Ezequiel 28 - Biblia en Guaraní - ?anderuete ?e’? Por? 2015

1Ou chéve Ñanderuete ñe’ẽ, ha he’i:

2Kuimba’e ra’y, ere Tíro ruvichápe: Péicha he’i Yvága Atykuéra Jára, reñembotuicha haguére nde py’apýpe, ha erégui: Che ningo peteĩ Jára, ha aguapýta guapyhaguasúpe yguasu mbytépe; nandéi katu peteĩ jára, yvy ariguánte nde, reimo’ã ramojepe nde nearanduha peteĩ járaicha.

3Ema’ẽ porãke nde reimo’ã nearanduve Daniélgui ha ndaipóri mba’eve ñemimby okañýva ndehegui.

4Ne arandu ha ne akãguapy rupi remboheta ne mba’erepy, rembyatývo óro ha pláta nde róga ñongatuhápe.

5Ha ne aranduguasuete ha ne mba’e ñemumby rupi rembohetaiterei ne mba’erepy; ha ne mba’erepyetaitereígui reñembotuicha nde py’apýpe,

6upévagui péicha he’i pende Ruete: Reñembotuichágui nde py’apýpe peteĩ yvága jararõ guáicha,

7che aguerúta nde ári tetã ambueygua, umi imbaretevéva tetãnguéra apytégui, ohekýi hag̃ua ikyse puku ne arandu porãite rehe ha omongy’a hag̃ua nde reko mimbipáva.

8 Sepultúrape ndepoíta hikuái, ha remanóta umi omanóva yguasu mbytépe ramoguáicha.

9Reñe’ẽta piko nde jukahára renondépe, erévo: Che ha’e peteĩ yvága jára. Nde ningo yvyarigua, nandejárai. Mba’e piko eréta reime jave nde jukahára pópe.

10Umi ipire’i oñekytĩ’o’ỹva omano háicha nde remanóta avei tetã ambueygua poguýpe; Che, Yvága Atykuéra Jára, ha’emava’ekue guive katuete oikopamanteva’erã.

11Ou chéve Ñanderuete ñe’ẽ ha he’i:

12Kuimba’e ra’y, epurahéi peteĩ ñemano jahe’o purahéi Tíro retã ruvicháre, ha ere ichupe: Péicha he’i Jahve, Yvága Atykuéra Jára: Nde nerenyhẽ arandúgui ha neporãitereirasa.

13Reikova’ekue Edénpe, Ñanderuete ka’avotýpe, reñemondeva’ekue opaichagua ita vera hepývape: Ita vera pytã (rubi), itajuve (topácio), itatĩverasakã hovy kangy (jáspe), ita vera hovy ha sa’yju (crisólito), itaparasaky (berílo), ita vera morotĩ hũ (ónice), ita vera hovyũ (zafíro), ita vera pytãvy (carbúnclo), ita vera hovy (esmerálda) ha óro porãvévagui ojejapopa ne mba’e pu pararãnguéra ha ne mimbykuéra, ko’ãva oñembosako’íra’e ndéve reje’apo ypyha árape.

14Nde, querubin (ángel ruvicha) ñangarekohára, Che romoĩkuri pende Ruete cérro ojeporavopyrépe, ha upépe reimeva’ekue ita hendýva apyte rupi ha reguatámi reikóvo ipa’ũme.

15Ndereko porã reje’apo ypyha ára guive, ojejohu peve ndepype ñaña reko.

16Nde reñemongy’aitereive rehóvo nde py’apýpe ne mba’e ñemu rupi, upévagui Che romosẽ Yyvága Atykuéra Jára cérrogui, ha romosẽ umi ita hendýva pa’ũgui, ha querubin ñangarekohára renondégui.

17Neporãitereígui reñembotuicha nde py’apýpe ha nde voi remboyke ne arandu ojehecha porãve hag̃ua ne mimbi, upévagui Che roitýma yvýre ambue tetã ruvichakuéra oñembohory hag̃ua nderehe.

18Heta ne ñaña reko ha ne mba’e ñemu vai rupi remongy’a ne tupãonguéra; upévagui Che amoheñói peteĩ tata ne mbytetégui nembokusugue hag̃ua ha ne tanimbukue oñemosarambiva’erã yvy apére maymáva resa renondépe.

19Opaite tetã ndekuaáva guive oñemondýima, ohecha vove umi mba’evaieta ojehútava ndéve; ha reguéta reñehundiete peve.

Ñanderuete ñe’ẽ Sidon rehe

20Ñanderuete ñe’ẽ ou che rendápe ha he’i:

21Kuimba’e ra’y, emoĩ nde rova Sidon rehe, ha eprofetiza ichupe,

22ha eréta: Péicha he’i Jahve, Yvága Atykuéra Jára, eikuaa porãke, Che apu’ãta nderehe Sidon, ha ahechaukáta che pu’aka reikuaa hag̃ua Chénte ha’eha yvága Jára; Che rohavira vove reikuaáta che rekópe oĩha justicia (tekojoja) añeteguáva.

23Amboúta mba’asy iñasãiva ha añohẽva’erã pende ruguy pende táva ryepýpe, ha pene re’õnguekuéra ho’a joáta imbytépe, hetaiterei ojejukáta kyse pukúpe; ha oikuaáta hikuái Chénte ha’eha pe Yvága Atykuéra Járaitéva, pende Ruete.

24Ha ndereikomo’ãvéima ñuatĩ ramo Israélpe g̃uarã ni ambue tetãnguérape g̃uarã oikóva Israel jerekuévo. Ndereikomo’ãvéima mba’e akua oikutúva Israélpe, uperire aémante reikuaáta Che ha’eha Yvága Atykuéra Jarateéva.

25Péicha he’i pende Ruete: Ág̃a ambyaty jevy vove Israel retã ambue tetãnguéra apytégui amosarambipa haguégui, upépe ahechaukáta opaite tetãnguéra resa renondépe che reko iporãha ha Israelguakuéra oiko jevýta ijyvyteépe, ame’ẽva’ekue che rembiguái Jacóbope.

26Ha kyhyje’ỹme oikóta hikuái ipype, ojogapóta, oñotỹta hikuái iparralty, oikóta hikuái py’aguapýpe ahavira jave mayma tetãme oikóva guive ijerekuévo ha oñembohoryva’ekue Israel retã rehe ha oikuaáta Che ha’eha pe Yvága Atykuéra Jarateéva.