Isaías 37 - Biblia en Guaraní - ?anderuete ?e’? Por? 2015

Ñanderuete oipytyvõ Ezequíaspe

1Ha ojehu, pe tetã ruvicha Ezequías ohendúvo ko’ã mba’e, omondoro avei ijao, ha oñemonde rire ao vosakuépe oike Ñanderuete rógape.

2Upéi Ezequías omondo Eliaquim, pe mba’erepy ñangarekohárape, Sebna, pe kuatia haihára, ha umi pa’i itujavévape, oñemondepa rire ao vosakuépe, pe proféta Isaías, Amos ra’y rendápe.

3Ha he’i hikuái ichupe: Péicha Ezequías he’iuka ndéve: Ko ára kóva ningo jepy’apy, jehavira ha ñemotĩ ára; pe kuña oĩ imembymbota hag̃uáicha, opa’ã katu imemby.

4Ikatu porãnte ningo Ñanderuete, nde Jára ohendúra’e Rabsaces ñe’ẽngue, Asíria retã ruvichaguasu ombouva’ekue oñe’ẽvai hag̃ua Ñanderuete rehe, pe Oikovéva tapia g̃uarã. Ñanderuete, nde Jára, tohavira ichupe umi ñe’ẽvai he’iva’ekue rehe; eñembo’emína nde umi tetãygua hembymíva rehe.

5Ha Ezequías rembiguaikuéra og̃uahẽ Isaías rendápe.

6Upéramo Isaías he’i ichupekuéra: Péicha pejéta pende járape: Péicha he’i Ñanderuete, ani rekyhyjétei pe ñe’ẽvai rehendúva Asíria retã ruvicha rembiguaiguasúgui.

7Péina ápe Che amoĩta ipype peteĩ pytu, ha ohendu rire ñe’ẽ guyguy oho jevýta hetãme; ha Che voi ambosako’ipáta ha’e omano hag̃ua kyse puku rãimbe rupi hetãteépe.

8Ha oho jevy Rabsaces, ojejohu hag̃ua Asíria retã ruvichaguasúpe ojeitývo Libna ári; ohendúma voi opoi haguéma Laquísgui.

9Ha oje’e ichupe: Tirhaca, pe Etiopía retã ruvicha osẽma nerãirõ hag̃ua; ha ohendúvo péva, omondo ñe’ẽ rerahahára Ezequías rendápe, ha he’iuka ichupe:

10Péicha pejéta Ezequías, Juda retã ruvichápe: Aníke nembotavýtei, nde Jára, nde rejerovia ramojepe hese, ha ere: Jerusalen ndo’amo’ãi Asíria retã ruvicha poguýpe.

11Ehendu porãke, nde voi ningo rehendúma mba’épa ojapóra’e Asíria retã ruvicha mayma tetãnguéra rehe, ha’e ningo ohundipa voi; ha ikatu nga’u piko nde repyta rei.

12Umi tetã jára oipytyvõ piko ra’e umi tetã ahundipava’ekuépe: Gozan, Haran, Résef ha umi Eden ñemoñarenguérape, oikova’ekue Telasárpe.

13Mamo piko opyta Hamat retã ruvicha, Arfad retã ruvicha ha umi táva ruvicha Sefarvaim, Hena ha Ivágui.

14Ha Ezequías ojapyhy umi kuatiañe’ẽ pe ñe’ẽ rerojahára pógui, ha omoñe’ẽ rire ojupi Ñanderuete rogaguasúpe, ha oipyso pe kuatiañe’ẽ Ñanderuete renondépe.

15Ha Ezequías oñembo’e Ñanderuetépe he’ívo péicha:

16Che Ruete, yvága atykuéra Jára, Israel Jára, reguapýva querubinkuéra ári, Nde añónte ore Ruete ha avei ko tetã Jára; Nde voi umi yvága ha ko yvy apohare.

17Ore Ruete emboykéna nde apysa ha ejapysaka, ejesape’ána, Nde, ore Ruete ha ehecha; rehendúma umi mba’e Senaquerib he’iukáva, oñe’ẽ vaívo nderehe, ore Jára Oikovéva rehe.

18Añetehápe, Ore Ruete, pe Asíria retã ruvicha ohundipa umi tetãme ore jerekuévo oĩva guive.

19Omombopa ijarakuéra tatápe, umía ndaha’éi voi jára añeteguáva, yvyarigua rembiapokuénte, ojejapova’ekue yvyra ha itágui, upevaguínte ohundipakuaa avei ichupekuéra.

20Ha ko’ág̃a, Nde, ore Ruete, ore Jára tee, oreguenohẽ ipógui, mayma tetã yvy apére oikóva guive toikuaa Nde ha’eha ore Ruete, yvága atykuéra Jára.

