2 Réyes 13 - Biblia en Guaraní - ?anderuete ?e’? Por? 2015

Joacaz oiko Israel retã ruvicha ramo

1Joas, Ocozías ra’y, oisãmbyhy rire Juda retã ruvicha ramo 23 áñoma, Joacaz, Jehu ra’y, onñepyrũ oisãmbyhy Israel retã ruvicha ramo Samáriape; ha’e oisãmbyhy 17 áño.

2Ha ojapo ivaíva Ñanderuete resa renondépe, ha oiko Jeroboam, Nebat ra’y, angaipápe, omoangaipava’ekue Israelguakuérape, ha noñemboykéi hape vaígui.

3Ha Ñanderuete pochy hendy Israel rehe, ha omoĩ Israel retã Hazael, Síria retã ruvicha pópe, ha Ben-adad, Hazael ra’y pópe, heta áño pukukue.

4Joacaz katu oñembo’e Ñanderuetépe, ha Ha’e ohendu ichupe, oma’ẽgui Israel jepy’apy rehe Síria retã ruvicha ojopýgui ichupekuéra.

5Ha Ñanderuete omoĩ Israélpe peteĩ pytyvõhára, ojei hag̃ua Siriaygua poguýgui; upéicha Israel ñemoñarenguéra oiko jevy hogakuérape jepiguáicha.

6Upeichavéramo jepe noñemboykéi Jeroboam rogaygua angaipágui, omoangaipava’ekue Israelguakuérape; umía oiko hi’angaipápe ha omomba’eguasu avei Asera ra’ãnga Samáriape.

7Joacaz soldádo atyguasúgui hembýnte 50 kuimba’e kavaju arigua, 10 cárro ha 10.000 kuimba’e yvy rupigua; pe Síria retã ruvicha ohundipágui, ha ohejágui ichupe ku yvy timbo oñepyrũmba hag̃uáicha hese.

8Ha ambue Joacaz rembiapokue, ha opaite mba’e ojapova’ekue ha ipy’aguasukue, ojehaipa Israel retã ruvichakuéra rembiapokue kuatiañe’ẽme.

9Ha Joacaz omano rire, oñeñotỹ ichupe Samáriape, ha hendaguépe oisãmbyhy ita’ýra Joas.

Joas opyta Israel retã ruvicha ramo

10Joas ombotývo 37 áño Juda retã ruvicha ramo; Joas, Joacaz ra’y, oñepyrũ oisãmbyhy Israel retã ruvicha ramo Samáriape; ha’e omoakã hetãyguakuéra 17 áño Samáriape.

11Ha’e ojapo ivaíva Ñanderuete resa renondépe; ha ndojeíri Jeroboam, Nebat ra’y angaipágui, omoangaipava’ekue Israelguakuérape, oikónte uvei hi’angaipápe.

12Ambue Joas rembiapokue, ha opaite mba’e ojapova’ekue guive, ha mba’éichapa oñeha’ã ojeity hag̃ua Amasías, Juda retã ruvicha ári, ojehaipa Israel retã ruvichakuéra rembiapokue kuatiañe’ẽme.

13Ha Joas, omano rire Jeroboam oisãmbyhy hendaguépe iguapyhaguasúpe; ha Joas oñeñotỹ Samáriape, Israel retã ruvichakuéra ndive.

Eliséo profecía paha ha iñemano

14Eliséo hasy, omano hag̃uáicha. Joas, Israel retã ruvicha, tasẽme og̃uahẽ hendápe ha he’i: Che rutee, che rutee, nde ningo Israel ñorãirõ carrokuéra ha kavaju arigua aty.

15Ha Eliséo he’i: Ejapyhy peteĩ guyrapa ha mbovymi hu’y. Ha ha’e ojapyhy peteĩ guyrapa ha mbovymi hu’y.

16Upéi Eliséo he’i Israel retã ruvichápe: Emoĩ nde po guyrapa rehe. Ha Joas omoĩ ipo guyrapa rehe. Upéramo Eliséo omoĩ avei ipo pe tetã ruvicha po ári,

17ha he’i: Eipe’a pe ovetã oĩva kuarahyresẽ gotýo. Ha Joas oipe’a rire, Eliséo he’i: Ñanderuete hu’y peneguenohẽtava Siriayguakuéra poguýgui; reikutútagui Siriayguakuérape Afécpe, rehundi peve ichupekuéra.

18Ha he’i jevy ichupe: Ejapyhy hu’ykuéra. Ha pe Israel retã ruvicha ojapyhy riréma, Eliséo he’i ichupe: Umíva einupã yvy rehe. Ha ha’e oinupã mbohapy jevy ha upéi oheja.

19Upémaramo Ñanderuete rembiguái Eliséo ipochy hendive, ha he’i ichupe: Reinupã rire 5 térã 6 jevy peve sarambi rejapova’erãmo’ã Síriayguakuéragui, ndopytavéi peve avave, ko’ág̃a katu mbohapy jevýnte ndepu’akáta Siriaygua rehe.

20Ha omano Eliséo ha oñeñotỹ ichupe. Ha pe áño péva opapotávo, Moabgua mondaha aty ou ha oike Israel retãme.

21Ha oñeñotỹ jave peteĩ kuimba’e, oñeha’ãrõ’ỹ hágui og̃uahẽ mondaha aty, upévo omombo hikuái pe te’õngue Eliséo tyvýpe (sepultúrape) ha oho upégui, ha pe te’õngue ojávo Eliséo kanguekue rehe, oikove jevy, ha opu’ã oñembo’ývo.

22Hazael, Síria retã ruvicha, katu ojopy vai Israélpe, Joacaz oikove aja pukukue.

23Ha Ñanderuete oiporiahuvereko ichupekuéra ha oma’ẽ hesekuéra. Ha ome’ẽ haguére iñe’ẽ Abraham, Isaac ha Jacóbope, ndohejái Israel oñehundiete ko ára kóva peve.

24Ha Hazael, Síria retã ruvicha, omano, ha hendaguépe oisãmbyhy ita’ýra Be-nadad.

25Ha Joas, Joacaz ra’y, oipe’a jevy Ben-adad, Hazael ra’y pógui, umi táva ñorãirõpópe itúva oipe’ava’ekue Joacaz pógui. Mbohapy jevy Joas ipu’aka Siriayguakuéra rehe ha omoĩ jevy umi táva Israel poguýpe.