Isaías 30 - Biblia en Guaraní - ?anderuete ?e’? Por? 2015

Juda oma’ẽ Egíptore, oma’ẽ rãngue Ñanderuete rehe

1Cháke, che ra’ykuéra chemboykéva, he’i pende Ruete, oheka rãngue pe tekombo’e chendive, oho oheka ambuekuéra ndive; oiko rãngue che Pytu Porãite poguýpe, oikose ambue tetã poguýpe, ha péicha ombojo’a jo’a hembiapo vaikue.

2Chehegui oñemboyke oho hag̃ua Egíptope, ha nomba’eporandúi che profétape; ojejokose faraon mbaretekue rehe, ha ojeroviase faraon pu’aka rehe.

3Faraon katu penembotavýta ha pejerovia reíta Egípto pu’aka rehe ha tuicha peñemotĩta.

4Pene mburuvichakuéra og̃uahẽ ramojepe Zoánpe, ha pene ñe’ẽ rerahahára og̃uahẽ ramojepe Hanéspe,

5mba’eve ndohupitymo’ãi, upépe katuete oñemotĩta ha pytyvõ’ỹre ou jevyva’erã, ndojohúi katu pe ñepytyvõ oha’ãrõva.

6Pene rembijokuái ohasa asy oguata aja Negev desiérto rupi, oikohápe leõnguéra, mboikuéra ha mboiguasu ovevéva, ha ojehasa asy ha ojepy’apyete pene rymba búrro ha caméllo, ogueraháva heta jopói hepýva, pe tetãme.

7Añetehápe Egípto ñepytyvõ reiete (ndovaléi) ha upévare Che ha’ékuri Egíptore: Pe tetã péva hatatĩna ha ndaikatúi oporopytyvõ, ha Rahab (Egípto) oñembotuicha reiete.

8Upévare tereho ko’ág̃a ha ehai hesa renondépe peteĩ ita ipéva rehe, ha peteĩ kuatiápe, ha topyta ko’ẽramo ha tapia g̃uarã.

9Ko tetã kóva oñemoĩ ohóvo cherehe, ita’yrakuéra ijapu, ha naiñe’ĩrenduséi che rembiapoukapy rehe;

10ha’ekuéra he’i iprofétape: Ani pehechátei; ha imaranduhárape: Ani pemomarandútei (peprofetiza) oréve umi mba’e hekoite peguáva, pejénte oréve umi mba’e orembohorýva, pemomarandu ñembotavy;

11peñemomombyry Ñanderuete rapégui, peñemboyke ichugui, peipe’a ore renondégui Israel Jára heko porãitéva.

12Upévare Israel Jára heko porãitéva he’i: Pemboykégui ko ñe’ẽ kóva, ha pejerovia mbaretégui ñaña reko rehe ha pejejokógui umi mba’e rei rehe;

13ko’ã tembiapo vai oikóta peẽme g̃uarã ku korapy jere yvatéicha otiri ha ojekáva, ha sapy’aitépe ho’apa ramoguáicha.

14Ha’e voi ojokapáta ichupekuéra ku kambuchi apohára ojoka háicha pe kambuchi iporã’ỹva, ojepokuaa háicha jeporiahuvereko’ỹre ha ipehẽnguekuéra apytépe ndojejohumo’ãi peteĩnte jepe ojegueru hag̃ua hi’ári tatapỹi tatágui, térã oñerenohẽ hag̃ua ipype y ykuágui.

15Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

16peẽ peje katu: Nahániri, ore rokañyse kavaju iñakuãvéva árinte, upévare kavaju iñakuãva ári oúta umi penemuñátava.

17Peteĩ oúva osapukái ramo, 1.000 pende apytégui okañýta, ha 5 oúva osapukái ramo penemokañymbáta, hemby pevénte mbovymi, ku pósteicha oñemopu’ãva cérro ru’ãme, térã poyviveve ku cérro karape ariguáicha.

