Números 31 - Biblia en Guaraní - ?anderuete ?e’? Por? 2015

Israel omyengovia Madian rembiapo vai

1Ñanderuete oñe’ẽ Moiséspe, ha he’i:

2Emyengovia Madianguakuéra rembiapo vai ojapova’ekue Israelguakuéra rehe, ha upéi nde remanóta.

3Upéramo Moises oñe’ẽ hetãyguakuérape ha he’i: Peteĩteĩva pembosako’i iñorãirõ rembiporu pejeity hag̃ua Madian ári, pemyengovia hag̃ua pe tembiapo vai ojapomava’ekue penderehe.

4Peteĩteĩva Israel tríbugui pemondóta 1.000 kuimba’e pe ñorãirõháme.

5Upéicha peteĩteĩ Israel tríbugui ojeporavo 1000 kuimba’e, oñondivepa 12.000 ohótava ñorãirõháme.

6Ha Moises omondo ichupekuéra ñorãirõháme; peteĩteĩ tríbugui omondo 1000; ha Finees, pa’i Eleazar ra’y, oho hendivekuéra ñorãirõháme ha ogueraha umi mba’e oñemboykéva Ñanderuetépe g̃uarã, turu (trompéta) reheve.

7Ha ojeity hikuái Madiangua ári, Ñanderuete he’i haguéicha Moiséspe ha ojukapaite hikuái ikuimba’ekuérape.

8Umía apytépe ojuka avei Madian retã ruvichakuérape: Evi, Réquem, Zur, Hur ha Reba, 5 tetã ruvicha Madian pegua; avei Balaam, Beor ra’ýpe, ojuka hikuái kyse pukúpe.

9Ha Israel rogaguasukuéra oñemomba’e Madian pegua kuñakuéra ha imitãkuéra rehe ha ombyaty opaichagua hymbakuéra ha mayma imba’e repykuéra.

10Ha’ekuéra omyendypa itavakuéra, tava’ikuéra ha hogakuéra.

11Ha ombyatypa rire hikuái opaite mba’e hepýva, hetãyguakuéra ha hymbakuérape,

12oguerupa hikuái Moiséspe, pa’i Eleazar ha Israel rogaguasukuéra atýpe, opytáva Moab yvýpe, Jordan rembe’ýre, Jerico rovái.

13Ha Moises, Eleazar ha mayma mburuvichakuéra osẽ hekohágui ojojohu hag̃ua hendivekuéra.

14Ha Moises ipochy katu umi soldádo aty ruvichakuéra ndive ha umi omyakãva ndive 1000 soldádo, oúva ñorãirõhágui,

15ha he’i ichupekuéra: Mba’érehepa peheja oikove mayma kuñakuérape.

16Napenemandu’ái piko Balaam rekombo’e rupi ha’ekuéra oity hague Israel rogaguasukuérape omomba’eguasu hag̃ua Baal-Peorpe ha omboyke hag̃ua Ñanderuetépe, upévagui oikova’ekue pe ñemanoguasu Ñanderuete retã apytépe.

17Pejuka ko’ág̃a opaite kuñakuérape, oikomava’ekue kuimba’e ndive, ha opaite mitãkuimba’épe.

18Ha umi mitãkuña ha kuñataĩ, ne’ĩrava gueteri oiko kuimba’e ndive, peheja toikove.

19Ha peẽ, peporojukava’ekue ha peñembojava’ekue omanova’ekue rete rehe, pepyta ha peiko tekoha okápe 7 ára pukukue, peñemopotĩ hag̃ua pe ára mbohapyha ha 7-hápe, peẽ ha umi ipokuapývape pegueruva’ekue.

20Upéicha avei pemopotĩmbava’erã opaite aokuéra, opaite mba’e tymba pirekueguiguáva, ha opaite mba’e ojejapóva kavara raguégui ha opaichagua tembiporu yvyraguiguáva.

Oñemboja’o umi mba’erepy ojepe’ava’ekue rehe

21Upéi pa’i Eleazar he’i umi kuimba’e oúvape ñorãirõgui: Kóa ningo Ñanderuete rembiapoukapy Ha’e he’iva’ekue Moiséspe:

22Añetehápe óro, pláta, brónce, hiérro, estáño ha plómo,

23umi mba’e okai’ỹva tatápe, tata rupi pemopotĩta ha upéi pemopotĩva’erã pe y pa’ikuéra ombosako’íva omopotĩ hag̃ua ha opaite ambue mba’e oñembyaíva tata rupi, pejohéi ýpe.

24Pejoheiva’erã avei pende aokuéra pe ára 7-hápe ha uperire peẽ penepotĩta; ha uperire ae ikatu peike ñande rekohápe.

