Ezequiel 47 - Biblia en Guaraní - ?anderuete ?e’? Por? 2015

Y oporomohesãiva

1Upéi pe ángel chegueru jevy Ñanderuete rogaguasu ojeikehápe; ha ahecha pe okẽ guýgui osẽ y osyrýva kuarahyresẽ gotýo; pe óga renonde oma’ẽ avei kuarahyresẽ gotýo, ha pe y osẽva upégui, osyry pe óga yke akatúa gotýo, pe kuave’ẽmby renda sur gotýo.

2Ha cherenohẽ pe okẽ nórte pegua rape rupi, ha chembojere pe tape oka gotyogua rupi, oma’ẽva kuarahyresẽ gotýo; ha ahecha pe y osyryhína ijyke akatúagui.

3Ha osẽ pe ángel pe kuarahyresẽ gotýo, ha ogueraha peteĩ sã puku ipópe oha’ã hag̃ua 510 métro ha upéi chembohasauka pe y rupi; pe y oñu’ã che pykuéra.

4Ha oha’ãve jevy 510 métro pukukue, ha pe y ohasáma che renypy’ã rupi. Ha oha’ã jevy 510 métro, ha pe y ojupíma che ku’a peve.

5Ha oha’ã jevy 510 métro, ha oikóma ichugui peteĩ ysyry nderypýva, okakuaágui pe ysyry ndaikatuvéima ahasa, ytahápemante.

6Ha he’i chéve: Rehechápa, kuimba’e ra’y. Upéi chegueraha jevy pe ysyry rembe’ýre.

7Ha ajerévo, ahecha mokõive ysyry rembe’ýpe oĩha hetaiterei yvyra.

8Ha ha’e he’i chéve: Ko y kóva ohóta kuarahyresẽ gotýo, ha ohóta Araba, Jordan yvypépe, ha ojepoíta yguasúpe (Mar Muértope, Mar Saládope) ha ojepoívo pe yguasúpe pe y oñepohãnóta ha oikóta ichugui y he iporãva.

9Ha opaichagua pira térã ambue mymba oikóva guive ko ysyrýpe oikove porã jevýta; ha hetaiterei pira oĩta ipype, og̃uahẽ guive ko ysyry ha oñepohãnomba rire oikove porãmba hikuái.

10Ha ijypýpe oĩta umi pira kutuhára, Engadi guive Enegláim peve omokãta iredkuéra; hetaiterei ha opaichagua pira oĩta ipype oĩ háicha ambue yguasúpe.

11Umi yno’õha renda ha ypa (lagúna) noñepohãnomo’ãi; opytáta juky rendag̃ua ramo.

12Ha mokõive ysyry rembe’ýre okakuaáta opaichagua yvyra hi’áva; araka’eve ndahoguekuimo’ãi, hi’a ndopamo’ãi, opaite jasy hi’aju pyahúta, hi’y osẽgui Ñanderuete rogagasúgui; hi’akue ojeporúta tembi’u ramo ha hoguekue ojeporúta pohã ramo.

Israel retã rembe’yrã

13Péicha he’i Ñanderuete: Péicha oĩva’erã Israel yvy rembe’yrã, oñemboja’óta umi 12 Israel tríbu apytépe. Josépe oñeme’ẽta mokõi yvy pehẽngue ndetuicháva.

14Ha oñondive pemboja’o joja peteĩteme imba’eteéva, upévare Che amopu’ãva’ekue che po ame’ẽvo che ñe’ẽ pende rukuérape; ha’évo ame’ẽtaha ichupekuéra, kóva ha’ehína pe yvy pene mba’erãva.

15Kóa ha’éta pe tetã rembe’y nórte gotyogua: Pe yguasu tuicháva (Mar Mediterráneo) guive, Hetlon rape gotýo, Zedad jeikeha peve;

16Hamat, Berota, Sibraim rupi, ko’ãva opyta Hamat ha Damásco pa’ũme; Hasar-haticon peve, péva opyta Hauran yvy rembe’ýpe.

17Upéicha ojepysóta pe tetã rembe’y yvateoygua pe yguasu guive Hasar-enon peve, Damásco ha Hamat katu opytáta pene retã rembe’ýgui nortemive gotýo.

18Pe tetã rembe’y kuarahyresẽ gotýo Hasar-enon guive opytáva Hauran ha Damásco pa’ũme ha upéi ojepysóta Jordan ysyrýpe og̃uahẽ meve pe tavaguasu Tamárpe. Upéicha pe ysyry Jordan omboja’óta Israel retã ha Galaad yvy, kóva ningo Israel rembe’y kuarahyresẽ gotýo.

19Ha pe yvy sur gotýo, Tamar guive, opytáva Mar Muértope, Cades ykua peve, Israelguakuéra oñemoĩ haguépe pende Ruete rehe, ha Cades guive Egípto yakã (arróyo) peve, ha upéguive yguasu tuicháva (Mar Mediterráneo) peve. Péva ningo Israel rembe’yrã sur gotyogua.

20Ha Israel retã rembe’y kuarahyreike gotyogua ou Egípto retã rembe’y guive ha ojepyso pe yguasu tuichaitéva ykére Hamat ojeikeha rovái peve. Kóva ningo hetã rembe’y kuarahyreike gotyogua.

21Ha pemboja’óta pende apytépe ko yvy kóva Israel tribukuéra apytépe.

22Ha peitýta hese po’a peiporavo hag̃ua pene mba’erã ha peme’ẽva’erãva avei umi tetã ambueyguápe ha ita’yrakuérape. Toñeme’ẽ ichupekuéra ilóte pende apytépe Israelgua ramoguáicha, upévagui peitýta avei po’a jeporavo ichupekuéra g̃uarã, ha’ekuéra oguereko hag̃ua iloterã Israel tribukuéra apytépe.

23Israel ra’y ñemoñarenguéra apytépe, mamo oikohápe, upépe peme’ẽta avei ichupekuéra iloterã, he’i pende Ruete.