Juéces 6 - Biblia en Guaraní - ?anderuete ?e’? Por? 2015

Ñanderuete ohenói Gedeónpe

1Israel ñemoñarenguéra ojapo ivaíva Ñanderuete resa renondépe; ha Ñanderuete omoĩ ichupekuéra Madiayguakuéra poguýpe 7 áño pukukue.

2Ha Madian retãygua ipu’aka Israel rehe. Ha Israel ñemoñarenguéra okyhyjégui Madiayguakuéragui okañy cérrore oiko hag̃ua itakua ha yvykuaguasúpe.

3Ha Israelguakuéra oñemitỹ rire ou jepi hi’arikuéra umi Madiaygua, Amalecgua ha umi kuarahyresẽ gotyogua ñemoñarenguéra ombyai hag̃ua ikokue rembiapokuéra.

4Ha’ekuéra ou oñorãirõ ha ohundipa hag̃ua ikóga’a, og̃uahẽ meve Gázape; ha ndohejái hikuái Israélpe g̃uarã: Tembi’u, ovecha, guéi ni burrokuéra.

5Ou hikuái hymba atyguasu ha hóga hymba pirekueguigua reheve, ku tuku atýicha og̃uahẽ hikuái; ha’ekuéra ha icamellokuéra hetaitereígui ndaikatúi ojepapa; péicha ou hikuái omoperõ hag̃ua Israel yvy.

6Péicha Israelguakuéra imboriahuve ohóvo Madiayguakuéra rembiapo vaikuéra rupi; upévare Israel ñemoñarenguéra omba’ejerure asy Ñanderuetépe.

7Ha Israel ñemoñarenguéra omba’ejerure asýma ramo Ñanderuetépe, umi Madiaygua po ipohyietereígui hi’arikuéra,

8Ñanderuete ombou Israel ñemoñarenguérape peteĩ proféta, ha péva he’i ichupekuéra: Péicha he’i Ñanderuete, Israel Jára: Che poguenohẽukava’ekue Egíptogui, ha poguenohẽ pe tembiguái rekógui.

9Che poguenohẽ Egiptoyguakuéra pógui, ha mayma pendepy’apy asýva pógui, ha umívape amosẽva’ekue pene renonderãgui, ha ame’ẽva’ekue peẽme ijyvykuéra;

10ha ha’ékuri peẽme: Che, pende Ruete, pende Jaraite, ani pekyhyjétei Amorguakuéra járagui, ijyvýpe peiko peína ko’ág̃a, napeneñe’ẽrendúi katu pepoi chehegui.

11Ha ou Ñanderuete yvága rembiguái, ha oguapy pe encína yvyrarakã Ofra pegua guýpe, péva Joas, pe Abiezergua mba’e; ita’ýra Gedeon ohekýi jave trígo, iparral’a ojehykue’ohápe, omokañy hag̃ua umi Madiayguágui.

12Ha Ñanderuete yvága rembiguái ojehechauka, ha he’i ichupe: Ñanderuete oĩ nendive, kuimba’e mbarete ha ipy’aguasúva.

13Ha Gedeon he’i ichupe: Che Jára, ore Ruete reime ramo orendive, mba’érehepa ojehu oréve ko’ã mba’e, ha mamóiko oime mayma hembiapo techapyrãva, ore rukuéra omombe’úva jepi oréve, he’ívo: Naorerenohẽipa ra’e ore Ruete Egíptogui. Ha ág̃a ore Ruete oremotyre’ỹ, ha oremoĩ Madiayguakuéra poguýpe.

14Ha Ñanderuete oma’ẽvo hese he’i ichupe: Tereho ko mbarete reguerekóva reheve, reipe’a hag̃ua Israélpe Madiayguakuéra poguýgui, Che romondotahína.

15Upéramo Gedeon he’i jevy ichupe: Che Jára, mba’éichapa che aipe’áta Israélpe, péina ápe che rogaygua umi imboriahuvéva Manases apytépe, ha che ningo pe imitãvéva che ru rógape.

16Ñanderuete he’i ichupe: Añetehápe Che aĩta nendive, ha sarambi rejapóta Madiayguakuéragui ku peteĩ kuimba’e ha’eño rehe reñemoĩ ramoguáicha.

17Ha ha’e he’i jevy: Che ajerure ndéve oime ramo ajohu py’aporã ne renondépe, eme’ẽ chéve techaukaha nde reñe’ẽ hague ko’ã mba’ére chéve.

18Ajerure ndéve ani hag̃ua reho ko’águi aju jevy peve ne rendápe, ha aguenohẽ meve che kuave’ẽmby ha amoĩ ne renondépe. Ha ha’e he’i ichupe: Che aha’ãrõta reju jevy peve.

19Ha Gedeon oho ombosako’i hag̃ua peteĩ kavarara’y, ha pan ojejapóva 22 lítro trígo ku’ígui levadura’ỹre, ha omoĩ so’o peteĩ ajaka’ípe ha pe so’o rykuere peteĩ japepópe (óllape) ha oguerahapa henondépe pe encína (yvyra) rakã guýpe, ha’e ho’u hag̃ua.

20Upéramo pe yvága rembiguái he’i ichupe: Emoĩ pe so’o ha umi pan ojejapóva levadura’ỹre pe itaguasu ári, ha eñohẽ pe so’o rykuere hi’ári, ha Gedeon ojapopa rire,

21pe yvága rembiguái oipyso pe yvyra po’i oguerekóva ipópe, omboja peve ijapýra pe so’o ha pan rehe, ha pe itaguasúgui osẽ tata ha ombokusugue pe so’o ha umi pan ojejapóva levadura’ỹre. Upéi pe yvága rembiguái ojei hesa renondégui.

