1Eñemombaretéke nde ñorãirõhára rajy, Jerusalen, emopu’ã nde kora yvate oĩgui umi oñemoĩva orerehe oremongora hag̃ua, yvyra po’ípe oinupãta hikuái Israel retã ruvicha hova yképe.
2Belen, Efráta pegua, nde ningo pe táva michĩvéva Juda tavakuéra apytépe, ndehegui katu osẽta Israel retã ruvichaguasurã oikómava ijypy guive.
3Ojehejáta pe kuñakarai ohasa asy hag̃ua imemby peve ha opaite ityvýra hembýva guive ojevy jey hag̃ua Israel ra’ykuéra ndive Ñanderuete rendápe.
4Upéramo pe mburuvichaguasu og̃uahẽta ha oñangarekóta hetã rehe pende Ruete pu’aka reheve ha oisãmbyhýta hetãme oiko hag̃ua py’aguapýpe pende Ruete rérape ha Ha’e ombotuicháta ichupe ko yvy paha peve.
5Hendive voi oúta py’aguapy, ha Asiriaygua ou jevy ramo ñane retãme opyrũ hag̃ua ñande rogaguasu rehe, upéramo ñamondóta hendápe 7 tymba rerekua ha 8 mburuvicha.
6Ha ojukáta hikuái Asíria retãyguakuérape kyse pukúpe, ha ikyse pukúpe ombyaíta hikuái Nimrod yvýpe, péicha Ha’e ñanepytyvõta ou ramo Asiriayguakuéra, oñemoĩ hag̃ua ñane retã rehe ha opyrũ ramo ñande yvýpe.
7Upéramo Israel rembyre oikóta heta tetã apytépe Ñanderuete ysapyrõguáicha, ha ku amáicha ho’áva kapi’i ári ha ndoúiva yvyariguakuéra oipotágui.
8Upéramo Israel rembyre oikóta heta tetã apytépe ha ojoguáta leõme, mymba saite apytépe ha peteĩ leõ ra’yrusu oiko háicha ovecha atýra apytépe, oikéva ijapytépe ha ojeitýva hi’ári ojuka hag̃ua, ha ndaiporimo’ãi okañýva ichugui.
9Nde, ore Jára, emopu’ã nde po rehundipa hag̃ua umi nderehe oñemoĩva’ekuépe.
10Ojehúta upe ára upévape, he’i pende Ruete: Ajukáta nde kavajukuéra ha ambyaiukáta nde carrokuéra.
11Ha ambyaiukáta avei nde tavakuéra ha aitýta nde róga oñemombaretepyréva.
12Upéichante Che ambyaipáta avei opaite paje ojejapova’ekue ha nde pópe oĩva gueteri, ha ahundipáta umi paje apohárape oĩva guive upépe.
13Ha ahundíta avei nde jára ita ra’ãnga oĩva pende apytépe, ha nereñesũmo’ãvéima nde po rembiapokue renondépe.
14Aitýta nde apytégui Asera ra’ãngakuéra, ha ambyaipáta ambue nde jára gua’u ra’ãnga.
15Che py’aro ha che pochýpe ahaviráta umi tetã iñe’ẽrenduse’ỹvape.
Who We AreWhat We EelieveWhat We Do
2025 by iamachristian.org,Inc All rights reserved.
