Matéo 19 - Biblia en Guaraní - ?anderuete ?e’? Por? 2015

Umi omendáva ikatúpa ojopoi jevy

1Ha ojehu Hesu he’ipávo ko’ã ñe’ẽ ko’ãva, ohasa Galiléagui ha osẽ Juda departaméntogui, Jordan mboypýri.

2Ha heta hetãyguakuéra oho hapykuéri, ha Ha’e omonguera ichupekuéra.

3Ha fariseokuéra oñemboja hendápe oipy’ara’ã hag̃ua ichupe, ha oporandu hikuái: Ikatúpa pe kuimba’e opoi hembirekógui oimeraẽ mba’e rei rehe.

4Ha Hesu he’i ichupekuéra: Ndapeikuaái piko Ñanderuete kuatiañe’ẽ he’iha: Iñepyrũmbýpe Ha’e ojapo ypyva’ekue peteĩ kuimba’e ha peteĩ kuña.

5Ha he’i hague: Pe kuimba’e ohejava’erã itúva ha isýpe ha ojoajuva’erã hembireko ndive, oiko hag̃ua mokõivévagui peteĩ to’o añóntema.

6Ha péicha ramo ndaha’evéima mokõi tete, peteĩntema (peteĩ to’o). Upévare umi yvyariguakuéra Ñanderuete ombojoajumava’ekue, yvyariguakuéra ndoipe’aveimava’erã ojuehegui mba’evéicharõ.

7Ha he’i hikuái ichupe: Ha mba’érehe piko aipórõ Moises ome’ẽuka pe kuatia mendare jopoi rehegua, ojopoi hag̃ua.

8Ha Hesu he’i ichupekuéra: Pende py’a hatãitereígui Moises oheja pepoi hag̃ua pene rembirekógui, iñepyrũmbyetépe katu ndaupeichaiva’ekue.

9Che katu ha’e peẽme: Oimeraẽ opoíva hembirekógui, ndaha’éi ramo ombyaígui heko vai rupi imenda reko, ha omenda ramo ambue rehe, upéicharamo omongy’a imendare.

10Upérõ hemimbo’ekuéra he’i ichupe: Upéichata ramo kuimba’e reko hembireko ndive iporãvéta nomendaiete voi.

11Hesu katu he’i ichupekuéra: Ko ñe’ẽ kóva ndaopavavéipe g̃uarã, umi oentendekuaávape g̃uarãnte.

12Oime ningo ha’ỹi’ỹva isy rye guive, peichaite onaceva’ekuégui voi, ha oĩ umi ojecapava’ekue (oñeha’ỹi’o) ambue hapicha po rupi ha oĩ avei umi ojecapava’ekue ha’ekuéra voi, Ñanderuete retãguasu (rembiapo) rehehápe; tohechakuaa umi ikatúva ohechakuaa.

Hesu ohovasa mitãkuérape

13Upéramo ojegueru hendápe mitãkuéra Ha’e omoĩ hag̃ua ipo iñakã ári ha oñembo’e hag̃ua hesekuéra; hemimbo’ekuéra katu ipochy heruharakuéra ndive, ha oja’o hikuái ichupekuéra.

14Hesu katu he’i: Peheja mitãkuérape tou che rendápe, ha ani pejokótei ichupekuéra, umi upéicha oikóvape oñeme’ẽ Ñanderuete retãguasu (réino).

15Ha omoĩ ipo hi’arikuéra, ohovasa hag̃ua ichupekuéra ha uperire Ha’e oho upégui.

Peteĩ imba’eitáva oikese yvágape hembiapo porã rupi

16Ha ou peteĩ kuimba’e Hesu rendápe ha oporandu ichupe: Mbo’ehára, mba’éichagua tembiapo porãpa ajapova’erã ahupity hag̃ua pe tekove opa’ỹva.

17Ha Hesu he’i ichupe: Mba’érehe piko reporandu chéve mba’eporã rehe. Peteĩnte ningo pe iporãva (ha péva Ñanderuete). Ha reikese ramo pe tekovetépe ejapo hembiapoukapykuéra.

18Ha ha’e oporandu: Mba’eichaguápa. Ha Hesu he’i ichupe: Ani reporojuka, ani rembyai ne mendare reko, ani remonda, ani reiko techahare japu ramo.

19Emomba’ete nde ru ha nde sýpe, ha ehayhu nde rapichápe ndete rejehayhu háicha.

20Ha pe mitãrusu he’i: Umi mba’e umíva ningo che ajapopa voínte, mba’épa ajapoveva’erã.

21Ha Hesu he’i ichupe: Nde reko porãmbase ramo, tereho eñemumba opaite mba’e reguerekóva guive rehe, ha hepykue eme’ẽmba mboriahúpe, ha reguerekóta mba’erepyeta yvágape, ha upéi eju che rapykuéri.

22Pe mitãrusu ohendúvo ko’ã mba’e, oho upégui ñembyasy reheve, oguerekógui hetaiterei mba’erepy.

23Ha Hesu he’i hemimbo’ekuérape: Añetehápe Che ha’e peẽme hasytereiha peteĩ ipirapire hetávape oike hag̃ua Ñanderuete retãguasúpe.

24Ha Che ha’e jevy peẽme, ndahasyveiha peteĩ guéi ohasa hag̃ua ju resa rupi, peteĩ ipirapire hetávagui oike hag̃ua Ñanderuete retãguasúpe.

25Hemimbo’ekuéra ohendúvo péva ipy’andýi joa hikuái, ha he’i: Upéichata ramo máva piko ikatúta ojesalva.

26Hesu oma’ẽ hesekuéra ha he’i: Yvyariguakuérape g̃uarã ningo ndaikatúi voi, Ñanderuetépe g̃uarã katu opaite mba’e ikatu.

27Upéramo Pédro he’i ichupe: Ore ningo rohejava’ekue opaite mba’e ha roju nde rapykuéri, ha mba’épa oikóta orehegui.

28Ha Hesu he’i: Añetehápe Che ha’e peẽme, upe ipyahupa jevyha árape, pe yvyarigua Ra’y oguapyva’erã iguapyha omimbívape ha peẽ pejúva che rapykuéri peguapýta avei 12 guapyha ári pembojovake hag̃ua umi 12 Israel tribukuérape.

29Ha oimeraẽva ohejava’ekue hóga, térã ityke’ýra, heindy, isy, ita’ýra térã ikokue che réra rayhupápe, ohupityva’erã 100 jevyve, ha oguerekóta pe tekove tapia g̃uarãva.

30Ha heta itenondevahína itapykueva’erã, ha itapykuevahína itenondeva’erã.