1Ha ojehecha ára rehe, peteĩ techaukaha (señal) ndetuicháva: Peteĩ kuña oñemondéva kuarahýpe ha pe jasy oĩ ipy guýpe, ha iñakã ári oĩ peteĩ akã jeguaka (coróna) oguerekóva 12 jasytata.
2Ha ha’e hyeguasu ha osapukái hasyetégui imemby hag̃ua.
3Ha ojehecha ambue techaukaha ára rehe. Peteĩ tejujaguaguasu pytãva, 7 iñakã ha 10 hatĩva, ha umi 7 iñakã ári oĩ 7 akã jeguaka (coróna).
4Huguáipe ombotyryry jasytata apytégui mbohapyha párte (vore) ha oity yvy ári. Ha pe tejujagua oñembo’y pe kuña imembymbotáva renondépe, ha imembývo omokõ hag̃ua imembýpe.
5Ha pe kuña imemby peteĩ kuimba’e, oisãmbyhyva’erãva opaite tetãnguérape yvyra po’i hierroguiguápe. Ha imemby ojehupi Ñanderuete rendápe iguapyhaguasu renondépe.
6Ha pe kuña okañy desiértope hendag̃ua Ñanderuete ombosako’i haguépe, upépe Ha’e omongaru ichupe 1260 ára (día) pukukue.
7Ha oiko peteĩ ñorãirõguasu yvágape, pe yvága rembiguaiguasu Miguel hi’angelkuéra ndive oñorãirõ pe tejujaguaguasu ndive ha hi’angelkuéra omoirũ avei ichupe,
8pe tejujaguaguasu katu ndaipu’akái Miguel rehe ha pe tejujaguaguasúpe g̃uarã ndojejohuvéima hendag̃ua yvágape.
9Ha oñemombo pe tejujaguaguasúpe yvy ape ári, oñembohéra avei pe mbói tuja, aña térã Satana ombotavýva tetãyguakuérape ha hendive oñemosẽ avei hi’angelkuéra ipytuvaikuérape.
10Ha oñehendu ñe’ẽpuguasu yvágaguio he’íva: Ko’ág̃a og̃uahẽma Ñanderuete salvacion, iñesãmbyhy ha ipu’aka, ha ita’ýra Hesu Crísto oisãmbyhy hag̃ua, oñemombógui yvy ape ári ñane hermanokuéra mombe’u vaihára, ñanemoĩ vaiva’ekue ára ha pyharépe Ñanderuete renondépe.
11Ha’ekuéra ombopoguy katu ichupe pe Ovechara’y ruguy rupi, ha omyasãi porã haguére Hesu Crísto iñe’ẽ ha hekove rupi, ha nahakate’ỹi hekovekuéra rehe, tekotevẽ ramojepe omano Hesu Crísto rehehápe.
12Upévare pevy’aite peẽ peikóva guive yvagakuérape, angái katu peẽ peikóva yvy ha yguasu apére, og̃uahẽmagui pene rendápe Satana, ha’e ningo ipochyeterei oikuaa porãgui imbykymaha hi’arakuéra.
13Ha pe tejujagua ohechávo oñemombo hague yvy ári omuña pe kuñáme, imembyva’ekue peteĩ mitãkuimba’épe.
14Ha pe kuñáme oñeme’ẽ mokõi ñapykani pepo tuicháva oveve hag̃ua desiértope, oñembosako’i haguépe hendag̃ua, ha upépe oñemongaru ichupe, mombyry pe mbói rovakégui, peteĩ ára aty ha mokõi ára aty ha peteĩ ára aty mbyte (mbohapy áño imédio).
15Ha pe mbói opoi ijurúgui pe kuña rapykuéri peteĩ ysyry ndetuichaitévaicha, oguerosyry hag̃ua pe kuñáme,
16pe yvy katu oipytyvõ pe kuñáme, ojejurupe’ávo omokõmba pe ysyry ndetuicháva osẽva’ekue pe tejujaguaguasu jurúgui.
17Ipochyeterei pe tejujagua pe kuña ndive, upévare oho oñorãirõ hag̃ua ambue iñemoñare ndive, umi ojapóva Ñanderuete rembiapoukapykuéra ha ojeroviáva Hesu Crísto rehe.
Who We AreWhat We EelieveWhat We Do
2025 by iamachristian.org,Inc All rights reserved.
