1Nde, ore Ruete, pe tetã ruvicha ipy’arory nde remombarete haguére ichupe, ha’e ovy’aite Nde reipytyvõ porã haguére ichupe.
2Reme’ẽma ichupe umi mba’e ipy’apy oipotáva, ha nerembotovéi ichugui umi mba’e ojeruremava’ekue. Selah
3Nde resẽ hendápe rehovasa hag̃ua ichupe ha remoĩ iñakãre akã jeguaka oroguiguáva.
4Ha’e ojerure ndehegui tekove, ha Nde reme’ẽ ichupe tekove tapia g̃uarãva.
5Opárupi oñemoherakuã porã ne ñepytyvõ tuicha; tesakã porã ha teraguasuete remoĩ hi’ári.
6Rehovaságui ichupe opaite árape, remyenyhẽ ichupe vy’águi Nde reĩgui hendive.
7Upévare pe tetã ruvicha ojerovia nderehe, ha pe Ijyvatetéva jeporiahuvereko rupi naiñangekõimo’ãi ha’e.
8Nde po ohupitýta opaite umi nderehe ija’e’ỹvape ha nde akatúa ohupitýta umi nderayhu’ỹvape.
9Remoĩta ichupekuéra ku tatakua rendy peguáicha, og̃uahẽ vove nde pochyha ára. Ñanderuete pochy ohundiva’erã ichupekuéra ha hata ombokusuguéta ichupekuéra.
10Reipe’áta ita’yrakuéra ko yvy ape árigui ha iñemoñare ndoikovemo’ãi tetãyguakuéra apytépe.
11Oñeha’ãmba ramojepe ojapo vai hag̃ua nderehe ha ombosako’i ramojepe hikuái ñemiháme iñuhã nosẽ porãmo’ãi opaite mba’e ojaposéva guive.
12Nde voi remuñáta ichupekuéra, ha okañýta ndehegui, nde katu reipysóta nde guyrapa repoi hag̃ua nde hu’y hovakuéra rehe.
13Epu’ãmína, Nde, che Ruete, nde pu’aka reheve, rogueropurahéita ha romomba’eguasúta ne rembiapoguasuete rehe.
Who We AreWhat We EelieveWhat We Do
2025 by iamachristian.org,Inc All rights reserved.
