Job 17 - Biblia en Guaraní - ?anderuete ?e’? Por? 2015

1Che ánga ikangypáma ha ndahetavéima che rekove ararã, ha che tyvyrã (sepulturarã) chera’ãrõma.

2Oñembohorývante oĩ chendive ha ijeja’okuéra ahendúnte.

3Nde, che Ruete, eñe’ẽmi cherehehápe, eikóna che mo’ãha ramo, nde’ỹ ramo máva piko cheporiahuverekóne.

4Nde reñomígui che irũnguéra py’apýgui pe arandu, upévare ndaipu’akamo’ãi cherehe.

5Umi opoi reíva iñirũgui pirapire rehehápe, iñemoñarenguéra ohasa asyva’erã.

6Ñanderuete oheja che retãyguakuéra oñembohory cherehe ha ondyvu che rováre.

7Py’angekõi omoypytũmba che resakuéra, ha che rete rehegua ojogua ta’ãnga ojehecháva kuarahy’ãme.

8Umi heko porãva oñemondýita ohecha vove ko’ã mba’e ha umi heko potĩva oñemoĩta heko vaíva rehe.

9Upéicharamo jepe pe heko porãva oguata porãva’erã hape rehe, ha pe heko potĩva imbareteve ohóvo.

10Pejevy ha pejupa che rendápe, ndajohúi katu pende apytépe peteĩnte jepe iñarandúva.

11Ohasapáma che arakuéra, che pensamiénto aha’ãrõmava ndoikomo’ãi, ha umi mba’e che ajaposéva opa reíma.

12Peẽ ningo pejapo pyharégui ára, ha pyhare ramojepe gueteri peje og̃uahẽmaha pe ára.

13Ha mba’éiko aha’ãrõkuaave, umi omanómava retã voi ningo che rogarã, che rupa ambosako’íma iñypytũháme g̃uarã.

14Che tyvýpe ha’éma: Nde ha’ehína che ru; ha ysokuérape ha’éma: Peẽ che sy ha che reindykuéra.

15Ha mamópa opyta umi mba’e che aha’ãrõva ahupity hag̃ua, ha umi mba’e che aha’ãrõva mávapa ohechakuaa.

16Omanóva retã rokẽme opava’erã kuimba’e ha kuñakuéra esperánza, ha yvyku’i apytépe ñande rete opytu’uva’erã.