Salmokuéra 46 - Biblia en Guaraní - ?anderuete ?e’? Por? 2015

Ñanderuete ñanemo’ã ha ñanemombarete - Core ra’ykuéra purahéi ojepurahéi imimbýpe

1Ñanderuete ñanemo’ã ha ñanemombaretéta jajejopy vai jave,

2upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe.

3Jepémo okororõ ha omymýi vaipa hi’y ha ipochyetereígui omboryryipa umi cérro. Selah

4Pe y osyrýva ombohory Ñanderuete táva, ko tenda iporãite, pe Ijyvatetéva oikohápe.

5Ñanderuete oikógui ipype ndoku’emo’ãi. Ñanderuete oipytyvõtagui ichupe ko’ẽtĩ jave.

6Umi tetã osapukái pochypópe ha umi tetã ruvicha pu’aka oñemongu’epa, Ha’e oñe’ẽ arasunu rupi ha ko yvy tuichakue oku’epa.

7Ñanderuete, yvága aty Jára oĩ ñanendive, Jacóbo Jára voi ningo ñane mo’ãhára. Selah

8Pejúke ha pehecha Ñanderuete rembiapokue, Ha’e ningo ombotaperepa ko yvy.

9Ojoko opaichagua ñorãirõguasu opa rupiete oikóva ko yvy apére. Omopẽmba guyrapa, ha yvyra puku akua ha tatápe ohapypa icarrokuéra.

10Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

11Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah