Salmokuéra 30 - Biblia en Guaraní - ?anderuete ?e’? Por? 2015

David omomba’eguasu Ñanderuetépe oguenohẽ haguére ichupe ñemanógui - David purahéi

1Che romomba’eguasu, Nde, che Ruete, chepytyvõ porã haguére, ha nderehejáigui oñembohory cherehe umi cherayhu’ỹva.

2Che Ruete, che romomba’eguasu Nde cheguenohẽ haguére cherayhu’ỹva pógui, ha Nde nderehejái ha’ekuéra oñembohory cherehe.

3Nde, che Ruete, reguenohẽ che ánga umi omanómava retãgui, Nde chemoingove jevy, ha natekotevẽi aguejy yvy guýpe.

4Pepurahéi Ñanderuetépe, opaite peẽ hekopotĩva, pemomba’eguasu Ñanderuete réra porãite.

5Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.

6Che aiko porãite aja ha’e chejupe: Araka’eve nacheangekõiri.

7Nde, che Ruete, ne ñepytyvõguasu rupi chemoĩ hatã porã ku cédro mbaretetéicha, reñomi ramo nde rova katu cheangekõita.

8Upévare Nde, che Ruete, amba’ejerure asy, che Járape amba’ejerure’aína, Nde cheporiahuvereko hag̃ua.

9Ha che amano rire piko máva nemomba’eguasúta. Pe yvy timbo piko nemomba’eguasúne chéicha, térã omombe’u porãne Nde ndepy’a porãha.

10Ehendumína, Nde, che Ruete, ha cheporiahuverekomína, che Ruete, eikomína che pytyvõharaite ramo.

11Ajahe’o rãngue, ajeroky vy’apópe. Nde rejoráma che ao vosakue rehegua, ha cheku’a jopyha torypápe.

12Upévarehe che ánga opurahéita ndéve rombotuicha hag̃ua, nakirirĩmo’ãi, Ñanderuete, che Jaratee, che romomba’eguasuháve opaite árape.