Isaías 45 - Biblia en Guaraní - ?anderuete ?e’? Por? 2015

Ñanderuete ome’ẽ Círope hembiaporã

1Péicha Ñanderuete he’i Círo, hembiporavo rehe: Che rojapyhy nde po akatúagui, nde rembopoguy hag̃ua opaite tetãnguéra oñemoĩvape nderehe ha rejora hag̃ua tetã ruvichakuéra ku’ajokuaha, ha ojepe’a hag̃ua ne renondépe táva rokẽnguéra ha avave nombotymo’ãi.

2Che aháta ne renonderãme ambojoja hag̃ua umi tape ojoja’ỹva, ajoka hag̃ua umi okẽ bronceguiguáva, ha amopẽ hag̃ua iñembotyha hierroguiguáva;

3ha Che ame’ẽta ndéve imba’erepyeta, ñemiháme oñeñongatu porãva, reikuaa porã hag̃ua Che ha’eha pende Ruete, Israel Jára, rohenói hague nde réra rupi.

4Che rembiguái Jacóbo rayhupápe, Israel che rembiporavo rehehápe, rohenói nde réra rupi ha ame’ẽ ndéve che réra, nde ndachekuaái ramojepe.

5Che ha’e pende Jára, che ykére ndaiporivéima ambue, Che romopu’ã ramojepe nde ndachekuaái; ndaipóri ambue Jára ndachéi ramo.

6Ojekuaa porã, kuarahyresẽ guive kuarahyreike peve, ndaiporiha ambue Jára, Chémante, pende Ruete, ha ndaipóri avave che ykére araka’eve,

7Che amyesakã ha amoypytũ, Che ambopy’aguapy ha amyangekõi. Che, pende Ruete, ajapopa ko’ã mba’e.

Ñanderuete opaite mba’e apohare

8Yvága yvate guive ambohypyipa ha amondyky justícia araígui; pe yvy tojejurupe’a ha taheñói oñondive py’aguapy ha justícia añeteguáva, Che voi ningo pende Ruete opaite mba’e apohare.

9Angái, angái, upe oñe’ẽ’apíva Ijapoharépe, ñande yvyarigua jaiko kambuchi jekakuéicha, ambue kambuchi jekakue apytépe. He’ínepa ñay’ũ hese omba’apóvape: Mba’éiko rejaporeína, térã hembiapokue he’ínepa ijapoharépe: Ne rembiapo naiporãi.

10Angái, angái upe he’íva itúvape: Mba’upe piko reñembota’ýrara’e. Ha isýpe he’i: Mba’upe piko nemembýra’e.

11Péicha he’i pende Ruete, Israel Jára, pende Apohare: Peporandu chéve umi mba’e ojehútava rehe, che ra’ykuéra ha che rembiapo peheja che pópe.

12Che ajapo ko yvy, ha amoĩ ypyva’ekue hi’ári kuimba’e ha kuñáme. Che pokuéra omyasãiva’ekue umi yvága, ha amohenda mbyja atykuéra hendaitépe.

13Che voi ahenói Círope ojapo hag̃ua che rembipota, Che voi ambosako’i haperã, ha’e voi omopu’ã jevýta che táva, ha’e opoiuka jevýta che retãyguakuérape ojeguerahava’ekue jepokuapýpe pirapire ha jopoi’ỹre, he’i yvága atykuéra Jára.

14Péicha he’i pende Ruete: Egípto pirapire, Etiopía mba’erepyeta ha umi Sabaygua kuimba’ekuéra ijyvatetéva oupáta ne rendápe ha oikóta hikuái ne mba’etee ramo; oguatáta hikuái nde rapykuéri, cadéna hierroguigua reheve oupáta; oñakãitypáta ne renondépe ha omba’ejerure asýta ndéve ha he’íta: Añetehápe penendive oĩ yvága Jára ha ndaipóri ambue Jára, pende Ruetémante.

15Añetehápe Nde voi ha’e avei ore Ruete ojehechauka’ỹva, Israel Jára oporosalváva.

16Umi jára ra’ãnga apohare oñemotĩmbáta ha oñehundíta.

17Ñanderuete katu oguenohẽta Israel ijejopy vaietégui ha araka’evéma noñemotĩmo’ãvéi avei.

18Péicha he’i pende Ruete, yvága apohare: Che ningo pende Ruete, ha ndaipóri ambue, Che ajapomava’ekue ko yvy ha amoĩ porãmbava’ekue ojeiko porã hag̃ua ipype ha ndajapói yvy perõ.

19Nañe’ẽi ñemiháme, térã iñypytũveha rupi; nda’éi Jacóbo ñemoñarenguérape: Peẽ chereka reiha. Che, pende Ruete, Che ningo heko peguávante, ha amombe’únte pe añetegua.

Ñanderuete ha umi Babilónia pegua jára gua’u

20Peñembyaty ha peju; peñembojapa che rendápe peẽ pekañyva’ekue tetãnguéra apytégui; naiñakã porãietégui umi ogueraháva ijára yvyraguiguáva ha omba’ejeruréva ijára gua’úpe ndohupitymo’ãigui ñepytyvõ añeteguáva avavégui.

21Peñemboja pemombe’u ha peñemongeta oñondive mávapa omombe’u raẽ ko’ã mba’e ko’ãva oiko mboyve; Chénte, pende Ruete, poikuaaukapáma voi, che ykére ndaiporivéima ambue Jára; Che ykére ndaipóri ambue jára hekojojáva ha oporopytyvõkuaáva añetehápe.

22Pejerovia cherehe, Chénte posalvakuaa, Che voi ningo pende Ruete, ha che ykére ndaipóri ambue Jára.

23Chejehénte añe’ẽme’ẽkuaa, che jurúgui osẽ ñe’ẽ hekoite peguáva ha ndopa reimo’ãi araka’eve; Che renondépe oñesũta opaite yvyariguakuéra ha mayma juru chemomba’eguasúta.

24Ha oje’éta cherehe: Añetehápe, ore Ruete ndive oĩ justícia ha pu’aka; umi oñemoĩmava’ekue hese oupa jevyva’erã tĩndyhápe henondépe, oñemotĩetégui.

25Ñanderuete rupínte ojejohukuaa justícia (tekojoja) ha opaite Israel ñemoñare omomba’eguasúta Ñanderuete rembiapo porãita.