Tiágo 4 - Biblia en Guaraní - ?anderuete ?e’? Por? 2015

Yvyarigua rembipota vai rupi ou pe ñorãirõ

1Moõguipa ou ñorãirõ ha ñe’ẽ’api pende apytépe. Ndoúi piko pende rete rembipota vaígui, oñorãirõva pende py’apýpe ko’ẽ ko’ẽre.

2Peẽ peñeha’ãmba pehupity hag̃ua peteĩ mba’e ha araka’eve ndapeguerekói; peẽ peipotaiterei peteĩ mba’e ha penerendy tatáicha peporojuka hag̃ua, upeichavérõ ndapehupitýi pe mba’e peipotáva; peñeha’ãmba, upeichavéramo jepe noñeme’ẽi peẽme, ndapejeruréigui hekoitépe.

3Pejerure ha ndapehupitýi, peiporu vaise ha pemohyg̃uatãségui pende rete rembipota vaínte.

4Peẽ peñemboykéva Ñanderuete rapégui, peiko ku tembireko opoimava’ekuéicha iménagui, oiko hag̃ua kuña reko vaícha; upe oikoséva ko múndo rayhupára ramo oikóta Ñanderuete rehe ija’e’ỹva ramo.

5Peimo’ã piko Ñanderuete ñe’ẽ he’i reiha: Ñanderuete hakate’ỹ Pytu Porãmbáva rehe, Ha’e omoĩmava’ekue ñandepype, (Génesis 6,3.5; Galaciayguakuérape 5,17).

6Ñanderuete katu ñanepytyvõse, Ha’e ipy’aporãgui. Upévare Ñanderuete kuatiañe’ẽ he’i: Ñanderuete oñemoĩ umi oñembotuicháva rehe, ha oipytyvõ umi oñemomirĩvape, (Provérbios 3,34).

7Peñemoĩ Ñanderuete poguýpe; ha peñemoĩ hatã mba’epochy rehe, ha ha’e ojeíta pende ypýgui.

8Peñemboja Ñanderuete rehe, ha Ha’e oñembojáta penderehe. Pemopotĩ pende pokuéra, peẽ angaipavóra, ha pemopotĩ porã pende py’apy, peẽ pendepy’a mokõiva.

9Penepyahẽ, peñembyasy ha pejahe’o. Pende pukágui toiko jahe’o, ha pende vy’águi, toiko ñembyasy.

10Peñemomirĩ Ñanderuete renondépe ha Ha’e penemopu’ãtaha.

11Che hermanokuéra, ani peñe’ẽvai ojuehe; pe oñe’ẽvaíva iñermáno rehe ha pe ombojovakéva iñermánope oñe’ẽvai Ñanderuete rembiapoukapy rehe, ha’e ombojovakégui Ñanderuete rembiapoukapy voi. Ha nde rembojovake ramo Ñanderuete rembiapoukapy nde reiko imbojovakehára ramo, neñe’ẽrendu rãngue Ñanderuete rembiapoukapýpe nde reiko imbojovakehára ramo.

12Ha’émante ome’ẽva’ekue pe tembiapoukapy ha Ha’émante oiko ñane mbojovakehára ramo; Ha’émante ikatu osalva térã ohundi; nde katu piko máva, rembojovake hag̃ua nde rapichápe.

Yvyariguakuéra ndoikuaái henonderã

13Pejapysaka porãke, peẽ pejéva: Ko’ág̃a térã ko’ẽrõ rohóta peteĩ tavaguasúpe, ha ropytáta upépe peteĩ áño roñemu ha rombyaty hag̃ua ore pirapirerã,

14ndapeikuaái ningo mba’épa ikatu ojehu ko’ẽrõ. Mba’e piko pende rekove, ojoguáva ytimbópe, ojekuaáva sapy’ami ha upéi opa rei,

15upéicha rãngue ningo pejeva’erãmo’ã: Ñanderuete oipota ramo ha ore roikove ramo, rojapóta kóva térã amóva.

16Ko’ág̃a katu pejererovu ha peñembotuicha, peikuaa katu koichagua ñembotuicha ivaiha.

17Upe ojapokuaáva tembiapo porã ha ndojapói, ha’e oñemohembiapo vai.