Deuteronómio 22 - Biblia en Guaraní - ?anderuete ?e’? Por? 2015

1Rehecha ramo nde rapicha rymba guéi térã ijovechara’y okañyva’ekue, reipytyvõva’erã ichupe ha eraha jevyva’erã nde rapicha rymba ijárape.

2Ha nde rapicha ndaha’éi ramo nde róga ypy rupigua, térã ndereikuaái ramo ichupe, upéicharamo egueraha nde rógape, nde rapicha ou peve ipiári, ha reme’ẽ jevyva’erã ichupe.

3Péicha rejapova’erã hymba búrro rehe, ijaokuéra rehe ha opaite mba’e nde rapichágui okañyva’ekue rehe ha nde rejohúva guive rehe; ndaikatúi nereipytyvõivo ichupe.

4Rehecha ramo nde rapicha rymba guéi, térã ibúrro ho’áva tapépe, nderepiaiva’erã ichugui; reipytyvõva’erã uvei ichupe omopu’ã jevy hag̃ua.

5Pe kuña nomondeiva’erã kuimba’e ao, ha kuimba’e nomondeiva’erã kuña ao; oimeraẽ ojapóva ko’ã mba’e ombopochy Ñanderuetépe.

6Tape rupi rejohu ramo guyra raity oimeraẽ yvyra rehe, térã yvy apére rei, ha hupi’a térã ita’ýra ramo, térã isy oñeno ramo hi’ári nderejapyhyiva’erã isy ita’yrakuéra reheve.

7Rehejava’erã isy oho ha ikatu regueraha ita’yrakuérante ne mba’erã ramo, oho porãmba hag̃ua ndéve, ha reikove puku hag̃ua.

8Remopu’ã ramo nde róga pyahurã, emongora nde róga ape ani hag̃ua reñemoangaipa, oĩ ramo ho’áva upégui ha omano.

9Nde parralty pa’ũme ani reñotỹ ambue ñemitỹ, ani oñehundi ndehegui umi reñotỹva’ekue, ha nde parral’a avei.

10Guéi ha búrro neremoĩriva’erã oñondive rembovo hag̃ua nde kokuerã yvy.

11Neremondeiva’erã oñondive ao ojejapóva ovecha rague ha líno inimbógui.

12Ne póncho rehe remoĩva’erã jeguaka inimboguiguáva irundyve apýrape.

Teko potĩ rembiapoukapy

13Oime ramo peteĩ kuimba’e omenda peteĩ kuñataĩre ha oiko riréma hendive ndohayhuvéi ramo ichupe,

14ha upévare he’i rei hese mba’evai opoi hag̃uánte ichugui: Amenda ko kuñataĩ rehe, ha aiko rire hendive ndajohuvéi hese ikuñataĩ reko;

15upéicharamo pe kuñataĩ ru ha isy oguerahava’erã itajýra savana huguy reheve, ohechauka hag̃ua umi karai ancianokuérape oĩva pe táva rokẽme, ombojovake hag̃ua.

16Ha pe kuñataĩ ru he’iva’erã karai ancianokuérape: Che ame’ẽkuri che rajy ko kuimba’épe, hembireko ramo ha ha’e ndaija’evéigui hese,

17opoise ichugui ha upévare omoĩ vaise reínte ichupe, he’ívo: Ndajohuvéima ikuñataĩ reko nde rajýre; ha péina ápe pehecha techaukaha ramo isavana huguy reheve, che rajy kuñataĩ reko rehegua, ha oipysova’erã hupa ao umi ancianokuéra renondépe.

18Upéicharamo umi anciáno ojapyhyva’erã pe kuimba’épe ha ohavirava’erã ichupe;

19ha ha’e ome’ẽva’erã pe kuñataĩ rúpe 1,1 kílo pláta omoherakuã vai rei haguére peteĩ kuñataĩ Israelguápe; ha oguerekova’erã ichupe hembireko ramo ha ndaikatumo’ãi opoi ichugui oikove aja pukukue.

20Ha ojejohu ramo añetéra’e pe kuñataĩ naikuñataĩ rekovẽimaha,

21upéicharamo oñeguenohẽva’erã ichupe itúva róga rokẽme, ha umi kuimba’e upe táva pegua ojapiva’erã itápe ha’e omano meve, oñemohembiapo vaietégui Israel retãme ha oiko vaígui itúva rógape; péicha reipe’áta mba’evai pende apytégui.

22Ojejohu ramo peteĩ kuimba’e oñeno peteĩ kuña omendáva ndive, mokõivéva omanova’erã, pe kuimba’e oñenóva pe kuña ndive, ha upe kuña avei; upéicha reipe’áta mba’evai Israel retãgui.

23Peteĩ kuimba’e oiko ramo táva ryepýpe peteĩ kuñataĩ omendapotáva ambue ndive,

24upéicharamo peguenohẽva’erã mokõivévape pe táva rokẽme, ha pejapi itápe mokõivévape omano meve hikuái, pe kuñataĩ ndosapukáiri haguére pe tavapýpe, ha upe kuimba’e oñembohory haguére hapicha rembirekorã rehe; upéicha peipe’áta mba’evai pende apytégui.

25Peteĩ kuimba’e ojohu ramo ñúme peteĩ kuñataĩ omendapotávape, ha mbaretépe oñeno ramo hendive, upéicharamo upe kuimba’e añónte omanova’erã;

26ha upe kuñataĩme ndojejukamo’ãi; ndaipórigui ipype mba’érepa ojejuka hag̃ua ichupe; péva hína ku kuimba’e opu’ã ramoguáicha ñúme hapicha rehe ha ojuka ichupe, upeichaite ojehu avei ko kuñataĩme.

27Pe kuimba’e ojohúgui ichupe ñúme; ha pe kuñataĩ omendapotáva osapukái ramojepe, ndaipóri avave osalvava’erãva ichupe.

28Peteĩ kuimba’e ojohu ramo peteĩ kuñataĩme ne’ĩrava gueteri ome’ẽ iñe’ẽ omenda hag̃ua, ha ojapyhy ichupe ha oñeno hendive, ha ou ojekuaa;

29upéicharamo upe kuimba’e oñenomava’ekue hendive ome’ẽva’erã pe kuñataĩ rúpe 558 grámo pláta ha upe kuñataĩ opytava’erã hembireko ramo, ha’e omotĩgui ichupe; ha ndaikatumo’ãi opoi ichugui oikove aja pukukue.

30Avave ndojapyhyiva’erã itúva rembirekópe, ha nomongy’aiva’erã itúva rupa.