22Upépe ae Gedeon ohechakuaa péva peteĩ yvága rembiguái hague, ha he’i: Ore Ruete, che Jára, yvága rembiguái rovaiteére ningo ama’ẽ.

23Ha Ñanderuete he’i ichupe: Eñembopy’aguapy, ani rekyhyjétei, neremanomo’ãi.

24Ha Gedeon omopu’ã upépe peteĩ kuave’ẽmby renda Ñanderuetépe g̃uarã, ha ombohéra pe kuave’ẽmby renda: “Ñande Ruete ningo py’aguapy”, ha péva oĩ gueteri ko ára peve Ofrápe, Abiezerguakuéra yvýpe.

25Ha ojehu pe pyhare pévape Ñanderuete he’i ichupe: Ejapyhy nde ru rymba apytégui peteĩ tóro ra’yrusu, ha ambue tóro oguerekóva 7 áño, ha eity pe Baal kuave’ẽmby renda nde ru mba’éva, ha eikytĩ avei Asera ra’ãnga oĩva ijypýpe;

26ha emopu’ã nde Ruete, nde Járape g̃uarã peteĩ kuave’ẽmby renda ko itaguasu ári opyta porã hag̃uáme; ha eikuave’ẽ pe tóro mokõiha, kuave’ẽmby ojehapypáva ramo, ha Asera ra’ãnga reikytĩva’ekue, ha eiporu jepe’a ramo.

27Upéramo Gedeon oiporavo 10 kuimba’épe hembiguaikuéra apytégui, ha ojapopa Ñanderuete he’i haguéicha ichupe. Ha okyhyjégui hikuái itúva rogayguakuéragui ha umi kuimba’e táva peguágui, ojapopa pyharekuépe.

28Pyharevépe umi tavaygua opu’ãvo ohecha Baal kuave’ẽmby renda ho’apa ha Asera ra’ãnga oĩva ijypýpe oñekytĩmba, ha avei pe tóro mokõiha oñekuave’ẽmbamara’e kuave’ẽ ojehapypáva ramo pe kuave’ẽmby renda oñemopu’ãva’ekue ári.

29Ha he’i ojupe hikuái: Mávapa ojapora’e ko’ã mba’e. Ha oheka ha oporandu randúpe hikuái, oje’e ichupekuéra: Gedeon, Joas ra’y, péicha ojapo. Upéramo umi tavaygua kuimba’e he’i Joáspe:

30Eguenohẽ nde ra’ýpe ore rojuka hag̃ua, oitypágui Baal kuave’ẽmby renda ha oikytĩmbágui Asera ra’ãnga oĩva’ekue ijypýpe.

31Ha Joas ombohovái mayma ijypýpe oĩvape ha he’i: Peñorãirõtapa peẽ Baal rehe, peikótapa Baal mo’ãha ramo. Oimeraẽ oñorãirõva Baal rehehápe tomano ko pyharevépe. Oime ramo ha’e peteĩ jára añeteguáva, ha’e voi toñorãirõ ikuave’ẽmby renda reityhára ndive.

32Upe ára guive Gedeon ombohéra Jerobaal, péva he’ise: Toñorãirõ Baal hendive, ha’e oity haguére ikuave’ẽmby renda.

33Upejave opaite Madiaygua, umi Amalecgua ha kuarahyresẽ gotyoguakuéra oñembyaty peteĩ aty ndetuichaitévape, ha ohasa pe ysyry Jordan opyta hag̃ua Jizreel yvypépe.

34Ha Ñanderuete Pytu Porãitéva ou Gedeon ári, ha ha’e ombopúvo pe turu, Abiezerguakuéra oñembyatypa hendive.

35Ha omondo ñe’ẽrerahahára Manases yvy tuichakue rupi, ha’ekuéra oñembyatypa hag̃ua avei hendive; upéicha omondo avei ñe’ẽrerahahára Aser, Zabulon ha Neftali tribukuérape, ha umía ou avei oñemoirũ hag̃ua hendive.

36Ha Gedeon he’i Ñanderuetépe: Oime ramo resalvase Israélpe che po rupi, Nde ere haguéicha,

37eme’ẽna chéve peteĩ techaukaha, péina ápe, che amoĩta peteĩ ovecha pirekue rague pukúva ñemitỹ ra’ỹi ojejykyihápe, ha pe ysapy opyta ramo pe ovecha pire rague puku año rehénte, ha pe yvy ijerekuévo ikãmba ramo, péicha aikuaáta resalvaseha Israélpe che po rupi, Nde ere haguéicha.

38Ha péicha ojehu ha’e opu’ãvo pyhareve, ojopy pe ovecha pire rague pukúva ha og̃uenohẽ ichugui pe ysapy, ha omyenyhẽ peteĩ ña’ẽmbe pe ysapy ýgui.

39Gedeon katu he’i jevy Ñanderuetépe: Ani ndepochy chendive ajerure jevy rehe ndéve. Ajerure ndéve pe ovecha pire rague pukúvante ta’ikã ha pe ysapy tomyakỹ pe yvy apénte.

40Ha peichaite Ñanderuete ojapo pe pyharépe; pe ovecha pire rague pukúva añónte ikã porã, ha pe yvy ovecha pirekue jerekuévo katu he’õmbaite.