Josue 3 - Biblia en Guaraní - ?anderuete ?e’? Por? 2015

Israelguakuéra ohasa Jordan ysyry mboypýri

1Josue ha Israel ñemoñarenguéra opu’ã pyhareve oipykúi hag̃ua Sitímgui ha ou Jordan rembe’y peve, ha ohasa mboyve opytu’u hikuái upépe.

2Ha opytu’u rire mbohapy ára, umi mburuvicha oguata pe campaménto rupi,

3ha he’i hikuái hetãyguakuérape: Pehecha vove umi Levigua ogueraha Ñanderuete, Ñandejára karameg̃ua ñembopy’apeteĩ reheguáva, peẽ pesẽta avei peime hágui ha pehóta hapykuéri,

4ikatu hag̃uáicha peikuaa pe tape mamo rupípa pehova’erã; ndapeguatáigui gueteri ko tape rupi. Pendehegui pe karameg̃ua opytava’erã peteĩ pa’ũ 875 métro rupi, napeñemo’ag̃uiveiva’erã hese.

5Ha Josue he’i hetãyguakuérape: Peñemboheko potĩke, ko’ẽ ramo Ñanderuete ojapóta techapyrãguasúva (milágro) pende apytépe.

6Ha Josue oñe’ẽ pa’ikuérape, ha he’i: Pejapyhy pe karameg̃ua ñembopy’apeteĩ reheguáva, ha pehasa tetãyguakuéra renonderãme. Ha ojapyhy hikuái pe karameg̃ua ñembopy’apeteĩ reheguáva ha oho hikuái hetãyguakuéra renonderãme.

7Upéramo Ñanderuete he’i Josuépe: Ko ára guive añepyrũta ajapo mba’e guasu nderupi mayma Israel resa renondépe, oikuaa hag̃ua hikuái aĩtaha nendive aime haguéicha Moises ndive.

8Nde eréta umi pa’ípe ogueraháva pe karameg̃ua ñembopy’apeteĩ reheguáva: Ág̃a peike vove pe Jordan ýpe, pepytáta hembe’yetépe.


9Ha Josue he’i Israel ñemoñarenguérape: Peñemboja ha pehendu Ñanderuete, Ñandejára ñe’ẽ.

10Ha Josue he’i: Ko’ã mba’e rupi peikuaáta Ñanderuete oikohahína ñande apytépe, ha Ha’e omosẽtaha ñane renonderãgui umi Canaangua, Hetgua, Hevgua, Feresgua, Gergesgua, Amorgua ha Jebusguakuérape.

11Péina ápe, Ñanderuete karameg̃ua ñembopy’apeteĩ reheguáva ohasáta pene renonderãme pe Jordan ysyry mbyte rupi, Ha’e voi ningo ko yvy tuichakue Jára añeteguáva.

12Peiporavo ko’ág̃a 12 kuimba’e Israelguakuéragui, peteĩteĩ itribukuéragui.

13Ha umi pa’i ogueraháva Ñanderuete karameg̃ua opyrũvo Jordan y rehe, péva oñemopa’ũta; umi y oguejýva yvatéguio opytapáta ha oñembyatýta tápiaicha peteĩ atýpe.

14Ha Israelguakuéra oipykúivo hóga tymba pirekueguiguágui ohasa hag̃ua Jordan ysyry rupi, umi pa’i oho henondépe oguerahávo pe karameg̃ua,

15ha umi pa’i ogueraháva pe karameg̃ua og̃uahẽvo pe ysyry Jordan rembe’ýpe ha opyrũ vove Jordan y rehe, péva ojei henondégui ha oike hikuái Jordan mbytépe. Ko’ã mba’e ojehu ñemitỹ ñemono’õha arakuérape Jordan ykuéra ohasa aja hembe’ýre.

16Umi y oúva yvatéguio opytapa tápiaicha ojejokógui, mombyry porã Adan távagui, opytáva Saretan ykére, ha umi y yvy gotyoguáva ojepoi Araba Yguasu Juky peguápe (Mar Saládope) opa peve; ha Israelguakuéra ohasa Jerico gotýo.

17Ha umi pa’i oguerahavahína Ñanderuete karameg̃ua opyta ñembo’yháme, ipy ikãháme Jordan mbytépe, umi tetãygua ohasapa peve Jordan mboypýri; ha mayma Israelgua ohasa Jordan py ikãha rupi.