25Ha Nanderuete oñe’ẽ Moiséspe ha he’i:

26Peipapa nde, pa’i Eleazar ha tríbu ruvichakuéra ndive, umi mba’erepy pegueruva’ekue ñorãirõgui: kuimba’ekuéra, kuñakuéra ha tymbakuéra,

27ha pemboja’óta mbyte rupi umi mba’erepy pejapyhyva’ekue, umi osẽva’ekue ñorãirõme ha mayma ambue atýpe g̃uarã.

28Pemboykéta pende Ruetépe g̃uarã, umi kuimba’e mba’égui osẽva’ekue ñorãirõme 500 mba’égui peteĩ mba’e, taha’e kuimba’e, térã kuña, téra gueikuéra, térã búrro térã ovechakuéra.

29Umi mba’e oñembyatýva ha pejapyhýta ipógui peme’ẽta pa’i Eleazárpe pende Ruetépe g̃uarã, mba’e kuave’ẽmby ramo.

30Ha umi Israel ñemoñare mba’égui, pemboykéta opaite 50 mba’égui peteĩ mba’e, taha’e kuimba’e térã guéi, térã búrro, térã ovecha, térã opaichagua ambue tymba, ha peme’ẽta Leviguakuérape, ha’ekuéra oñangarekógui pende Ruete róga jojohuha rehe.

31Moises ha pa’i Eleazar ojapopa Ñanderuete he’i hagueichaite Moiséspe.

32Ha umi mba’erepy ojegueruva’ekue ñorãirõgui oĩ: 675.000 ovecha,

3372.000 vaka,

3461.000 búrro,

35ha kuñakuéra apytégui oĩ umi kuñataĩ oikuaa’ỹva gueteri kuimba’e, oĩ 32.000;

36ha umi osẽva’ekue ñorãirõme oñeme’ẽ 337.500 ovecha;

37ha ko’ã ovechágui oñeme’ẽ pende Ruetépe 675 ovecha.

38Umi vakágui oñeme’ẽ ichupekuéra 36.000; ha ko’ãvagui oñeme’ẽ Ñanderuetépe g̃uarã imba’e ramo 72.

39Umi búrrogui oñeme’ẽ 30.500; ha ko’ãvagui oñeme’ẽ Ñanderuetépe g̃uarã imba’e ramo 61.

40Ha hetãyguakuéragui 16.000; ha ko’ãvagui oñeme’ẽ Ñanderuetépe g̃uarã 32.

41Ha ãva Moises ome’ẽ kuave’ẽmby ramo Ñanderuetépe g̃uarã, pa’i Eleazar pópe, Ñanderuete he’i haguéicha Moiséspe.

42Ha ambue Israelgua mba’erã Moises omboykéva umi kuimba’e ohova’ekue ñorãirõme,

43ha ohupity ichupekuéra g̃uarã: ovechakuéragui 337.500;

44vakágui 36.000;

45 búrrogui 30.500;

46ha hetãyguakuéragui 16.000;

47ha umi Israel ñemoñare mba’égui, Moises ojapyhy opaite 50 mba’égui peteĩ mba’e, taha’e tetãygua térã tymba, ha ome’ẽ Leviguakuérape, ha’ekuéra oñangarekógui Ñanderuete róga jojohuha rehe, Ñanderuete he’i haguéicha Moiséspe.

48Umi soldádo ruvicha 1000 arigua, ha 100 arigua ou Moises rendápe,

49ha he’i ichupe: Ore, ne rembiguái, roipapáma opaite kuimba’e ohova’ekue ñorãirõme ha oĩmava’ekue ore poguýpe, ha oĩmbaite hikuái gueteri,

50upévagui roikuave’ẽse Ñanderuetépe, peteĩteĩva umi mba’e rojohuva’ekuégui: Jeguaka oroguiguáva, pyapy reheguáva, kuãirũ, namichãi ha ajuriguakuéra, rohupity hag̃ua perdon ore angaipakuéragui ha roñemoĩ porã jevy hag̃ua Ñanderuete ndive.

51Ha Moises ha pa’i Eleazar orecibi ichuguikuéra pe óro ha umi jeguaka.

52Ha umi óro ojegueruva’ekue oikuave’ẽ hag̃ua Ñanderuetépe oĩkuri 187 kílo.

53Umi soldádo ogueraha apárte avei mba’erepy umi tetãygua ombopoguyva’ekuégui.

54Upéicha Moises ha pa’i Eleazar ombyaty pe óro umi mburuvicha 1000 ha 100 ariguágui, ha ogueru hikuái pe óga jojohuhápe, Israel rogaguasukuéra imandu’a hag̃ua Ñanderuete pytyvõguasu rehe.