1Nde, Israel, ani revy’a, ani repopo vy’apópe, ojapo háicha ambue tetãnguéra. Nde repoíma nde Járagui, remyakãratĩ ichupe, ha reiko kuña reko vaícha opa rupiete remopotĩ haguépe trígo, oñeme’ẽ hag̃ua ndéve ne rembiapo ky’a repykue.
2Pende kogaty ha parralty napenemongarumo’ãi haparral’a ndapehykue’omo’ãvéima pende apytépe.
3Israelguakuéra ndopytamo’ãi pende Ruete yvýpe, Efrain ojevýta Egípto ha Asíriape, upépe ho’úta tembi’u ipotĩ’ỹva.
4Ndoikuave’ẽmo’ãvéima víno pende Ruetépe, ha hymbakuéra oikuave’ẽva nombovy’amo’ãvéima Ijapoharépe ha peẽ ndaikatuvéima pegueraha pene pan pende Ruete rogaguasúpe, ha’égui pan oñembyasýva, pene pan peiporúta pemohyg̃uatã hag̃uánte pende rete, nog̃uahẽmo’ãvéima pende Ruete rogaguasúpe.
5Mba’épa pejapokuaa pe arete aja, ha pende Ruete araguasúpe.
6Pema’ẽ porãke, oñehundi hag̃ua ohova’erã Egíptope, ha Ménfispe oñeñotỹta ichupekuéra, ipláta rendaguépe ohupitýnte ñuatĩndy, ha hóga porã rendaguépe opytánte pynondy.
7Og̃uahẽtama umi jejopyguasuha ára, oútama pe ára oñemyengoviataha hembiapo vaikue; Israel oikuaáta iproféta rembiapo ivýro, itarova, ivai ha ipy’aroha.
8Efrain ohundise Ñanderuete profetakuérape, upévare omoĩ iñuhã hapére ha omuña ichupekuéra Ñanderuete rogaguasúpe jepe.
9Umi Efraingua oñemohembiapo vai umi Gibéa peguáicha (Juéces 19); Ñanderuete katu imandu’a porã hembiapo heko pegua’ỹva rehe ha umívare pendehaviráta.
10Yma Che ajohu Israélpe ku parral’áicha ojejohúva desiértope ha ku higo’a tenondevévaicha ombovy’áva upe ojohúvape. Og̃uahẽ rire katu pende rukuéra Baal-peórpe, oñemomombyry hikuái chehegui ha oñeme’ẽ Baálpe ha hembiapo ky’ápe ijára pyahu iky’a háicha.
11Efraingua hetaiterei ramojepe ku guyráicha oñemosarambipáta, hembirekokuéra naimembymo’ãvéima ha ndahyeguasumo’ãvéima.
12Ita’yrakuéra ikaria’ypa ramojepe, aipe’áta kuimba’ekuéra apytégui, cháke Che voi añemomombyrýta avei ichuguikuéra.
13Efrain, Che ahecha haguéicha, ojogua Tírope, oguapyva’ekue yvy porãme, ko’ág̃a katu Efrain oguenohẽ ita’yrakuérape ojejuka hag̃ua.
14Che Ruete, eme’ẽna ichupekuéra umi mba’e Nde reme’ẽséva, emonandi imemby ryru ha ikáma avei.
15Opaite hembiapo vaiete oñepyrũva’ekue Gilgálpe, upépe chepy’aro hendivekuéra; hembiapo vaikuéra rehe, Che amosẽta ichupekuéra che rógagui, ndahayhumo’ãvéima ichupekuéra, imburuvichakuéra oñemoĩmba haguére cherehe.
16Efrain ojejapíma, hapo ipirupáma, ndahi’amo’ãvéi, hyeguasu ramojepe Che voi ajukáta imembykuérape.
17Che Jára omboykéta ichupekuéra, ha’ekuéra naiñe’ẽrendúi haguére ha kañyháme oikóta hikuái ambue tetãnguéra pa’ũme.
Who We AreWhat We EelieveWhat We Do
2025 by iamachristian.org,Inc All rights reserved.
