Deuteronómio 16 - Biblia en Guaraní - ?anderuete ?e’? Por? 2015

Páscua

1Pemboareteva’erã abril jasy og̃uahẽ vove, ha pejapova’erã páscua Jahve, pende Járape g̃uarã; peteĩ pyharépe umiha árape Ñanderuete peneguenohẽva’ekue Egípto retãgui.

2Ha páscua jave peikuave’ẽva’erã Ñanderuetépe g̃uarã, umi ovecha, kavara ha vakara’y ypykue, pe yvy pehẽngue Ha’e oiporavotahápe oñemopu’ã hag̃ua hóga jojohuha.

3Ndape’uiva’erã hendive pan ojejapova’ekue levadúra reheve, 7 ára pukukue pe’uva’erã pan ojejapova’ekue levadura’ỹre, kóva ningo pan tembiasa asy reheguáva, pya’eiterei pesẽ haguére Egípto retãgui; ikatu hag̃uáicha peikove aja pukukue penemomandu’a hag̃ua pe ára rehe pesẽ ramoguare Egípto retãgui.

4Ndojejohuiva’erã levadúra pene retãme 7 ára pukukue jave; ha pe ka’arupytũme pejukava’erã peteĩ pene rymba ha ho’ógui ndikatúi hemby ambue ko’ẽme g̃uarã.

5Ndapeikuave’ẽiva’erã pe páscua oimeraẽ távape, Jahve, pe yvy pehẽnguépente pende Jára ome’ẽtava peẽmente,

6ha Ñanderuete oiporavotahápe uvei ha upépe oñemopu’ãta hóga jojohuha, upépe peikuave’ẽta pe páscua ka’arupytũme, kuarahy oikévo, pe horaitépe pesẽ hague Egípto retãgui.

7Ha pembichýta ha pe’úta upe yvy pehẽngue Ñanderuete pende Jára oiporavotahápe; ha pyhareve pejeréta peho jevy hag̃ua pende rógape.

8 Seis ára pukukue pe’uva’erã pan ojejapova’ekue levadura’ỹre, ha pe ára 7-hápe oikóta atyguasu Ñanderuetépe g̃uarã; napemba’apoiva’erã pe ára pévape.

9Peipapava’erã 7 semána, ha peñepyrũva’erã peipapa trígo ñemono’õ ára peteĩha guive kyse ty’ãi reheve.

10Ha pejapóta areteguasu Ñanderuete, pende Járape g̃uarã, peme’ẽta pendejehegui peguerekóvagui Ñanderuetépe, Ha’e penepytyvõ hagueichaite.

11Ha pejapóta vy’aguasu Jahve, pende Ruete renondépe, nde, nde ra’y, nde rajy, ne rembiguái kuimba’e ha kuña, pe Levigua, pe tetã ambueygua, pe ityre’ỹva ha pe imenave’ỹvape g̃uarã oikóva guive penendive, pe yvy pehẽnguépe Ha’e oiporavotahápe ha oñemopu’ãtahápe hóga jojohuha.

12Ha peñemomandu’áke peẽ peiko hague avei tembiguái ramo Egíptope; upévagui pejapova’erã hekoitépe Ñanderuete rembiapoukapy.

13Pemono’õmba rire pende trígo ha pehykue’opa rire pende parral’a 7 ára pukukue, pejapova’erã vy’aguasu ha peikova’erã yvyra rogue guýpe (enramada).

14Ha pevy’ava’erã pe areteguasúpe, nde, nde ra’y, nde rajy, ne rembiguái kuimba’e ha kuñáva, pe Levigua, pe tetã ambueygua, pe ityre’ỹva ha pe imenave’ỹva oikóva guive pende apytépe.

15 Siéte ára pukukue pemboarete ha pemomba’eguasuva’erã Ñanderuete, Ñandejárape, pe yvy pehẽngue Ha’e oiporavotahápe; pevy’aite hag̃ua Ñanderuete ndive, Ha’e penepytyvõ porã haguére pende kokue rembiapópe.

16Mbohapy jevy meme áñope opaite kuimba’e Israel pegua ouva’erã Ñanderuete, Ñandejára renondépe, pe yvy pehẽngue Ha’e oiporavotahápe omomba’eguasu hag̃ua Ñanderuetépe: Pe arete pan ilevadura’ỹ reheguápe, pe arete semanakuéra reheguápe ha pe arete yvyra rogue reheguápe (enramada). Ha avave noñembojaiva’erã po nandi reheve Ñanderuete renondépe;

17peteĩteĩ oikuave’ẽva’erã ipotee rupi, Jahve, Ñandejárape g̃uarã, Ha’e penepytyvõ haguéicha.

Justícia

rembiapoukapykuéra

18Opaite tavakuérape, Ñanderuete ome’ẽtava peteĩteĩ pende tribukuérape, pemoĩva’erã mbojovakehára ha mburuvichakuéra, ha’ekuéra ombojovake ha oisãmbyhy hag̃ua hekoitépe itavayguakuérape.

19Ani pemoambue Ñanderuete rembiapoukapy: Ani pembojuavýtei ojuehegui tapichakuéra apytégui, ha ani pejapyhýtei pirapire ñemiháme, pe pirapire ñemiha megua omoypytũ iñarandúvape, ha ombojejavy mayma heko porãvape.

20Pembojovake ha peisãmbyhy porã, peikove porã ha peñemomba’e are hag̃ua pe yvýre Ñanderuete ome’ẽtava peẽme.

21Ani pemopu’ã peteĩ yvyra Ñanderuete kuave’ẽmby renda ykére, ojeporúva oñemomba’eguasu hag̃ua ambue járape,

22ha napemopu’ãiva’erã avei itaguasu oñembo’ýva oñemomba’eguasu hag̃ua ambue járape, cháke, péva ombopochy Ñanderuete, Ñandejárape.