Rut 3 - Biblia en Guaraní - ?anderuete ?e’? Por? 2015

1Upéi isuégra, Noemi, he’i ichupe: Che memby, che ajapopáta ikatumíva, romomenda jevy hag̃ua ha rejohu jevy hag̃ua nde rogarã.

2Ko Booz, hembiguái kuñakuéra ndive remba’apova’ekue, ñane pehẽngue voi. Péina ko pyharépe ha’e ombovevéta yrupẽme pe cebáda ra’ỹi.

3Upévare ejahu ha eñemohyakuã porãkena, emonde nde ao iporãvéva, ha tereho ha’e omba’apohápe, anínteke rejehechauka ichupe okaru ha hoy’u mboyve.

4Ág̃a ha’e oñenóvo ejesareko porãke moõpa oñeno ha rehóta reipe’a pe ahoja ipy oñu’ãva, ha reñenóta upépe, ha ha’e he’íta ndéve mba’épa rejapóta.

5Ha Rut ombohovai: Opaite mba’e nde eréva chéve ajapóta.

6Upérõ Rut oho kokuépe; ha ojapopa Noemi he’i haguéicha ichupe.

7Booz okaru porã rire py’a rorýpe oho oke hag̃ua pe atýra ykére. Uperire Rut oñemboja mbegue katu asy, omboguy Booz ahoja ha oheja ipy okápe.

8Ha pyhare pyte rupi Booz opáy sapy’a ha ojerévo oñemondýi ojohúvo peteĩ kuña oñenovahína ipy okápe.

9Upévare oporandu: Máva piko nde. Ha pe kuña ombohovái: Che ningo Rut, ne rembiguái. Eipysomína nde ahoja ne rembiguái ári, nde ningo che menare pehẽngue voi.

10Ha Booz he’i: Ñanderuete tanderovasa che rajy, ne rembiapo pahague rejapova’ekue Noemi rehehápe iporãve pe tenondeguarégui, nderehói haguérehe umi mitãrusu rekávo, imboriahu térã ipirapire hetávape.

11Upéicha rupi, ani rekyhyje, che rajy, ajapopáta nde rejeruréva chéve, opavave che tavaygua oikuaáma voi, nde peteĩ kuña heko potĩva.

12Añetehápe che ne menare pehẽngue voi, upeichavéramo jepe oĩhína ne menare peheng̃ue ag̃uivéva chehegui.

13Upévare epyta ko’ápe ko pyhare, ág̃a ko’ẽ rire aporandúta pe ambuépe omendasétapa nderehe, ha nahániri ramo katu, Ñanderuete rérape ha’e ndéve, che amendáta nderehe. Epytu’únte ko’ẽ meve.

14Ha Rut oke rire ipy gotýo, voiete opu’ã ojehecha mboyve ichupe, Booz he’ígui ichupe: Aníke ojekuaa ou hague peteĩ kuña che amba’apohápe.

15Upéi Booz he’i Rútpe: Eipyso ne akãhoja reguerúva ndejehe ha Booz omoĩ ipype 22 kílo cebáda ra’ỹi. Upéva omoĩ ijati’y ári, ha pe kuña oho jevy Belénpe.

16Ha og̃uahẽvo imenare sy rendápe, Noemi oporandu ichupe: Osẽ porãmba piko ra’e che memby. Ha ha’e omombe’upaite ojehuva’ekue.

17Ipahápe Booz he’i chéve: Ani reho po nandi reheve ne menare sy rendápe, eraha katu ichupe ko’ã 22 kílo cebáda.

18Ha Noemi he’i: Eha’ãrõnte che memby reikuaa peve mba’épa umi mokõi kuimba’e ojapótava, Booz katuete ndopytu’umo’ãi ko árape oikuaa peve ha’e ojapova’erãva.