1 Corintoyguakuérape 10 - Biblia en Guaraní - ?anderuete ?e’? Por? 2015

1Che hermanokuéra, ndaipotái ningo pepyta peikuaa’ỹre ñande rukuéra oĩmba hague pe arai guýpe ha ohasapa hague pe yguasu rupi,

2ha opavave ojebautiza hague Moises rupi pe arai ha pe yguasúpe.

3Ha’ekuéra ho’u joava’ekue pe tembi’u yvága pegua (mana),

4ha’ekuéra hoy’upava’ekue avei pe y Ñanderuete ome’ẽva’ekue ichupekuéra pe itaguasúgui omoirũva ichupekuéra hape pukukue rupi ha pe itaguasu ningo Hesu Crísto voi.

5Mbovymi katu ombovy’a (ojeroviávagui) Ñanderuetére, ambuekuéra katu oñemoĩva’ekue Ñanderuete rehe, upévare Ha’e oheja umíape omano desiértope.

6Umi mba’e rupi Ñanderuete ohechaukase ñandéve ani hag̃ua ñande jaipota mba’evai, ha’ekuéra oipota haguéicha.

7Anítei pemomba’eguasu jára gua’úpe, ijapytepekuéra ojehu haguéicha ha ojehai háicha Ñanderuete kuatiañe’ẽme: Pe tetã oguapy okaru ha hoy’u, ha upéi opu’ã oñembosarái hag̃ua (oñemoĩ hag̃ua Ñanderuete rehe), (Éxodo 32,6).

8Aníke peiko pene rembireko’ỹva térã penemena’ỹva ndive, ha’ekuéra ojapo haguéicha ha upévare omano 23.000 Israelgua peteĩ árape.

9Ani peiko pende yvyarigua rete rembipota vai poguýpe, upéicharamo peñemoĩta Hesu Crísto rehe, Israelguakuéra ojapo haguéicha desiértope, ha upévare heta omano mboikuéra rupi.

10Ani pechi’õ (peñe’ẽguyguy) ha’ekuéra ochi’õ haguéicha ha oñehundi hikuái pe mbyaihára po rupi.

11Umi mba’e ningo ojehu ichupekuéra tembiechauka ramo, ha ojehai Ñanderuete kuatiañe’ẽme ñanembo’e ha ñandeavisa porã hag̃ua ñañemo’ag̃uímagui umi ára atyguasu paha gotýo.

12Upévare upe oimo’ãva oñembo’y porãha (oiko porãmbaha) toñangareko porã ijehe ani hag̃ua ho’a avei.

13Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.

14Upévare, che hermanokuéra ahayhúva, peñemboyke jára gua’u ñemomba’eguasúgui.

15Che añe’ẽ peẽme, iñakã porãvaichape, pejepy’amongeta porãke ko che ha’éva rehe.

16Pe váso ñande jahovasáva (Hesu Crísto cénape) ndohechaukái piko ñande ñañembopy’apeteĩha Hesu Crísto ndive huguy oñeñohẽva’ekue rupi; ha pe pan ñande ñamboja’óva, ndohechaukái piko ñande ñañemopeteĩha avei Hesu Crísto ndive hete rupi.

17Oĩgui peteĩ pan año (Hesu Crísto), ñande reta ramojepe, ñande peteĩ tete año (Hesu Crísto iglésia), ja’úgui pe pan peteĩva (Hesu Crísto céna).

18Pema’ẽ Israel retã rehe, umi ho’úva pe kuave’ẽmby ro’o, noñemopeteĩri piko avei pe kuave’ẽmby renda reheve.

19Mba’épa che ha’ese ko’ã mba’e rupi: Ambotuichase piko pe kuave’ẽmby ro’o oñekuave’ẽva umi jára gua’úpe, térãpa ambotuichase umi jára gua’úpe.

20Mba’evéicharamo, ha’ese uvei: Umi mba’e ha’ekuéra oikuave’ẽva oikuave’ẽ mba’epochýpe g̃uarã, noikuave’ẽi Ñanderuetépe g̃uarã, ha che ndaipotái peẽ peiko mba’epochy irũ ramo.

21Ndaikatúi peẽ pe’u Hesu Crísto vásogui ha mba’epochy vásogui avei; ndaikatúi peẽ peñemopeteĩ Hesu Crísto ndive imesa (Hesu Crístocéna) rupi, ha peñemopeteĩ avei mba’epochy mesa ndive,

22térãpa ñambopochyse Hesu Crístope. Ñanembareteve mba’e piko ichugui.

23Opaite mba’e ningo ikatu jajapo, ndaopaitemba’éinte ningo iporã ñandéve g̃uarã.

24Anítei avave oheka ijupe g̃uarãnte (iprovéchonte), toheka uvei hapichápe g̃uarã.

25Opaite mba’e oñevendéva so’ohápe ikatu pe’u, peporandu’ỹre mba’eve, pende py’apyñe’ẽ rehehápe.

26Ñanderuete mba’e ningo ko yvy ha opaite mba’e oĩva guive ipype.

27Peteĩ ojerovia’ỹva Hesu Crístore ojerure ramo peẽme pekaru hag̃ua hendive, ha pehose ramo, pe’u opaite mba’égui oñemoĩva guive pene renondépe peporandu’ỹre mba’eve, ani hag̃ua peñembopy’amokõi pende py’apyñe’ẽ reheve.

28Oimérõ katu he’íva peẽme: Ko so’o ningo oñekuave’ẽma jára gua’úpe, péicha ramo ani pe’u, upe omombe’úva ha ipy’apyñe’ẽ rehehápe.

29Che ningo ha’e kóva nde rapicha py’apyñe’ẽ rehehápe, nda’éi péva nde py’apyñe’ẽ rehehápe. Mba’erehe piko che amboykéta che sãsógui ajapo hag̃ua che rapicha py’apyñe’ẽ he’íva guive.

30Che agradece ramo Ñanderuetépe pe che ha’úva rehe, mba’érehe piko ambuekuéra oñe’ẽvaise cherehe, agradece ramojepe.

31Pekaru ramo térã pey’u ramo, térã pejapo ramo ambue mba’e, pejapopa pemomba’eguasu hag̃ua Ñanderuetépe.

32Anítei peiko ñepysãnga ramo Judayguávape, térã Greciayguávape, térã Hesu Crísto reheguávape.

33Che añeha’ãmba ambovy’a hag̃ua opaite che rapichakuérape opaite mba’épe, ndahekái chejupe g̃uarãnte (che provécho), aheka uvei che rapichakuéra provechorã, ojesalva hag̃ua.