Números 30 - Biblia en Guaraní - ?anderuete ?e’? Por? 2015

1Ha Moises he’i Israelguakuérape opaite mba’e Ñanderuete he’i haguéicha ichupe ojejapo hag̃ua.

Tembiapoukapy ñe’ẽme’ẽ (promésa

) reheguáva

2Moises oñe’ẽ Israel tríbu ruvichakuérape, ha he’i: Ko’ã mba’e Ñanderuete he’iva’ekue ojejapo hag̃ua.

3Oimeraẽ kuña oñe’ẽme’ẽ (vóto, promésa) ramo Ñanderuetépe térã ome’ẽ ramo iñe’ẽ ha oñapytĩ hi’ánga iñe’ẽme’ẽ rehe, nopyrũiva’erã iñe’ẽngue rehe; ojapopava’erã uvei ijuru oprometéma haguéicha.

4Ha peteĩ kuñataĩ oñe’ẽme’ẽ Ñanderuetépe, ha’e oikove aja gueteri itúva rógape,

5ha itúva ohendu ramo iñe’ẽme’ẽ, ha okirirĩ ramo, itajýra oñe’ẽme’ẽ hague, upéicha pe kuñataĩ ojapopamanteva’erã hekoitépe pe mba’e oprometeva’ekue.

6Ha itúva ombotove ramo ichugui, ohenduha árape iñe’ẽme’ẽngue, ndojejopymo’ãi pe kuñataĩme ojapo hag̃ua; ha Ñanderuete operdonáta ichupe, itúva ombotove haguére ichugui.

7Ha peteĩ tembireko oñe’ẽme’ẽ ramo térã ijuru he’i ramo sapy’aite peteĩ ñe’ẽ oñapytĩva hi’ánga;

8ha iména ohendu ramo, ha ohendu rire okirirĩnte, upe kuña upéva ojapomanteva’erã iñe’ẽme’ẽ, oñapytĩgui hi’ánga iñe’ẽngue rupi.

9Ha iména ohendúvo ha ombotove, upéicharamo upe kuña natekotevẽi ojapo pe ñe’ẽ oprometeva’ekue; ha Ñanderuete operdonáta upe kuñáme.

10Ha ha’e oñe’ẽme’ẽ ramo iména omano rire térã iména opoi rire ichugui, ojapomanteva’erã, ha’e oñapytĩgui hi’ánga iñe’ẽ oprometeva’ekuére.

11Ha peteĩ tembireko ome’ẽ ramo iñe’ẽ iména rógape, oñapytĩ hi’ánga iñe’ẽ ome’ẽmava’ekue rupi,

12ha iména ohendúvo okirirĩnte ha nombotovéi, upéicharamo ha’e ojapomanteva’erã opaite mba’e oprometeva’ekue, oñapytĩgui hi’ánga iñe’ẽngue rupi.

13Ha iména ombotove ramo ichugui ohenduha árape, upéicharamo ha’e natekotevẽi ojapo umi mba’e oprometeva’ekue; iména ombotovégui ha Ñanderuete operdonáta ichupe.

14Opaichagua kuña ñe’ẽme’ẽ (vóto) térã juraménto, iména ikatu omoneĩ térã ikatu ombotove, (upérõ opa rei).

15Ha iména okirirĩ ramo ohenduha árape, upéicharamo ha’e omoneĩ ichupe opaite iñe’ẽme’ẽ.

16Ha ohendu are rire ombotove ramo ichugui, upéicharamo ha’e ogueraháta hembireko angaipa.

17Ko’ãva hína tembiapoukapy Ñanderuete he’iva’ekue Moiséspe ojejapo hag̃ua peteĩ tembireko térã kuñataĩ ome’ẽ ramo iñe’ẽ.