1 Samuel 9 - Biblia en Guaraní - ?anderuete ?e’? Por? 2015

Saul ojeporavo tetã ruvicha ramo

1Oikova’ekue peteĩ kuimba’e Benjamin tríbu reheguáva, kuimba’e ikatupyrýva, héra Cis, Abiel ra’y, kóva Zeror ra’yre, kóva Becorat ra’yre, kóva Afia ra’yre, kóva Benjamin ra’y ñemoñare peteĩva.

2Ha’e peteĩ ita’ýra, hérava Saul, mitãrusu iporãitéva. Israelgua ñemoñare apytépe ndaipóri iporãvéva ichugui; Saul peteĩ akã ijyvateve opaite hetãyguakuéragui.

3Peteĩ ára Cis, Saul rúgui okañymba ibúrro kuñakuéra. Upévagui Cis he’i ita’ýra Saúlpe: Eraha nendive peteĩ tembiguái ha tapeho peheka umi búrro kuña.

4Ha Saul ohasa Efrain cérro, ha upégui Salisa ñu rupi, ha ndojohúigui, ohasa Saalim ñu rupi, ndojohúi katu avei. Upéi ohasa Benjamin ñu rupi, ha ndojohúi avei.

5Oúma ramo Zuf ñúme Saul he’i hembiguái, oĩvape hendive: Jajevy jey, oiméne che ru ndojepy’apyvéima ibúrro kuñakuéra rehe, ko’ág̃a oiméne ñanderehéntema iñangekõi.

6Ha hembiguái he’i ichupe: Eikuaa porãke, ko táva kóvape oiko peteĩ Ñanderuete proféta, kuimba’e herakuã porãva; opaite ñe’ẽ he’íva guive ojehu katuete. Jahána hendápe, ikatu omyesakã porã ñandéve moõpa oĩ umi búrro kuña.

7Saul he’i jevy hembiguáipe: Jaha ramo mba’éiko jaraháta pe kuimba’épe. Ñande vosa pegua pan opáma, ha ndajarekói mba’eve ñame’ẽ hag̃ua Ñanderuete rembiguáipe. Mba’épa jajapóta.

8Upérõ pe tembiguái he’i Saúlpe: Péina ápe, areko che pópe 2,8 grámo óro morotĩ (pláta) kóva ame’ẽta Ñanderuete rembiguáipe omyesakã hag̃ua ñane raperã.

9Ymave guive oje’e Israélpe upe omba’eporandúva Ñanderuetépe péicha: Peju jaha techahára rendápe; ko’ág̃a katu ja’e proféta, omombe’u hag̃ua umi mba’e ojehútava, yma katu oñembohéra techahára.

10Upérõ Saul he’i hembiguáipe: Ere porã, jaha katu. Ha oho hikuái pe távape Ñanderuete rembiguái oĩháme.

11Ha ojupi ohóvo táva rape rehe, ohug̃uaitĩ hikuái umi ohóva y rekávo ha oporandu ichupekuéra he’ívo: Oĩpa ko’ápe pe techahára.

12Ha’ekuéra he’i jevy: Añete, pépe pene renonderãme oĩ, tapeho pya’e, ko árape ha’e oúma ko távape oikuave’ẽ hag̃ua tetãyguakuéra ndive pe yvy ijyvatevehápe.

13Pya’e peike pe távape ha pejohúta ichupe ojupi mboyve pe yvy ijyvatevehápe okaru hag̃ua; ko’ã tetãyguakuéra ndokarumo’ãi ha’e og̃uahẽ meve, ha’e ohovasa raẽva’erã pe kuave’ẽmby, uperire ae okarúta umi oñehenoiva’ekue pe karurãme. Pejupi katu, ha katuete pejohúta ichupe.

14Upérõ ha’ekuéra ojupi pe távape, ha og̃uahẽvo hikuái pe táva mbyte rupi, péina oñohug̃uatĩ Samuel ndive, ojupítava pe tape ijyvatevehápe.

15Peteĩ ára Saul ou mboyve, Ñanderuete voi omyesakãma Samuel apysaitépe, he’ívo:

16Ko’ẽramo ko horaitépe amboúta ne rendápe peteĩ kuimba’e Benjamingua ha nde remonáta (reiporavóta) ichupe Israel retã ruvicha ramo, ha he’ive avei: Saul oipe’áta che retãme Filisteayguakuéra poguýgui. Che ahecháma che retãme ha imba’e jerure asy og̃uahẽma che rendápe.

17Ha Samuel ohechávo Saúlpe, Ñanderuete he’i ichupe: Kóva ningo pe kuimba’e, che añe’ẽ haguéma ndéve, kóva Israel retã ruvicharã.

18Saul oñemoag̃uívo Samuel rehe, pe táva mbyte rupi, he’i ichupe: Ajerure ndéve, eikuaaukamína chéve, mamópa opyta techahára róga.

19Ha Samuel he’i Saúlpe: Che voi ningo pe techahára, ejupi che renonderãme pe tape ijyvatevehápe, ha ekaru ko árape chendive, ha pyhareve romondóta, ahechauka rire ndéve opaite mba’e reikuaaséva guive.

20Ha umi búrro kuña okañyva’ekue pendehegui, ojapóma mbohapy ára, ojejohúma, anivéntema rejepy’apyve hesekuéra. Ha mávape g̃uarã piko opytáta Israel mba’eita, opytapa voi ningo ne mba’erã ha nde ru rogaygua mba’erã.

21Ha Saul he’i: Chépa ndaha’éi Benjamingua ra’yre, Israel ñemoñare apytégui pe tríbu imichĩvéva. Ha che rogayguápa naimbovyvéi Benjamin ra’ykuéra apytégui. Mba’ére piko ere chéve ko’ã mba’e.

22Upéramo Samuel ogueraha Saul ha hembiguáipe ha omoinge ichupekuéra pe kotyguasúpe, ha omohenda ichupekuéra pe mesa akã gotýo umi oñehenoiva’ekuépe pe karuguasuhápe, oñembyatyhápe 30 kuimba’e rupi.

23Ha Samuel he’i pe tembi’u mbojyhárape: Egueru ko’ápe pe so’o pehẽngue ame’ẽva’ekue ndéve, ha ha’eva’ekue ndéve reñongatu hag̃ua.

24Upéramo pe tembi’u mbojyhára ogueru peteĩ paléta ha umi mba’e oĩva ijerekuévo ha omoĩ Saul renondépe. Ha Samuel he’i Saúlpe: Ko pehẽngue kóva che añongatukákuri ndéve g̃uarã ahenoiuka mboyve ambue kuimba’ekuérape ko karuguasuhápe, he’u katu. Ha Saul okaru Samuel ndive pe árape.

25Ha oguejy rire hikuái pe yvy ijyvatevehágui pe távape, Samuel oñe’ẽ Saul ndive pe óga ape ári.

26Ha ambue árape voiete opu’ã hikuái, ha ko’ẽtĩmbotávo Samuel ohenói Saúlpe, oĩva hína pe óga ape ári, ha he’i: Epu’ã toromomaitei paha. Upéi Saul opu’ã, ha osẽ hikuái, ha’e, hembiguái ha Samuel.

27Ha oguejývo hikuái táva rembe’y gotýo, Samuel he’i Saúlpe: Ere ne rembiguáipe toñemotenondemive. Ha pe tembiguái oñemotenonde rire, nde eha’ãrõ sapy’a tamyesakã ndéve Ñanderuete rembipota.