1Abimelec, Jerobaal ra’y, oho Siquémpe, isy kyvykuéra ha mayma isy ru rogayguakuéra rendápe, ha he’i ichupekuéra:
2Che ajerure peẽme peje hag̃ua mayma Siquemgua apysápe: Mba’épa iporãvétavaicha peẽme, tapenesãmbyhy 70 kuimba’e, mayma Jerobaal ra’ykuéra, térãpa tapenesãmbyhy peteĩ kuimba’e añónte. Penemandu’ákena che voi pene kãngue, ha pende ro’o reheguaha.
3Ha oñe’ẽ hese umi isy kyvy mayma Siquemgua apysápe ko’ã ñe’ẽ; ha oñemboyke ohóvo Abimelec gotýo, he’ígui hikuái: Ha’e ningo ñane pehẽngue.
4Ha ome’ẽ ichupe 782 grámo pláta Baalberit tupãógui, ha pe pirapire rehe Abimelec ojokuái umi kuimba’e oiko reíva, omoirũ hag̃ua hikuái ichupe.
5Ha oho itúva rógape, Ofrápe, ha ojuka ipehẽnguekuérape, 70 Jerobaal ra’ykuérape, peteĩ ita ári; ha hemby Jotam, pe Jerobaal ra’y imitãvéva, oñemokañýgui.
6Upémaramo umi Siquemgua ha umi Miloygua oñembyaty ha oho hikuái peteĩ urunde’yguasu oĩháme ha upépe omomba’eguasu avei ambue járape. Ha og̃uahẽvo upépe omoĩ Abimelécpe hetã ruvicha ramo.
7Ha ã mba’e oñemombe’úvo Jotámpe, ha’e oho oñembo’y hag̃ua Gerizim cérro ijyvatevehápe, ha hatã osapukái he’ívo: Cherendumi peẽ kuimba’ekuéra Siquem pegua, Ñanderuete penerendu hag̃ua:
8Peteĩ árape yvyrakuéra oho oiporavo hag̃ua imburuvicharã ha he’i hikuái olívo mátape: Nde repytáta ore mburuvichaguasurã ramo.
9Ha pe olívo máta katu he’i: Ahejava’erãiko che acéite, pévarupi ningo oñemomba’eguasu Ñanderuete ha tetãyguakuérape, aha hag̃ua aiko yvyra ruvicha ramo.
10Upéi umi yvyra he’i pe hígo mátape: Epytána nde ore mburuvichaguasu ramo.
11Ha pe hígo máta he’i ichupekuéra: Ahejava’erãiko che re’ẽngue ha che a porãite, aiko hag̃ua yvyra ruvicha ramo.
12Upéi umi yvyra he’i pe parrálpe: Ejúna nde, ha eiko ore mburuvichaguasurã ramo.
13Ha pe parral he’i jevy ichupekuéra: Ahejava’erãiko che rykuere, ombohorýva jarakuérape ha tetãyguakuérape, aiko hag̃ua yvyramáta ruvicha ramo.
14Upémaramo mayma yvyrakuéra he’i jukerípe: Ndéna epyta ore mburuvicha guasu ramo.
15Ha pe jukeri he’i umi yvyra mátape: Añete ramo peẽ cheporavose pende ruvicha ramo peju joaite peñemokuarahy’ã che guýpe, ha ndaupéichai ramo tosẽ tata pe jukerígui ha tombokusuguepa umi cédro Líbano peguápe.
16Mba’érehepa peiporavo Abimelécpe pene retã ruvicha ramo, mba’érehepa pejapo vaiete Jerobaal ha hogayguakuérare, mba’érehepa pemyengovia mba’evaíre hembiapo porã.
17Che ru ningo oñorãirõkuri penderehehápe, hekove rehe nahakate’ỹi peneguenohẽ hag̃ua Madiaygua poguýgui,
18peẽ katu pepu’ã ko árape che ru róga rehe ha pejuka 70 ita’yrakuérape peteĩ ita ári; ha pemoĩ tetã ruvicha ramo Abimelécpe pe táva Siquem ári, peteĩ kuña rembiguái membyre, ha’égui pene pehẽngue;
19peiporavo ramo py’aporãme ichupe ha pejapo porã ramo Jerobaal ha hogaygua ndive g̃uarã, tapevy’aite Abimelec ndive, ha ha’e tovy’aite penendive.