Ñanderuete he’i ome’ẽtaha Israélpe mba’eporã

18Upeichavéramo jepe Ñanderuete oha’ãrõta pendeporiahuvereko jevy hag̃ua, ha Ha’e opu’ãta pendeporiahuvereko hag̃ua, Ñanderuete katu ombojovake porã ha ohayhu pe justícia ha ombovy’ase umi hese ojeroviávape.

19Añetehápe, peẽ Sion retã, Jerusalénpe peikóva, napenerasẽmo’ãi tapia g̃uarã; Ha’e pendeporiahuvereko jevýta peẽ pehenói jevy vove ichupe.

20Ha Ñanderuete ome’ẽ ramojepe peẽme jejopy rehegua pan ha jepy’apy rehegua y, pene mbo’eharakuéra natekotevẽima okañy, ha pende resatee rupi pehechava’erã pene mbo’eharakuérape.

21Upéramo pende apysa ohendúta pe ñe’ẽ pende rapykuéguio he’íva: Kóa ha’ehína pe tape, peiko ipype; ha ani pejepoítei pende akatúa gotýo ni pepia pende asu gotýo.

22Ha upérõ peguerekóta mba’e ky’a ramo pende jára gua’u ra’ãngápe oñeñuãva’ekue pláta ha órope, ha pemombota mba’e oñembojeguarúvaicha ha pejéta: Tapeho ko’águi.

23Upéicharamo Ñanderuete omboúta ama peñemitỹ hag̃ua, ha pende yvy hi’a porãta peneryg̃uatã porã hag̃ua ha pene rymbakuéra okaru joáta ñu ipy ha kapi’i iporãva oĩháme.

24Ne rymba guéi ha burrokuéra omba’apóva nde kokuépe ho’úta heta mba’e ra’ỹingue ipotĩ porãva.

25Ha og̃uahẽvo pe jejukaguasu ára ho’áta umi óga yvate ha oĩta y osyrýva mayma cérro yvate ha yvy pu’ã ru’ã guive peve.

26Ha pe jasy ohesapéta kuarahýicha, ha pe kuarahy ohesapéta 7 jevyve ohesape jepiguágui, ha Ñanderuete ojokuáita hetãyguakuérape ojekutu haguépe, ha oipohãnóta ichupekuéra pe aígui Ha’e omoĩva’ekue hesekuéra.

Asíria ojehavira

27Pema’ẽ porãke, Ñanderuete mombyrýgui ou; hova ojajái tata rendýicha, hembekuéra henyhẽ pochýgui ha ikũ tata oporombokusuguévagui.

28Ipytuhẽ ku ysyry pochývaicha ñanderupity ñande ajúra peve, ombogua hag̃ua tetãnguérape ku mba’e mboguaháicha oporohundívape; ha oñemoĩta tetãygua jurúpe peteĩ kavaju juru jokoha ombotavy hag̃ua ichupekuéra.

29Peẽ katu pepurahéi joáta ku páscua arete pyhare peguáicha, ha pendepy’arorýta, ku ohóvaicha mimby reheve Ñanderuete cérrope, Israel Jára Ipu’akapáva rendápe.

30Upérõ Ñanderuete ohendukáta iñe’ẽ hatãitéva osunu ramoguáicha ha ohechaukáta ipu’akaguasu yvága pegua omboguejy ramo pochypópe pe tatarendy oporombokusuguéva yvytu jepoka reheve, aguacéro ha amandáu reheve.

31Asíria oryrýita Ñanderuete osunu ramo ha okyhyjéta Ha’e ohavira jave.

32Ha Ñanderuete oinupã jave itukumbópe oporohekombo’e hag̃ua oñembopu mba’epu pararã ha árpa; ha Ha’e oñorãirõta hendivekuéra ipu’aka mbarete yvága pegua reheve.

33Aremíma oñembosako’i Asíria retã ruvichápe g̃uarã pe tenda’ípe ha hypýva ojehapy hag̃ua, ha oñembyatýma jepe’a aty ndetuicháva Ñanderuete omyendy hag̃ua ipytuhẽ hendýva ku fósforoicha.