa porãmbaségui pe añetegua ombyatyuka pe pa’iguasu ha umi 71 karai ancianokuérape, ha omoĩ Páblope ijapytépe ha oporandu porã ichupekuéra: Mba’erehépa oikóra’e pe apañuãi.