1Marandu Egípto rehe. Pema’ẽ porãkena, Ñanderuete ou peteĩ arai ipya’évape ha oikéta Egíptope, upérõ ijára gua’u oryryipáta ha umi Egiptoygua ipy’amanombáta.
2Amopu’ãmbáta Egiptoyguakuérape ojuehe, ha peteĩteĩva oñorãirõta ipehẽngue ndive; peteĩteĩva hapicha ndive, peteĩ táva ambue táva ndive, ha peteĩ tetã ambue tetã ndive.
3Ha umi Egíptoygua ipy’aguasúva ogueve ohóvo ha iñakã porãva opa reíta ha oñembotavy hag̃ua omba’eporandúta ijára gua’úpe, ipaje apohakuérape, ita’ývõhárape (imba’ekuaávape) ha umi ohenóiva omanóva anguépe.
4Ha amoĩta Egiptoyguakuérape peteĩ jára ñarõ poguýpe, ha hetã ruvicha ojopyetéta ichupekuéra, he’i yvága atykuéra Jára.
5Ha pe yguasu ikãta ha pe Nílo hypáta.
6Ha umi ysyry inembáta, hypáta umi Egípto pegua ysyry, papiroty ha pirity ipirupáta.
7Umi ñu porã ysyry rembe’y pegua ha opaichagua ñemitỹngue ipirupa ha oñehundipáta.
8Umi pira renohẽhára ipyahẽmba, ha oñembyasyetéta opaite omombóva guive ipinda ysyrýpe, ha ipy’a kangýta umi oipysóva ired yguasúpe.
9Umi omba’apóva ka’avo inimbo porã (líno) rehe ha umi oipyaháva ao mandyjúgui hesa’yjupáta.
10Upéicha oñehundíta mburuvichakuéra ha opaichagua mba’apohára.
11Añetehápe itavy ningo umi Zoan pegua mburuvicha; umi faraon ohekombo’éva oñembotavypa hikuái. Mba’éichapa pejéta faraónpe: Ore ningo umi iñarandúva ra’yre, ha umi tetã ruvicha ymaguare ñemoñarenguéra.
12Moõ piko oimemba nde karai arandukuéra, tomombe’u faraónpe umi mba’e yvága atykuéra Jára ojapotavahína Egípto rehe.
13Itavypa umi Zoan pegua mburuvicha, ha oñembotavypa umi mburuvicha Menfis pegua; ipa’ikuéra ogueraha Egiptoyguakuérape tape vai rehe.
14Ñanderuete omyangekõi Egiptoyguakuérape ojavy hag̃ua opaite hembiapópe ku oka’úva ovava háicha ig̃ue’ẽngue (ivomitokue) ári.
15Mba’eve ndou porãmo’ãvéi Egíptoyguakuérape g̃uarã, taha’e akã térã tuguái, yvyra rakã térã ysypo, mburuvicha térã tembiguaikuéra.
16Upe ára upévape umi kuimba’e Egiptoygua ojoguáta kuñáme; oñemondyipáta ha oryryipáta hikuái Ñanderuete omopu’ã jave ipo henondepekuéra.
17Ha Juda retã omongyhyjéta Egíptope; mayma kuimba’e okyhyjéta Judayguágui, yvága atykuéra Járagui ha umi mba’égui Ha’e ojapotavahína Egípto retã rehe.
18Upe ára upévape oĩta Egípto retãme 5 táva oñe’ẽva Israelgua ñe’ẽme, ha ojeroviáta Ñanderuete rehe, peteĩ oñembohéra Ir-Heres (he’ise) kuarahy táva.
19Upe ára upévape oĩta Egípto retã mbytépe kuave’ẽmby renda Ñanderuetépe g̃uarã, ha oñemopu’ãta ita atyraguasu hetã rembe’ýpe oñemomandu’a hag̃ua Ñanderuete rehe.
20Ha Egípto retãme oikóta peteĩ techaukaha, yvága atykuéra Járape g̃uarã; omba’ejerure asýta hikuái Ñanderuetépe ijopyharakuéra rehe, ha Ha’e omondóta hendápe peteĩ osalvátava ichupekuéra, ha ko mburuvicha oguenohẽta ichupekuéra ijejopy vaígui.
21Upéicha Ñanderuete ojehechaukáta Egípto retãme, ha upe ára upévape umi Egíptoygua oikuaáta ichupe, ha oikuave’ẽta hikuái ichupe g̃uarã kuave’ẽmby jukapyre ha tembi’u reheguáva; ha ome’ẽta iñe’ẽ (ipromésa) Ñanderuetépe ha katuete ojapopava’erã, Ha’e he’íva guive ichupekuéra.
22Ñanderuete oinupãta Egíptope; ha Ha’e omonguera rire ichupekuéra, oñembo’éta ha ojeroviáta hikuái avei Ñanderuete rehe.
23Upe ára upévape oĩta peteĩ tape ipéva Egípto guive Asíria peve, ha umi Asiriaygua oike joáta Egíptope, ha Egiptoyguakuéra oike joáta Asíriape; umi Egiptoygua ojeroviáta Asiriayguakuéra ndive Ñanderuete rehe.
24Upe ára upévape Israel oñembopy’apeteĩta Egípto ha Asíria ndive ha ko’ã mbohapy tetã rupi ojehovasáta opaite yvy tuichakue.
25Yvága atykuéra Jára, ohovasáta ichupekuéra, he’ívo: Tojehovasa Egípto, che retã, Asíria, che rembiapokue, ha Israel, che mba’itéva.
Who We AreWhat We EelieveWhat We Do
2025 by iamachristian.org,Inc All rights reserved.