20Ha ndaupéichai ramo tata tosẽ Abimelécgui, ha tombokusugue Siquem ha Milo rogayguakuérape, ha tata tosẽ Siquem ha Milo rogayguágui ombokusugue hag̃ua Abimelécpe.
21Ha Jotam okañy upégui oho hag̃ua Beérpe, ha opyta upépe okyhyjégui ityke’ýra Abimelécgui.
22Ha Abimelec oiko Israel retã ruvicha ramo mbohapy áño rupi,
23Ñanderuete ombou peteĩ pytu vai Abimelec ha umi kuimba’e Siquem apytépe, ha umi Siquem pegua opu’ã Abimelec rehe;
24ikatu hag̃uáicha pe mba’evai ha’e ojapova’ekue umi 70 Jerobaal ra’y rehe, ojukávo ityke’yrakuérape, ho’a jevy hag̃ua Abimelec ári ha umi kuimba’e Siquemgua ári avei, oipytyvõ haguére ichupe ojuka hag̃ua ityke’yrakuérape.
25Ha umi Siquemgua omoĩ umi cérrope, Siquem ypýpe, kuimba’ekuéra omonda hag̃ua umi ohasávape upérupi; ha péva oñemombe’uka Abimelécpe.
26Ha Gaal, Ebed ra’y, ou ityvyrakuéra ndive ha oiko hikuái Siquémpe, ha umi Siquemgua ojerovia hese.
27Ha ha’ekuéra oho iparraltýpe, omono’õ hag̃ua hi’akuéra, ha ohykue’o rire iparral’a ojapo karuguasu ha ovy’a hikuái ijára tupãópe ha omaldeci hikuái Abimelécpe.
28Ha Gaal, Ebed ra’y, he’i: Mávaiko Abimelec, ha mba’éiko Siquem, ñande jaiko hag̃ua hembiguái ramo. Ndaha’éipa Jerobaal ra’y, ha Zebul piko ndaha’éi hembijokuái. Iporãve jaiko ramo Hamor ñemoñare poguýpe Hamor omopu’ãva’ekuégui Siquem, jaiko rãngue Abimelec poguýpe.
29Ko tetã oĩ rire che poguýpe, amosẽva’erãmo’ã Abimelécpe, ha ha’eva’erãmo’ã ichupe: Emboheta nde soldadokuéra, ha eju ñañorãirõ.
30Ha Zebul, Siquem táva sãmbyhyhára, ohendúvo Gaal, Ebed ra’y ñe’ẽ, ipochyeterei,
31ha ñemiháme omondo ñe’ẽrerahahára Abimelec rendápe, ha he’i ichupe: Péina Gaal, Ebed ra’y, ityvyrakuéra ndive oúkuri Siquémpe, ha oñeha’ã omopu’ã hag̃ua ko’ã tavaygua nderehe.
32Upévare pya’e epu’ã, ko pyharépe térã ko’ẽrõ, ha eju nde ha umi kuimba’e nendive oĩva, pemoĩ hag̃ua ñuhã ko táva jerekuévo.
33Ha pyhareve, kuarahy osẽvo ejeity ko táva ári; ha Gaal ha umi kuimba’e hendive oĩva osẽma ojeity hag̃ua pendeári, ejapo hese ho’a porãve háicha ndéve.
34Ha Abimelec ha mayma kuimba’e oĩva hendive opu’ã pe pyharépe omoĩ ñuhã Siquémpe g̃uarã, irundy soldádo aty reheve.
35Ha Gaal, Ebed ra’y, osẽ ha oñemoĩ pe táva rokẽme ojeikeha rupi; ha Abimelec ha mayma kuimba’e hendive oĩva, opu’ã hikuái iñuhãgui ha ou ojeity hag̃ua hi’arikuéra.
36Ha Gaal ohechávo umi kuimba’e he’i Zebúlpe: Ma’ẽ, che ahecha umi tapicha oguejýva cérrogui. Ha Zebul he’i ichupe: Nde ningo rehecha umi cérro kuarahy’ã kuimba’ekuéra ramoguáicha.
37Ha oñe’ẽ jevy Gaal, ha he’i: Ma’ẽ, ambue tapichakuéra ouhína yvy puru’ãgui (mbytégui), ha ambue aty ouhína umi ta’yvõ encinaty pegua (yvyra) rapégui.
