2 Samuel 12 - Biblia en Guaraní - ?anderuete ?e’? Por? 2015

Natan oñe’ẽ Davídpe

1Ñanderuete omondo Natánpe David rendápe, ha ha’e og̃uahẽvo hendápe, he’i ichupe: Oiko ningo mokõi kuimba’e Israel távape, peteĩ ipirapire hetáva ha ambue imboriahúva.

2Pe ipirapire hetáva heta ijovecha ha ivaka.

3Pe imboriahúva katu oguereko peteĩ ovecha ra’ymínte, ha’e ojogua ha omongakuaava’ekue ita’yrakuéra ndive, okarúva hembi’úgui ha hoy’u hoy’uhágui, ha okéva ijyva ári; ha ojeguerekóva peteĩ itajýraicha.

4Ha og̃uahẽ peteĩ mbohupa pe kuimba’e ipirapire hetáva rógape; ha kóa ndojukaséigui ijovecha térã ivaka apytégui peteĩme, ojuka hag̃ua upe og̃uahẽvape g̃uarã, upévare ojuka upe kuimba’e mboriahu ovechápe, omongaru hag̃ua imbohupápe.

5David ohendúvo ko’ã mba’e ipochyeterei ha he’i Natánpe: Ñanderuete rekovére, pe tembiapo vai apohára ojejukava’erã.

6Ha omyengoviava’erã pe ovecha ra’y repy, irundy jevyve, ojapo haguére ko’ã mba’evaiete, ha ndojeporiahuverekói haguére.

7Upévo Natan he’i Davídpe: Nde voi ningo pe kuimba’e péva. Ha péicha he’i Ñanderuete, Israel Jára: Che roiporavo Israel retã ruvicha ramo; ha roguenohẽ avei Saul pógui.

8Che ame’ẽ ndéve nde jára róga, nde jára kuñakuéra nde pópe, hi’ári avei Israel ha Juda retã ha ko’ã mba’e imichĩ rire, ambojo’aveva’erãmo’ã ndéve hetaitevépe.

9Mba’érepa nderejapói mba’eve ramo pende Ruete ñe’ẽ, ha rejapo ko mba’e ivaietéva che resa renondépe. Urías, Het ñemoñarépe, rejukauka kyse pukúpe Amon ñemoñarépe, ha reñemokuña hembireko rehe.

10Pévarehe nde rógagui ndojei kyse puku, chemboyke haguére ha regueru haguére Urías, Het ñemoñare rembirekópe, ne rembireko ramo.

11Péicha Ñanderuete he’iuka ndéve: Péina ko’ág̃a che amopu’ãta avei mba’evai nde rogateégui nderehe, ha ne rembirekokuéra ajapyhyukáta nde resa renondégui, ha ameẽta nde rapichápe, ha upéva oñenóta ne rembirekokuéra ndive kuarahy resápe.

12Nde rejapógui ñemiháme, Che ajapoukáta ko’ã mba’e opaite Israelgua renondépe ha kuarahy resakãitépe.

13Upévo David he’i Natánpe: Añemoangaipa Ñanderuete ndive. Ha Natan he’i Davídpe: Ñanderuete neperdona ndéve, ne angaipa rehe neremanomo’ãi.

14Ko’ã ne rembiapo vaiete rupi Ñanderuete rehe ija’e’ỹva oñe’ẽvaíta ha oñembohorýta, upévare nde ra’y onacétava katuete omanova’erã.

15Ha Natan oho jevy hógape. Ha Ñanderuete ombohasyete pe mitãme Urías rembirekokue ome’ẽva’ekue Davídpe, ha hasyeteve ohóvo.

16Upémaramo David ojerure Ñanderuetépe pe mitã rehe, ha ohasa okaru’ỹre, ha oke pyhare pukukue oñenohápe yvýpe.

17Ha ambue ko’ẽme umi karai hogayguáva opu’ã ha oho hendápe omopu’ã hag̃ua ichupe yvýgui; ha’e katu nopu’ãséi ha ndokaruséi avei hendivekuéra.

18Ha pe ára 7-hápe omano pe mitã; ha David rembiguaikuéra okyhyje oikuaauka hag̃ua ichupe ita’ýra omanóma hague ha he’i hikuái ojupe: Pe mitã oikove aja gueteri tetã ruvicha nopenái ñane ñe’ẽre, mba’eichaitépa ojepy’apyvéta ja’e ramo ko’ág̃a ichupe ita’ýra omanóma hague.

19Ha David ohechávo hembiguaikuéra oñe’ẽ ñemiha oñondive, ohechakuaa pe mitã omanóma hague; upévagui David oporandu hembiguaikuérape: Omanómapa pe mitã. Ha ha’ekuéra he’i ichupe: Omanóma.

20Upévo David opu’ã yvýgui, ojahu ha oñemohyakuã, omonde ambue ao, ha oike Ñanderuete rógape omomba’eguasu hag̃ua ichupe, upégui ou hógape, ha ojerure tembi’u rehe ha okaru.

21Ha hembiguaikuéra he’i ichupe: Mba’éiko ko’ã mba’e rejapóva. Pe mitã oikove ramo gueteri, nderekarúi ha nerasẽreína; ha omano rire, repu’ã ha rekaru.

22Ha David he’i ichupekuéra: Oikove aja pe mitã, che ndakarúi ha cherasẽnte ha’égui chejupe: Mávapa oikuaa Ñanderuete oiporiahuverekónepa oikove hag̃ua pe mitã.

23Ha ko’ágã omano riréma, mba’upépa ahasavéta akaru’ỹre. Ikatúnepa che amoingove jevy ichupe. Che ahava’erã uvei hendápe, ha’e katu ndouveimava’erã che rendápe.

24Ha David omoangapyhy hembireko Betsabépe ha oñemog̃uahẽvo hese oke hendive; ha ha’e imemby ichupe peteĩ ta’ýra ha ohenói ichupe Salomon, pévape Ñanderuete ohayhu.

25Ha oguerahauka ichupe Natan rendápe ha’e ohekombo’e hag̃ua ichupe. Natan ombohéra ichupe Jedidia (he’ise: Ñanderuete nderayhu), Ñanderuete oipotágui péicha.

David omoĩ ipoguýpe Rabayguakuérape

26Joab ondyry Raba, Amon ñemoñare távare, oikohápe hetã ruvicha ha omoĩmbamo’ã ipoguýpe.

27Upémaramo Joab omombe’uka Davídpe ha he’iuka: Che amongora Rabápe, ha amoĩmbamo’ã nde poguýpe, pe táva hi’y hetáva.

28Embyaty tetãyguakuéra hembýva, ha eju che rendápe embopoguypa hag̃ua ko táva kóvape, oñembotuicha hag̃ua nde réra, ha anítei che réra.

29Upérõ David ombyaty opaite hetãyguápe ha oho Rabápe ombopoguy hag̃ua pe távape.

30Ha oipe’a pe coróna hetã ruvichaguasu akãgui, ojejapova’ekue 33,5 kílo órogui ha oguereko avei heta ita vera hepýva ha oñemoĩ David akã rehe. Ha hetaiterei mba’e hepýva oguenohẽ pe távagui.

31Oguenohẽ avei hetãyguakuéra ipype oikóva, omomba’apo hag̃ua ita ñekytĩha ramo, yvyra kytĩha ramo, mba’e ra’ỹi jokaha ramo ha ojapouka avei ladríllo; peichaite ojapo avei opaite ambue Amon táva rehe. Ha David ou jevy opaite hetãygua ndive Jerusalénpe.