2 Crónicas 9 - Biblia en Guaraní - ?anderuete ?e’? Por? 2015

Peteĩ kuñakarai, Saba retã ruvicha, ou Salomon rendápe

1Peteĩ kuñakarai, Saba retã ruvicha, ohendúvo Salomon herakuã iporãha, ou Jerusalénpe hembiguái hetaite ndive, icaméllo henyhẽva mba’e ryakuã porãgui, hetaiterei óro ha ita vera hepyetágui, oha’ã hag̃ua Salomónpe mba’e ñeporandu hasýva rupi. Ha og̃uahẽvo Salomon rendápe oporandu ichupe ipy’apýpe ombosako’iva’ekue guive.

2Ha Salomon ombohovái porãmba ichupe, ha ndaipóri mba’eve Salomon ombohovai’ỹva ichupe.

3Ko kuñakarai, Saba retã ruvicha, ohechávo Salomon arandu ha pe óga omopu’ãva’ekue,

4ha umi tembi’u imesa árigua, isoldádo ruvicha róga, hembiguaikuéra resãingue, umi ao omondéva hikuái ha umi kuave’ẽmby oñekuave’ẽva Ñanderuetépe g̃uarã, opyta ipy’andýi omba’eponderágui.

5Ha he’i tetã ruvicha Salomónpe: Añete nipora’e ahendúva guive oje’e nderehe che retãme, umi mba’eita rerekóva ha pe arandu oĩva ndepype.

6Ha che ndagueroviaséi iñe’ẽnguéra aju peve ahechávo che resatee rupi; ha péina ne arandúgui ndoje’éi nipo ra’e chéve imbyterénte jepe: Nde rehasa mombyry pe terakuã porã ahendumava’ekue nderehe.

7Ovy’aite umi tetãygua nendive oĩva, ha ovy’aite ko’ã ne rembiguaikuéra oikóva tapiaite ne renondépe, ha ohendukuaáva ne arandu ñe’ẽ.

8Toñemomba’eguasu Jahve, nde Jára, ojeguerohoryva’ekue nderehe nemoĩ hag̃ua Israel retã guapyhaguasúpe, ha nde Jára ohayhúgui Israélpe, Ha’e ndeporavo rembojovake hag̃ua hekoitépe ha reisãmbyhy porã hag̃ua opaite ne retãyguakuérape.

9Upéi ha’e ome’ẽ tetã ruvicha Salomónpe 4020 kílo óro ha hetaiterei mba’e ryakuã porã, ha ita vera hepyetéva; araka’eve ndojeguerúiva Salomónpe koichagua mba’e ryakuã porã, ko kuñakarai Saba retã ruvicha ome’ẽ haguéicha ichupe.

10Hiram rembiguaikuéra, Salomon rembiguaikuéra ndive, ogueru avei óro Ofírgui ha yvyra sándalo ha ita vera repyetéva.

11Ha pe yvyra sándalogui Salomon ojapo escaléra Ñanderuete rogaguasúpe g̃uarã ojejupi hag̃ua, ha tetã ruvicha róga pegua avei; ojapouka avei árpa ha mbaraka umi opurahéivape g̃uarã; ha Juda retãme ndojehechavéi araka’eve koichagua yvyra iporãva.

12Ha tetã ruvicha Salomon ome’ẽ Saba retã ruvichápe opaite mba’e oipotáva ha ojeruréva guive, ha hetave jopói ha’e ogueruva’ekuégui ichupe. Upéi ha’e oho jevy hetãme hembiguaikuéra ndive.

Salomon mba’erepyeta ha herakuãguasu

13Opaite áño ojegueru Salomónpe 22.312 kílo óro,

14ojepapa’ỹre umi impuésto ñemuharakuéra oñeme’ẽva’erãva ichupe; opaite Arábia retã ruvicha ogueru avei óro ha pláta Salomónpe.

15Salomon ojapouka avei 200 soldádo retemo’ãhaguasu óro ñenupãmbyrégui, ha peteĩteĩ ipohýi 6,7 kílo.

16Upéicha avei 300 soldádo retemo’ãha michĩva óro ñenupãmbyrévagui, ha peteĩteĩ ipohýi 3,35 kílo; ha tetã ruvicha omoĩ umía pe óga Líbano ka’aguy peguápe.

17Ha’e ojapouka avei peteĩ tetã ruvicha guapyha tuicháva elefánte rãinguégui, ha oñuãmba oroitépe.

18Pe guapyhaguasu oguereko 6 ojejupiha (gráda), ha peteĩ pyenda órogui ojáva pe guapyhaguasu rehe, ha mokõive ijyke gotýo oĩ ijyva rendag̃ua, ha mokõi leõ oĩ iguapyhaguasu ykére.

19Oĩ avei 12 leõ umi 6 jejupiha ári, mokõive yke gotýo. Araka’eve ndojejapói koichagua guapyha mamove tetã rupi.

20Opaite Salomon vasokuéra ojejapo órogui, ha umi tembiporu pe óga Líbano ka’aguýpe g̃uarã ojejapo avei oroitégui. Salomon oikoveha árape ndojererohorýi pe pláta (óro morotĩ).

21Tetã ruvicha barcoguasu aty oho Tarsíspe Hiram rembiguaikuéra ndive, ha ojevy jepi mbohapy áño rire, ha ogueru óro, pláta, elefánte rãingue, ka’i ha jaku jeguakuéra (pávo real).

22Ha tetã ruvicha Salomon ohasapa opaite tetã ruvichakuéra yvy ariguakuérape mba’erepyeta rerekópe ha arandúpe.

23Ha opaite tetã ruvichakuéra yvyarigua oñeha’ã ohecha hag̃ua Salomon rova, ohendu hag̃ua iñarandu Ñanderuete ome’ẽmava’ekue ichupe.

24Umíva ogueru opaite áñope ijopoikuéra: Jeguaka plataguiguáva, jeguaka oroguiguáva, ao, ñorãirõ rembiporukuéra, mba’e ryakuã porã, kavaju ha mburikakuéra Salomónpe g̃uarã.

25Salomon oguereko avei kavaju kuéra 4.000, icarrokuérape g̃uarã ha 12.000 kavaju hi’ariguape g̃uará, umi kavaju ha carrokuéra ha’e omoĩ umi táva oñembosako’ipyrévape Jerusalénpe, tetã ruvicha oikohápe.

26Ha Salomon oguereko ipoguýpe opaite tetã ruvichakuéra Éufrates guive Filisteayguakuéra yvy peve, ha Egípto retã rembe’y peve.

27Ha tetã ruvicha ombyaty Jerusalénpe pláta itáicha, ha cedrokuéra retakue ojogua umi hígo saitépe oĩva ñu rei rehe.

28Ojegueru avei Salomónpe g̃uarã kavajukuéra Egíptogui ha heta ambue tetãgui.

Salomon omano

29Ambue Salomon rembiapokue, iñepyrũ ha ipaha pegua, ojehaipa proféta Natan kuatiañe’ẽme; ha Ahías, pe Silogua, proféta kuatiañe’ẽme; ha proféta Iddo kuatiañe’ẽme, he’iva’ekue Jeroboam, Nebat ra’y rehe.

30Ha Salomon oisãmbyhy Jerusalénpe opaite Israel retãme 40 áño pukukue.

31Ha Salomon omano rire, oñeñotỹ ichupe itúva David távape; ha hendaguépe oisãmbyhy ita’ýra Roboam.