Provérbios 11 - Biblia en Guaraní - ?anderuete ?e’? Por? 2015

1Pe mba’e pohýi ra’ãha (balánza pésa) japu ombopy’aro Ñanderuetépe; ha pe mba’e pohýi ra’ãha hekoite peguáva ombohory ichupe.

2Ñemotĩ oĩ oñembotuicháva rekovépe; arandu katu oĩ oñemomirĩva rekovépe.

3Pe justícia oisãmbyhyva’erã heko potĩvape; ha umi hembiapo vaíva oñehundiva’erã iñaña reko rupi.

4Ndepirapire heta ramojepe nandesalvamo’ãi Ñanderuete ñembojovakeha árape, ha ndereko potĩ ramo katuete Ha’e ndesalvava’erã pe ñemanorãgui.

5Pe justícia omyatyrõva’erã heko potĩva rape; ha upe iñañáva katu ho’ava’erã iñaña reko rupi.

6Pe justícia omosãso heko potĩvape ha umi hembiapo vaíva katu ho’ava’erã hembiapo vai poguýpe.

7Omano ramo tekove ñaña, omanóma avei iñesperánza; ha umi tekove ñaña oha’ãrõiteva’ekue opa rei.

8Pe heko potĩva ojesalvava’erã ijehasa asýgui, pe iñaña rekóva katu opyta ijehasa asýpe.

9Pe hova mokõiva juru ombyai hapicha rekove, ha umi heko potĩva katu osalva hapichápe iñarandu rupi.

10Umi heko potĩva ohasa porã ramo ovy’a pe táva; ha umi tekove ñaña omano ramo katu oĩ vy’aguasu pe táva ryepýpe.

11Umi heko potĩva rupi pe táva oñemopu’ãve ohóvo; ha umi tekove ñaña juru rupi katu oñembyai peteĩ táva.

12Upe ojapo’íva hapichápe, ivýro; ha upe tekove iñakãguapy porãva katu okirirĩkuaa.

13Pe jurumy’ỹime oikóva omombe’u opaite mba’e ñemiha megua; ha upe ipy’a porãva katu omo’ãmba.

14Ndaipóri ramo mburuvicha iñarandúva hetã oñehundiva’erã, oñemopu’ãva’erã ohóvo pe tetã oĩháme oporohekombo’ekuaáva.

15Py’a tarova og̃uahẽva’erã upe ome’ẽva iñe’ẽ peteĩ odevéva rehehápe; ha upe nome’ẽiva iñe’ẽ katu oikova’erã kyhyje’ỹme.

16Pe kuña ijukýva oñemboeteva’erã ha pe ikyre’ỹva imba’erepyetava’erã.

17Upe oporoporiahuverekóva ojapo hi’ánga rehe mba’eporãite; ha upe ipy’a hatãva katu ha’e voi ombyai heteteépe.

18Pe iñañáva ohupitýta hembiapo japu repy; ha upe omyasãiva teko potĩ ohupityva’erã hembiapo repy heko peguáva.

19Pe teko potĩ ñanemoingove, pe teko ñaña ñandejukava’erã.

20Ñanderuete ipy’aro umi ipy’a tie’ỹva ndive; ha umi oñemomirĩva katu ombohory ichupe.

21Katuete og̃uahẽva’erã pe ára ojehavira hag̃ua pe tekove ñañáme; umi heko potĩva ñemoñare katu ojesalvava’erã.

22Peteĩ namichãi oroguiguáva kure nambíre, ojogua peteĩ kuña iporãitévape oñemboykéva pe arandúgui.

23Umi hekopotĩva ohupitýta mba’e porã; ha umi iñañáva ohupityva’erã Ñanderuete rata rendy iñembojovakeha árape.

24Oĩ ningo umi ome’ẽme’ẽva ha imba’e oñembohetave ohóvo; ha oĩ avei umi ipo jopyetereíva ha ipahápe katu imboriahuve ohóvo.

25Upe oporoporiahuverekóva oñemohyg̃uatã porãta ha upe omboy’úva hapichápe oñemboy’u jevyva’erã avei.

26Upe kuimba’e oñongatupáva imba’e ra’ỹingue, hetãyguakuéra omaldeciva’erã ichupe; ha upe kuimba’e oñemúva hemitỹnguéra ojehovasava’erã.

27Pe ohekáva mba’eporã ojohuva’erã Ñanderuete py’aporã; ha pe ohekáva mba’evai katuete omono’õ jevyva’erã mba’evai.

28Upe kuimba’e ojeroviáva imba’e heta rehe oñehundiva’erã yvyra rogue pirúvaicha, ha umi heko potĩva katu hokyva’erã yvyra rogue pyahúvaicha.

29Upe oñangareko porã’ỹva hogayguakuéra rehe ohupitýnte yvytu, ha pe ivýrova oikova’erã pe iñarandúva rembiguái ramo.

30Pe heko potĩva ningo ojogua yvyra oikovévape ha pe teko mbarete oporojuka.

31Añetehápe pe heko potĩva ohupityva’erã hembiapo repykue ko yvy apére, ha péicha katuete ojehuva’erã avei pe tekove ñañáme ha pe hembiapo vaívape.