38Ha Zebul he’i jevy ichupe: Nde juruguasúgui ningo, nde voi ereva’ekue: Mávaiko Abimelec, jaiko hag̃ua hembiguái ramo. Neremomba’éi piko ko’ã tetãygua ko’ãvape. Esẽ katu ko’ág̃a, ha eñorãirõ hendive.
39Ha Gaal osẽ ha umi Siquemgua oho hapykuéri ojeity hag̃ua Abimelec ári.
40Ha Abimelec omuña ichupe, ha Gaal okañy henonderãgui; ha oĩ heta omanóva og̃uahẽ mboyve pe táva rokẽme.
41Ha Abimelec opyta Arúmape; ha Zebul omosẽ Gaal ha ityvyrakuérape Siquémgui, ani hag̃ua oikove hikuái Siquémpe.
42Ambue ára iko’ẽ rire umi Siquem pegua osẽ ñúme; ha péva oñemombe’u Abimelécpe,
43ha ha’e ombyaty ikuimba’ekuéra mbohapy hendápe, ha omoĩ ñuhã pe ñúme; ha oma’ẽvo ohecha Siquemguakuéra osẽvahína itávagui; ha Abimelec opu’ã ojeity hag̃ua hi’arikuéra.
44Abimelec ha isoldádo aty ndive ojeity hi’arikuéra mbaretepópe, ha oñemboja pe táva rokẽme, ha umi ambue mokõi soldádo aty ojeity mayma ñúme oĩvare, ha ojuka hikuái ichupekuéra.
45Ha Abimelec ojeity pe táva ári pe ára pukukue, ha omoĩ ipoguýpe pe táva, ha ojukapa oikóva guive ipype; ha ombotapere pe táva, ha omyasãi ipype juky.
46Ohendúvo ko’ã mba’e umi oĩva Siquem róga yvatépe (tórrepe) oikepa hikuái ijára Berit tupãópe.
47Ha oñemombe’uka Abimelécpe, mayma kuimba’e hembyva’ekue oñembyatyha Siquem róga yvateguápe.
48Upémaramo Abimelec oho Salmon cérrope, ha’e ha mayma ikuimba’ekuéra ndive; ha ojapyhy peteĩ hácha ipópe oikytĩ hag̃ua peteĩ yvyrarakã umi yvyrágui, ha ohupi ijati’y ári, ha he’i umi kuimba’e hendive oĩvape: Pehechápa che ajapómava, pya’e pejapo avei che ajapo haguéicha.
49Ha mayma ikuimba’éva oikytĩ avei yvyrarakã, ha oho hikuái Abimelec rapykuéri, ha omoĩ hikuái Siquem róga yvate peguare ha ojatapy hikuái, upéicha omanombaite, oiméne 1.000 kuimba’e ha kuña.
50Ha upéi Abimelec oho Tebéspe, omongora ha omoĩ ipoguýpe.
51Upe táva mbytépe oĩkuri peteĩ óga yvate oñemombarete porãva, ha ipype oike opaite kuimba’e, kuñakuéra ha mayma karai anciáno; ha omboty porã pe okẽ ha ojupipa hikuái pe óga yvate ape ári.
52Ha Abimelec ou pe óga yvate rendápe ombopoguy hag̃ua, ha oñembojávo pe óga yvate rokẽ rehe omboja hag̃ua hese tata,
53upevove peteĩ kuña oity peteĩ ita molíno pegua Abimelec akã ári, ha ojoka iñakã.
54Upémaramo Abimelec ohenói pya’e hembiguáipe omo’ãva ichupe ha he’i: Ehekýi nde kyse puku ha chejuka, ani hag̃ua oje’e cherehe: Peteĩ kuña ojukaha Abimelécpe. Ha hembiguái oikutu ichupe ha omano.
55Ha umi Israelgua ohechávo Abimelec omanoha ojevypa hógape.
56Péicha Ñanderuete omyengovia Abimelécpe pe mba’evai ojapova’ekue itúva rehe, ojukávo 70 ita’ýrape.
57Péicha Ñanderuete oitypa jevy umi kuimba’e Siquemgua ári hembiapo vaikue, ha oja hesekuéra pe maldicion Jotam, Jerobaal ra’y, he’iva’ekue.
Who We AreWhat We EelieveWhat We Do
2025 by iamachristian.org,Inc All rights reserved.
