Jeremías 20 - Biblia en Guaraní - ?anderuete ?e’? Por? 2015

Pe pa’i Pasur oinupã Jeremíaspe, ha Jeremías ñembohovái

1Ha pe pa’i Pasur, Imer ra’y, omyakã umi oñangarekóva Ñanderuete rogaguasu rehe, ohendu vove Jeremías profecía (marandu),

2oinupã ichupe ha omoinge ichupe cárcelpe ha ipykuéra yvyrakuápe, oĩvahína Benjamin rokẽ tuichávape, Ñanderuete rogaguasu ojeikehápe.

3Ha ambue árape Pasur oguenohẽ Jeremíaspe cárcelgui. Ha upevove Jeremías he’i Pasúrpe: Ñanderuete nanerenoivéima Pasur, he’iséva oporombovy’áva; nderérata uvei Magor-misabib, he’iséva pe oporomondýiva.

4Péicha he’ígui Ñanderuete: Eikuaa porãke, ajapótava nde voi rekyhyjéta ndejehegui ha remondýita ne irũnguérape, ha ha’ekuéra ho’apava’erã penderehe ija’e’ỹva kyse puku rupi, ha nde resa ohechapáta ko’ã mba’e, ha Juda retã tuichakue amoĩmbáta Babilónia retã ruvicha poguýpe, ha ogueraháta ichupekuéra jepokuapýpe Babilóniape, térã ha’e ojukáta ichupekuéra kyse pukúpe.

5Ichupekuéra ame’ẽmbáta avei ko táva pegua mba’erepyeta, hembiapo repykue ha opaite mba’e iporãva; ame’ẽmbáta avei umi Juda retã ruvicha mba’erepyeta penderehe ija’e’ỹvape, ha omondapáta hikuái ojohúva guive ogueraha hag̃ua Babilóniape.

6Ha nde, Pasur, ha mayma nde rógape oikóva guive pehopáta jepokuapýpe Babilóniape, ha upépe remanóta, ha upépe reñeñotỹta nde ha mayma ne irũnguéra, nde reporombotavy haguére ne marandu japu rupi.

Jeremías jahe’o

7Che Ruete, Nde chembotavy, Nde nembareteve chehegui, ha ndepu’aka cherehe; tapia ojepuka cherehe ha oimeraẽva oñembohory cherehe.

8Añe’ẽ jave, amoherakuãnte ñorãirõ ha ñehundirãnte. Ne ñe’ẽ oikohína chéve g̃uarã ñemotĩ ha ñembohory ramo,

9upévare ha’éma: Nachemandu’avéima nderehe ni nañe’ẽvéima nde rérape; ha upéicharamo jepe, ha’eténte oĩva che py’apýpe peteĩ tata rendýicha che kanguekuápe; añeha’ãmba aguerokirirĩ hag̃ua ha ndaikatúi.

10Ahendu heta ñe’ẽ guata, opa rupi oĩ kyhyje: Jagueraha ichupe oñembojovake hag̃ua. Mayma che angirũnguéra (amigokuéra) jepe oma’ẽ joa cherehe jahechapa nañepysãngái. Ikatúnte oñembotavyuka, he’i hikuái, ñandepu’akáta hese, ha ñamyengoviapáta ichupe.

11Ñanderuete katu oĩ chendive ku kuimba’e py’aguasuetéicha; upévagui umi chemuñáva oñepysãngapáta, ha ndapu’akamo’ãi cherehe, ha’ekuéra tuicha oñemotĩta, opaite mba’e ojaposéva guive osẽ vaíta, itĩndýta opytávo, ndohupitýigui umi mba’e oha’ãrõitéva ha araka’eve ndahesaraimo’ãi iñemotĩgui.

12Nde, che Ruete, Yvága Atykuéra Jára, rembojovakéva hekoitépe ha rehechapáva yvyarigua py’apýpe jepeve opensáva, oñandúva ha ojaposéva guive, ahecha nga’úra’e mba’echaitépa Nde rembuepotíta hembiapo vai, nde pópe amoĩ che rekove.

13Pegueropurahéi Ñanderuetépe, pemomba’eguasu ichupe, oguenohẽva pe mboriahu rekove iñañáva poguýgui.

14 Toñemaldeci pe ára aju hague ko yvy apére; pe ára che sy chegueru ramoguare ko yvy apére anítei ojehovasa.

15 Toñemaldeci pe kuimba’e omba’emombe’uva’ekue che rúpe, he’ívo: Ta’ýra onace ndéve, ombovy’a hag̃ua ichupe.

16Ha pe kuimba’e péva toiko umi táva Ñanderuete ombotapereva’ekuéicha, oiporiahuvereko’ỹre; ha tohendu umi osapukái asýva, pyharevete ha asajekue ojahe’óva.

17Ñanderuete chejuka nga’úra’e che sy ryépe, ha che sy oikova’erãmo’ã chéve che tyvy ramo, ha upéicha ha’e hyeguasu tapiaiteva’erãmo’ã.

18Mba’upéiko asẽra’e che sy ryégui, ahecha hag̃uánte ñembyasy, py’angekõi ha che arakuéra ogue hag̃ua ohóvo ñemotĩme.