1Nehemías, Hacalías ra’y ñe’ẽ. Ojehu Quisléu (Diciémbre) jasy jave, pe áño 20-hápe, che aĩ ramoguare Súsape, pe tetã ruvicha tavaguasúpe,
2oúkuri Hanani, peteĩ che ryvy, Judaygua kuimba’ekuéra mbovymi ndive, ha che aporandu ichupekuéra Jerusalen rehe ha umi Judaygua hembýva rehe ha umi ndojeguerahaiva’ekue rehe jepokuapýpe Babilóniape.
3Ha he’i hikuái chéve: Umi hembyva’ekue ha ndojeguerahaiva’ekue jepokuapýpe ohasa asyete ha ñemotĩ reheve Juda retãme, Jerusalen tápia ho’apágui ha hokẽ guasukuéra ojehapypágui.
4Ahendúvo ko’ã mba’e aguapy ha cherasẽ, ha mbovymi arakuéra ahasa mba’embyasypópe, ahasa akaru’ỹre ha añembo’e Ñanderuete yvága peguápe,
5ha ha’e: Ajerure ndéve, che Jára, yvága Jára, imbaretéva, ojekyhyjetéva ha oñangarekóva ojejapopa peve iñe’ẽme’ẽmby ha oiporiahuverekóva umi nderayhúvape ha ojapóva ne rembiapoukapykuéra.
6Ejapysakamína ha ejesape’ami rehendumi hag̃ua ne rembiguái ñembo’e, ajapóva ne renondépe ára ha pyharekuépe, ne rembiguái Israel ra’ykuéra rehe; ha amombe’u porã ndéve Israel ra’ykuéra oñemoangaipaha, rojapova’ekue nde reipota’ỹva, upéicha che ha che ru rogaygua roñemohembiapo vaipa.
7Hetaiterei jevy roñemohembiapo vai ne renondépe, ha ndorojapói umi ñe’ẽ ereva’ekue ni umi tembiapoukapy reme’ẽva’ekue ne rembiguái Moiséspe.
8Nemandu’amíkena ko’ág̃a ne ñe’ẽ reme’ẽva’ekue rehe Moiséspe, ere ramoguare: Peẽ peñemohembiapo vai ramo, che pomosarambipáta ambue tetãnguéra apyte rupi,
9ha pejevy jey ramo che rendápe, ha pejapo jevy ramo che rembiapoukapy ha pejapo ramo hekoitépe, jepémo penesarambipára’e ára apýra paha peve, upégui Che pombyaty ha pogueru jevýta pe tetã Che aiporavomava’ekuépe ha che réra oiko hag̃uáme.
10Ore ningo ne rembiguái ha ne retã, resalvava’ekue nde pu’aka tuicha rupi, ha nde po mbarete rupi.
11Ajerure ndéve, che Jára, ejapysakami ne rembiguái ñembo’e rehe, ha ne rembiguaikuéra ñembo’e rehe, romomba’eguasu nde réra; eipytyvõmíkena ko’ág̃a ne rembiguáipe osẽ porãmba hag̃ua, ha eme’ẽ oréve ne ñepytyvõ ko tetã ruvichaguasu renondépe, che aikógui tetã ruvicha váso rerojaha ramo.
Who We AreWhat We EelieveWhat We Do
2025 by iamachristian.org,Inc All rights reserved.
