1Upéicharamo mba’épa ja’éta. Ñañemboheko vaivétapa jahávo, okakuaave hag̃ua avei Ñanderuete mborayhu ha iporiahuvereko.
2Mba’evetéicharõ. Ñande ñamanómava’ekue angaipápe g̃uarã, mba’éicha piko jaikovetañaína gueteri ipype.
3Térã piko ndapeikuaái opaite ñande jajebautizava’ekue Hesu Crísto rérape, jajebautiza hague avei iñemanóme.
4Ñande ñañeñotỹmava’ekue Crísto ndive pe bautísmo rupi iñemanóme, ha Ñanderuete pu’aka omoingove jevy haguéicha Hesu Crísto omanóva apytégui, upeichaite Ha’e oipota ñande jaikoveñaína (tapia g̃uarã) Pytu Porãmbáva pu’aka poguýpe.
5Ñande ñañembopy’apeteĩ haguére Hesu Crísto ndive iñemanóme, ñañemopeteĩva’erã katuete avei iñemoingove jevýpe.
6Jaikuaa porã ningo ñande reko tuja oñemosãingo hague kurusúre Hesu Crísto ndive, oñehundi hag̃ua ñande rete angaipa rehegua, anive hag̃ua ñande jaiko angaipa rembiguái ramo.
7Umi omanova’ekue oñemosãsóma angaipa pu’akágui.
8Ñamanóma ramo Hesu Crísto ndive, jajerovia avei jaikove jevyva’erãha hendive.
9Jaikuaa porã ningo Hesu Crísto oñemoingove hague omanóva apytégui, nomanomo’ãvéi araka’eve, pe ñemano ndaipu’akavéigui hese.
10Hesu Crísto omanóvo ombopoguypaitéma angaipa pu’aka, ha hekove ko’ag̃agua Ha’e oikove Ñanderuetépe g̃uarã.
11Péicha avei peẽ pehechakuaa pemano hague angaipápe g̃uarã, ha peikovepeína Ñanderuetépe g̃uarã Hesu Crísto oikógui pendepype.
12Upévare anive peheja pe angaipa oisãmbyhy (ojokuái, omanda) pende rete omanova’erãme, ha péva ojehúta peneñe’ẽrendu jevy ramo pende rete rembipota vaípe.
13Anítei peiporuka pende rete reheguáva angaipápe, teko vai rembiporurã ramo, upéva rãngue peñeme’ẽmba Ñanderuete pópe, Ha’e oiporu hag̃ua pende rete reheguáva tembiapo porãme, teko porã rembiporu ramo; peikuaágui pesẽma hague pe ñemano pu’akakuégui, peiko hag̃ua tekove pyahu pu’aka poguýpe.
14Upéicharamo ndapeikovéima angaipa rembiguái ramo, peẽ ndapeikovéiguima Moises rembiapoukapy poguýpe, Ñanderuete mborayhu ha iporiahuvereko poguýpema uvei peikopeína ko’ág̃a.
Jaiko mborayhu rembiguái ramo, ha anivéma angaipa rembiguái ramo15Aipórõ aporandu jevýta: Ñañemboheko vai jevýnepa nañaimevéirõ jepe Moises rembiapoukapykuéra poguýpe, Ñanderuete mborayhu ha iporiahuvereko poguýperõ uvei. Mba’evéicharõ.
16Ndapeikuaái piko, peñeme’ẽ ramo peteĩ járape peikova’erãha hembiguái ramo, peẽ peneñe’ẽrenduva’erã ichupe; ha péicha avei peẽ peneñe’ẽrendu ramo angaipápe pende jarapeguáicha ramo peẽ peiko hembiguái ramo, ko ñe’ẽrendu kóva ogueruva’erã katuete pene ñemanorã, ha peẽ peneñe’ẽrendu ramo peína Ñanderuetépe, Ha’e penemboheko potĩva’erã.
17Ko’ág̃a jagradece Ñanderuetépe, angaipa rembiguái rire jepe peẽ, ko’ág̃a peneñe’ẽrendupeína pende py’aite guive peñeme’ẽmbávo pe tekombo’e pyahu poguýpe ohekombo’éva pende rekove.
18Peñemosãsóma angaipa pu’aka poguýgui, oiko hag̃ua pendehegui teko potĩ rembiguái.
19Añe’ẽ ningo ko yvyarigua oñe’ẽ háicha, pende rete ikangýgui gueteri. Ha peme’ẽ haguéicha yma pende rete teko ky’a ha tie’ỹ rembiguái ramo, peiko hag̃ua mba’evai apoha ramo, ko’ág̃a peme’ẽ pende rete teko potĩ rembiguái ramo, peñemoambue hag̃ua pehóvo pe teko porã gotýo.
20Peẽ peiko ramoguare angaipa rembiguái ramo, mombyry peiko teko potĩgui.
21Mba’eichagua a (frúto) piko ojehechára’e pende rekovekuépe. Ojehecha katu heta mba’evai ha mba’e ky’a pende rekovekuépe, ha ko’ág̃a peve petĩ gueteri umívare. Umi mba’e umía penemuña pene ñemanorã meve.
22Ko’ág̃a katu penesãsóma angaipa pu’aka poguýgui, peikógui Ñanderuete rembiguái ramo, ojehecha ambue a pende rekovépe, peñemboheko porã pehóvo ha hi’ári pehupitýta pe jeikove tapia g̃uarãva.
23Pe angaipa repy ningo pe ñemano, Ñanderuete me’ẽmby rei katu pe tekove tapia g̃uarãva Ñandejára Hesu Crísto pendepype.
Who We AreWhat We EelieveWhat We Do
2025 by iamachristian.org,Inc All rights reserved.
