Salmokuéra 42 - Biblia en Guaraní - ?anderuete ?e’? Por? 2015

Che ánga ijy’uhéi Ñanderuete rehe - Masquil, Core ra’y purahéi

1Pe guasu hasẽrõ guáicha y osyrýva rehe, péicha che ánga ijy’uhéi nderehe, che Ruete.

2Che ánga ijy’uhéi Ñanderuete rehe, Ñanderuete oikovéva rehe. Araka’épa ag̃uahẽne hendápe che ahecha hag̃ua hova.

3Ára ha pyhare pukukue tesay che rembi’u, ha upejave oñeporandu chéve: Moõ piko oime nde Jára.

4Chemandu’a porã umi arete ohasava’ekue rehe, mba’éichapa che amyakã pe tetãygua atyguasu ha agueraha ichupekuéra Ñanderuete rogaguasúpe ñamomba’eguasu joa hag̃ua vy’apópe ichupe.

5Mba’érehepa nde che ánga nekangy, ha neangekõi chepype. Ejerovia Ñanderuete rehe, ha emomba’eguasu jevy che pytyvõhára ha che Jarateépe.

6Che Jára, che ajepy’apyeterei ha ndachepy’aguapyvéi, upévarehe chemandu’a nderehe ko ysyry Jordan yvy guive, Hermon ha Misar cérro peve.

7Pe yguasu ohenói yguasu ambuépe nde ytu osununu iñe’ẽpu rupi, pe y pochyete oñemopu’ã yvate ohasa hag̃ua cheári.

8Arakuépe chepyahẽ’aína, Ñanderuete tacheporiahuvereko, ha pyharekuépe ipurahéi oĩ che jurúpe, peteĩ ñembo’e che rekove Járape g̃uarã.

9Ha’éta che Ruetépe: Nde che itaguasu (Salvador), mba’érehe piko nderesarái chehegui. Mba’érehe piko che aikova’erã ao vosa reheve chejopy asýgui umi cherehe ija’e’ỹva.

10Cherayhu’ỹva ñembohory omongu’írõ guáicha che kanguekuérape, umi cherehe ija’e’ỹva oñemoĩ cherehe ha oporandu hikuái ko’ẽ ko’ẽ rehe: Moõ piko oime nde Jára.

11Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.