21Upémaramo Isaías, Amos ra’y, he’iuka Ezequíaspe: Péicha he’iuka ndéve Ñanderuete, Israel Jára; upe remba’ejeruremava’ekue chéve Senaquerib, Asíria retã ruvicha rehe ahendupáma voi,

22ha ko’ã ñe’ẽ Ñanderuete he’iuka ndéve hese: Pe kuñataĩ, Sion rajy (Jerusalen), opuka ha oñembohory nderehe; ha Jerusalen membykuéra oñeakãmbovava nde rapykuépe.

23Mávarehepa reñembohorýra’e, ha mávarehepa reñe’ẽvaíra’e. Mávarehepa remopu’ãra’e ne ñe’ẽ ha rehupi nde resakuéra. Israel Jára rehe Pu’akapáva rehe reñemoĩra’e.

24Ne rembiguái rupi reñe’ẽvai yvága Jára rehe, ha erékuri: Che cárro ñorãirõ megua hetaite reheve ajupíta umi cérro ijyvatevehápe Líbano ykére; aikytĩta icédro ijyvatevéva, icipres ojeporavopyréva, ag̃uahẽ hag̃ua hu’ã yvate ha ika’aguy mbyte peve.

25Che ajo’o ykua hay’u hag̃ua ha che py oguata hatã rupi ambohypa opaite Egípto ysyrykuéra.

26Nerehendúi piko ra’e pe oje’emava’ekue: Ymaiterei guivéma Che ha’e ha ambosako’íma umi mba’e añongatúma che apytu’ũkuápe ajapo hag̃ua, ko’ág̃a ae katu ojehuhína, nde reitykuaa umi táva ikorapyjere reheve hemby hag̃uánte ita atyrakuéra.

27Umi tavaygua ikangypa, oñemondýi, otĩ hikuái ha oiko hikuái ku ñana ñu rupiguáicha térã ka’avo rovyũicha ha opyta hikuái ku kapi’ícha okakuaáva óga apére, ipirupa hi’aju mboyve peve.

28Che aikuaa porã nde reguapy térã reñembo’y ramo, reho térã reju ramo, ha aikuaa porã avei nde reñemoĩ hague cherehe.

29Chendive voi ningo ndepochy, ha og̃uahẽma avei che apysápe reñembotuicha hague, upévare amoĩta che ty’ãine tĩ rehe, ha kavaju juru jokoha (fréno) nde jurúre, ha romondo jevýta pe tape reju haguérupi.

30Ha Ezequíaspe g̃uarã ko’ã mba’e oikóta techaukaha ramo; ko áño kóvape re’úta ijehegui reínte heñóiva, ha uperiregua áñope umi ijehegui rei heñóitava avei; ha pe áño mbohapyhápe reñemitỹta ha remono’õta kóga ra’ỹingue, ha reñotỹta parralty, ha re’úta hi’akuégui.

31Ha umi okañyva’ekue, ha umi hembyva’ekue Juda rógagui, hapo ha hi’a porã jevýta.

32Jerusaléngui osẽta pe aty hembyva’ekue, ha Sion cérrogui umi oñeguenohẽva’ekue jejopy vaígui, yvága atykuéra Jára mborayhu rakate’ỹ ojapopáta ko’ã mba’e.

33Upévare Ñanderuete péicha he’i Asíria retã ruvicha rehe: Ndoikemo’ãi ko táva kóvape, ha hu’ykuéra noñemombomo’ãi ipype, nog̃uahẽmo’ãi táva rokẽ renondépe isoldádo rete mo’ãha reheve, ha nopu’ãmo’ãi yvy ohasa hag̃ua itáva tápia ári.

34Pe tape ou hague rupi ojevýta, ha ndoikemo’ãi ko táva kóvape, he’i pende Ruete.

35Che voi ningo añangarekóta ko táva kóva rehe aipytyvõ hag̃ua, Che ha che rembiguái David rayhupápe.

36Ha osẽ Ñanderuete yvága rembiguái ha ojuka 185.000 Asiriayguápe oñembyaty haguépe. Ha Judaygua opu’ãvo ambue pyhareve ohecháma hikuái hesekuéra ija’e’ỹva ojepysopa yvýre.

37Upémaramo Senaquerib, pe Asíria retã ruvicha, ojevy ha opyta Nínivepe.

38Ha ojehu ningo ha’e omomba’eguasu jave ijára Nisrócpe, ita’ýra Adramelec ha Sarézer oike itupãópe ojuka hag̃ua ichupe kyse pukúpe, ha upéi okañy hikuái cérro guasuArarat retãme; ha ambue ita’ýra Esarhadon oisãmbyhy Senaquerib rendaguépe.