Deuteronómio 14 - Biblia en Guaraní - ?anderuete ?e’? Por? 2015

1Peẽ ningo Jahve, pende Ruete ra’ykuéra: Napeñekytĩriva’erã ha napeñemoakãperõiva’erã omanómava’ekue rehe.

2Peẽ ningo tetã oñemboykéva Jahve, pende Ruetépe g̃uarã, ha Ha’e pendeporavóma peiko hag̃ua imba’etee ramo mayma tetãnguéra apytépe oĩva guive ko yvy apére.

Tymbakuéra ipotĩva ha ipotĩ’ỹva

3Anítei pe’u tymba ro’o ipotĩ’ỹva.

4Ko’ãva hína umi tymba ikatúva pe’u: Vaka, ovecha, kavara,

5guasu, kavara saite, tóro saite, antílope (ojogua guasúpe) ha ovecha saite.

6Opaichagua tymba ipysãpẽ pa’ũva ha oñamindu’úva guive ikatu pe’u.

7Ndape’uiva’erã katu ko’ãva: Umi oñamindu’úvante térã umi ipysãpẽ pa’ũvante: Caméllo, akuti ha tapiti; oñamindu’u hikuái, naipysãpẽ pa’ũi katu, upévare peteĩ tymba ipotĩ’ỹva;

8ha avei pe kure, ipysãpẽ pa’ũ, noñamindu’úi katu, upévagui peteĩ tymba ipotĩ’ỹva peẽme g̃uarã. Ko’ã tymba ro’okue ndape’uiva’erã, ha ndapepokoiva’erã avei he’õngue rehe.

9Mayma mymba y pegua pe’ukuaa oguerekóva guive ipepo’i ha ipire pirapiréicha (monédaicha).

10Ha umi ipepo’i’ỹva ha ipire ndaipirapiréicha ndape’uiva’erã; naipotĩrigui peẽme g̃uarã.

11Mayma guyra ipotĩva guive pe’ukuaa.

12Ãva katu ani pe’útei: Pe ñapykani (guyra ituichavéva taguatoguasúgui), ñapykani cérro rupigua, pe ñapykani para,

13karakara ha opaichagua taguato ojoguáva ichupe,

14opaichagua yryvukuéra,

15ñanduguasu, urukure’a, taguato hovy y pegua (gavióta) ha opaichagua guyra ojoguáva ichupe,

16ñakurutũ, karáũ, guyratĩ,

17tukã y pegua, tuju juti, pe karáũ joguaha,

18tujuju, mbigua, ypekũ ha mbopi,

19opaichagua mymba’i (bicho’i) ipepóva iky’a, umía ndape’uiva’erã.

20Mayma guyra ipotĩva guive pe’ukuaa.

21Mba’eveichagua mymba omano reiva’ekue katu ndape’uiva’erã, ikatu peme’ẽ tetã ambueyguápe oikóva pende apytépe, ha’e ho’ukuaa; peme’ẽkuaa avei pirapire rehe tetã ambueyguápe; Che ha’éma, peẽ ningo peteĩ tetã oñemboykéva Jahve, pende Ruetépe g̃uarã. Napemomimõiriva’erã pe kavarara’y isy kambykuépe.

Tembiapoukapydiézmo

reheguáva

22Katuete peme’ẽva’erã pe diézmo pende kokue peguágui meme áñope.

23Ha pe’uva’erã Jahve, pende Jára renondépe, pe yvy pehẽngue Ha’e oiporavotahápe, upépe oñemopu’ãta hóga jojohuha ha upépe pegueruva’erã pende diézmo pende kóga akuéragui, pene víno ha pende acéitegui, pene rymba ypykue pene rymba atýgui, pekyhyjekuaa hag̃ua pende Ruete, pende Járagui opaite árape.

24Ha pe tape oime ramo ipukueterei ha ndaikatumo’ãi pegueraha pe diézmo pende Ruete nepytyvõ porãgui, imombyryetégui pendehegui pe yvy pehẽngue Jahve, pende Jára, oiporavotahápe omopu’ã hag̃ua hóga jojohuha,

25upéicha ramo pevende pe diézmo ha peñongatuva’erã pe pirapire pegueraha hag̃ua pe yvy pehẽngue Jahve, pende Jára oiporavotahápe.

26Ha upépe rejoguáta umi mba’e peme’ẽséva: Vakakuéra, ovechakuéra, víno, víno hyjúiva, térã oimeraẽ mba’e peme’ẽséva; ha upépe pende Ruete renondépe pe’úta, pevy’a hag̃ua pende rogayguakuéra ndive.

27Ha peipytyvõva’erã Leviguakuérape, oikóva pende apytépe; ha’ekuéra ndoguerekóigui yvy imba’e teéva peẽ peguereko háicha,

28upévagui meme áño mbohapyha pembyatyva’erã pende diézmo opaite ñemitỹngue heñoiva’ekue peẽme pe áño pévape, ha peñongatuva’erã pende távape Leviguakuérape g̃uarã.

29Ha ou vove Levigua, oguereko’ỹva ijyvytee, térã pe tetã ambueygua, térã pe ityre’ỹva térã pe imenave’ỹva oikóva pende apytépe peme’ẽva’erã ichupekuéra hyg̃uatã meve; Jahve, pende Jára penepytyvõ hag̃ua opaite pende po rembiapópe.