Daniel 9 - Biblia en Guaraní - ?anderuete ?e’? Por? 2015

Daniel ñembo’e hetã rehe

1Darío, Asuéro ra’y, pe Mediaygua, oisãmbyhy aja hi’áño peteĩháme Caldeaygua retã ruvichaguasu ramo,

2che, Daniel, ama’ẽ porã umi áño rehe Ñanderuete he’iva’ekue iproféta Jeremías juru rupi ha ikuatiañe’ẽme he’i voi Jerusalen oñembotapereva’erã 70 áño pukukue.

3Ha ajesaupi Ñanderuete, pe Jaraitéva gotýo, ahekávo ichupe ñembo’e ha mba’ejerure rupi, karu’ỹme, ao vosakuépe ha aguapy jave tanimbúpe.

4Añembo’e Ñanderuetépe, ha’évo Nde, che Ruete, che Jára tuichaitéva ha oporomongyhyjéva, reñangareko porãva ne ñe’ẽ rehe ha rehayhuetéva umi nderayhúvape ha ojapóva hekopete ne rembiapoukapy.

5Ore roñemoangaipa, ore reko iñaña, ore ndorojeroviái nderehe, ore naoreñe’ẽrendúi, ore roñemoĩ nderehe, ore romboyke ne rembipota ha ne rembiapoukapykuéra.

6Ore naoreñe’ẽrendúi ne rembiguaikuérape, nde profetakuérape, nde rérape oñe’ẽva’ekue ore retã ruvichakuérape, ore mburuvichakuérape, ore ru ha opaite ore retãyguakuérape.

7Nde, ore Jára, nde rembojovake hekoitépe, ore rotĩ ne renondépe ojehechauka háicha Judaygua, Jerusalengua ha opaite Israel retãygua rekovépe, tetã ag̃ui térã mombyrýpe roikóva, Nde voi oremosarambi opárupi ore roñemoĩ haguére nderehe.

8Ore Ruete, ore rotĩete ne renondépe ore retã ruvicha, ore mburuvichakuéra, ore rukuéra ha ore roñemohembiapo vai roñemoĩvo nderehe.

9Nendive ore Ruete, oĩ poriahuvereko ha perdon, jepevémo ropu’ãra’e nderehe.

10Ore voi romboyke ne ñe’ẽ ha ne rembiapoukapykuéra, reme’ẽva’ekue oréve ne rembiguái profetakuéra rupi.

11Mayma Israelgua omboyke ne rembiapoukapy ha ndojapói ne ñe’ẽ, upévare ho’a oreári pe maldicion, ne rembiguái Moises kuatiañe’ẽme oĩva, ore Ruete, ore roñemoangaipa ne renondépe.

12Nde, ore Ruete rejapo opaite umi mba’e Nde ereva’ekue orerehe ha umi ore mburuvicha, oresãmbyhýva rehe, ha regueru oreári ko mba’evaiete, araka’eve ndojehecháiva gueteri ko’ã mba’evaiete Nde rejapoukáva Jerusalengua rehe.

13Opaite mba’e ojehai háicha Moises kuatiañe’ẽme, ore rohupitýma, noroñembyasýi katu rojapo vai haguére ore Ruete renondépe, rojevy hag̃ua nde rapépe ha rojapo hag̃ua ne ñe’ẽ añeteguáva.

14Upévare ore Ruete oipota umi mba’evai ou oreári; ore Ruete, ore Jára, nde rejapo hekopete opaite mba’e, ore katu naoreñe’ẽrenduséi voínte.

15Ore Ruete, ore Jára, Nde voi reguenohẽva’ekue ne retã Israel Egíptogui nde pu’aka rupi, ha rembotuicha nde réra, ko ára peve orénte roñemohembiapo vai ha roñemoangaipa ne renondépe.

16Ore Jára, nde py’a porãitégui, emomombyry nde pochy Jerusalen ha pe cérro Nde reiporavóvagui; ore ha ore rukuéra angaipa rupi ambue tetã opuka ha oñembohory Jerusalen ha Israelgua rehe.

17Ko’ág̃a, ore Jára, ehendu ko ne rembiguái ñembo’e ha imba’ejerure asy, ha tove tojajái jevy nde rova nde rogaguasu itaperéva ári, nde réra rehehápe.

18Nde, che Jára, emboyke nde apysa; ejesape’a ha ema’ẽ ore jehasa asy rehe ha pe táva oguerahávare nde réra; ndaorereko porãigui ore rojerure ko’ã mba’e, rojeroviágui nde poriahuvereko tuichaitéva rehe.

19Nde, ore Jára, ehendu, Nde, ore Ruete, eperdona, ejapysaka ha orepytyvõna ne mborayhu rehehápe; Nde, ore Jára, nde táva Jerusalen ha ne retã Israel oguerahágui nde réra porãite.

Gabriel omyesakã Daniélpe mba’épa he’ise umi 70 semána

20Añembo’e ha añemombe’u jave che ha che retã Israel angaipa rehe, ha añohẽ jave che mba’ejerure Ñanderuete, che Jára renondépe, che Jára cérro porãite rehe,

21pya’e ou ovevehápe che rendápe, oiméne pe kuave’ẽmby ka’arugua hórape, Ñanderuete rembiguái Gabriel, ojehechaukamava’ekue chéve ñepyrũrãme avei.

22Ha ou oikuaauka porã hag̃ua chéve, ha he’i: Daniel, ag̃uahẽ amyesakã porãmba hag̃ua ndéve.

23Nde reñepyrũvo reñembo’e, Ñanderuete he’i chéve aju hag̃ua rombo’e, Ha’e ningo nderayhuete, upévare ejapysaka porã katu upe oje’étava ndéve reikuaa porã hag̃ua mba’épa he’ise umi mba’e rehechava’ekue.

24 Seténta áño semána (490 áño) oñemoĩ ne retã ha nde táva Jerusalen ári opa hag̃ua pe teko ñaña ha oñemyenyhẽ meve pe angaipa ryru, ha oñeperdona hag̃ua umi jejavy ha heko vai ojegueru hag̃ua justícia opave’ỹva, omoañetévo umi mba’e ojehechaukava’ekue payetépe ha pe profecía rupi, ojeporavo peve pe Heko potĩvape.

25Eikuaa porãke osẽha ára guive pe tembiapoukapy oñemyatyrõ ha oñemopu’ã jevy hag̃ua Jerusalénpe ojeporavo peve pe Mesíaspe, pe mburuvicha guasu, ohasaveva’erã 7 áño semána (49 áño), ha 62 áño semánape (434 áño) aja oñemopu’ãmbáta Jerusalen pláza ha kora yvate, upeaja katu ojehasa asyva’erã.

26Ha umi 62 áño semána rire, ojepe’áta pe Mburuvichaguasu rekove, noñemo’angaipái ramojepe; ha peteĩ mburuvicha hetãyguakuéra reheve oúta ombyai hag̃ua Jerusalen ha Ñanderuete rogaguasu; ha hi’ára paha og̃uahẽ pya’ete ku y oñu’ãmbávaicha, ha upe ñorãirõguasu opa peve oñembotaperepáta, opaite mba’e oje’e haguéicha katuete oikóta.

27Ha peteĩ áño semánape (7 áño) omoañetéta iñe’ẽme’ẽ heta ndive upe áño semána mbytépe (3,5 áño) katu ojokopáta pe kuave’ẽmbynguéra. Ha hendaguépe omopu’ãta ambue jára ra’ãnga ha péva opytáta oñehundi peve upe mba’evai apohára, oje’epa haguéicha peichaite oikopáta avei.