Éxodo 40 - Biblia en Guaraní - ?anderuete ?e’? Por? 2015

Moises omopu’ãuka pe óga jojohuha

1Upéi Ñanderuete oñe’ẽ Moiséspe, ha he’i:

2Pe ára peteĩha, pe jasy peteĩháme remopu’ãukáta pe óga, pe óga pejojohu hag̃ua pende Ruete ndive;

3ha ipype remoĩta pe karameg̃ua umi 10 tembiapoukapy reheve ha emboja’o pe kotyguasu oñemboykéva pa’ikuéra, pe ambue kotyguasu oñemboykéva Ñanderuete ha pa’iguasúpe g̃uarãnte, peteĩ aosãingo rupi.

4Remoingéta pe mesa ha remohenda porãmbáta hembiporukuéra; remoingéta avei pe tataindyenda hemiendy’inguéra reheve,

5ha remoĩta pe kuave’ẽmby renda oroguiguáva ojehapy hag̃ua mba’e ryakuã porã pe karameg̃ua rovái, ha remoĩta pe aosãingo henonde gotýo, ojeikehápe pe kotyguasúpe oñemboykéva pa’ikuérape g̃uarã.

6Upéi emohenda pe kuave’ẽmby renda ojehapyva’erãháme pene rymbakuéra pe óga jojohuha rokẽ renondépe.

7Upéi remoĩta pe yenda pe óga jojohuha ha pe kuave’ẽmby renda pa’ũme, ha pemyenyhẽ ýgui.

8Ipahaitépe pemopu’ãta pe korapyjere, ha pemoĩ pe aosãingo korapy rokeguasúpe.

9Upéi remonáta acéitere pe óga ha opaite mba’e oĩva guive ipype, oñemboyke hag̃ua pende Ruetépe g̃uarã.

10Remonáta avei pe tymba kuave’ẽmby renda ha opaite hembiporukuérare; ha péicha emboyke pende Ruetépe g̃uarã.

11Péicha remonáta avei pe yendáre, ipyenda reheve.

12Ha regueraháta Aaron ha ita’yrakuérape pe óga jojohuha rokẽme, ha ejohéi ichupekuéra.

13Emonde Aaron rehe pa’iguasu ao, ha emona hese acéite, oiko hag̃ua pa’iguasu ramo.

14Upéi emboja avei upépe ita’yrakuéra ha emonde hesekuéra pe póncho puku;

15ha emona avei hesekuéra emona haguéicha itúvare, ha’ekuéra oiko hag̃ua che pa’ikuéra ramo, ha iñemona rupi ha’ekuéra ha iñemoñarenguéra oikóta opaite árape che pa’ikuéra ramo.

16Ha Moises ojapopa Ñanderuete he’i haguéicha ichupe.

17Pe ára peteĩháme, pe jasy peteĩháme, peáño mokõiháme oñemopu’ã pe óga Israelguakuéra ojejohu hag̃ua Ñanderuete ndive.

18Péicha Moises omopu’ãuka pe óga jojohuha, omohenda itablakuéra ipyenda ári; ha omopu’ãuka postekuéra ha ijalfajía reheve.

19Moises omo’ãuka pe óga jojohuha aosãingo reheve, Ñanderuete he’i haguéicha ichupe.

20Ha ojapyhy pe 10 tembiapoukapy ha omoĩ pe karameg̃uáme ha omohenda hi’ýva pukukuéra pe karameg̃ua rehe ha hi’ári omoĩ pe karameg̃ua juru ñembotyha.

21Upéi omoinge pe karameg̃ua pe óga jojohuhápe, pe kotyguasúpe oñemboykéva Ñanderuete ha pa’iguasúpe g̃uarã pe aosãingo ojepysóva kupépe, Ñanderuete he’i haguéicha Moiséspe, peichaite ha’e ojapopa.

22Omoĩ pe mesa pe óga jojohuha ryepýpe, pe kotyguasúpe oñemboykéva pa’ikuérape g̃uarã, nórte gotýo, tenonde gotýo pe aosãingo omboja’óva umi (mokõi) kotyguasu,

23ha hi’ári omohenda porã umi pan Ñanderuete renondépe, Ha’e he’i haguéicha Moiséspe.

24Omoĩ pe tataindyenda pe óga jojohuhápe, pe mesa rovái, sur gotýo.

25Omyendy umi tesape Ñanderuete renondépe, Ha’e he’i haguéicha Moiséspe, peichaite ojejapopa avei.

26Omoĩ avei pe kuave’ẽmby renda oroguiguáva pe óga jojohuhápe, pe aosãingo rovái, pe kotyguasu aosãingo renondépe,

27ha ohapy hi’ári mba’e ryakuã porãva, Ñanderuete he’i haguéicha Moiséspe.

28Omoĩ avei pe aosãingo pe óga ojeikehápe.

29Ha omohenda pe tymba kuave’ẽmby renda pe óga jojohuha renondépe, ha oikuave’ẽ hi’ári kuave’ẽmby ojehapypáva ha tembi’u rehegúava, Ñanderuete he’i haguéicha Moiséspe, peichaite ojejapopa avei.

30Ha omoĩ pe yenda pe óga jojohuha ha kuave’ẽmby renda pa’ũme, ha omoĩ ipype y oñemopotĩ hag̃ua.

31Moises, Aaron ha ita’yrakuéra ipype ojepohéi ha ojepyhéi hag̃ua,

32oike mboyve pe óga jojohuhápe ha oñemboja mboyve pe kuave’ẽmby rendápe, oñemopotĩva’erã, Ñanderuete he’i haguéicha Moiséspe.

33Ipahaitépe omopu’ãva’erã pe korapy pe óga jojohuha ha tymba kuave’ẽmby renda jerekuévo rehe, ha omoĩ pe aosãingo pe kora ojeikehápe. Péicha Moises ojapouka pe tembiapo guasuetéva.

Pe arai ñembo’yha opyta pe óga jojohuha ári

34Upéramo peteĩ arai oñembo’ýva omo’ã pe óga jojohuhápe, ha Ñanderuete reko jajaipa omyenyhẽ pe óga jojohuha.

35Ha Moises ndaikatúi oike pe óga jojohuhápe oĩgui hi’ári peteĩ arai, ha Ñanderuete reko jajaipa omyenyhẽmbágui pe yvy pehẽngue pévape.

36Pe arai opu’ãvo pe óga árigui, Israel ñemoñarenguéra oipykúi hapekuéra rehe;

37ha pe arai nopu’ãi ramo Israelguakuéra opytapa hekohápe pe arai opu’ã jevy peve.

38Ñanderuete arai ñembo’y oĩ arakuépe pe óga jojohuha ári, ha pe tatarendy oĩ pyharekue hi’ári, Israelguakuéra resa renondépe (og̃uahẽ meve Canaan retãme).