1Ko’ã mba’e rire Job oñe’ẽ, ha omaldeci hi’ára onace haguépe.
2Ha Job oñe’ẽ pohýi, ha he’i:
3Oñehundímora’e pe ára che aju hague ko yvy apére, ha pe pyhare oje’e ramoguare: Peteĩ kuimba’e ou yvy apére.
4Iñypytũmbámora’e pe ára, ha Ñanderuete hesaráimora’e ha anítei omimbi hesakã hi’ári.
5Pytũ ha ñemano tojerure jevy ichupe, arai hũ toguapy hi’ári ha ára iñypytũva tomondýi ichupe.
6Pe pytũ tomokõ pe pyhare péva ha anítei ojepapa pe pyhare péva umi ára, jasy ha añokuéra apytépe.
7Mba’éicha tamora’e pe pyhare pévape tahyeguasu’ỹ che sy ha toñemoha’eñomi, ha toĩ’ỹ ipype mba’eveichagua menda vy’a.
8 Tomaldeci pe ára umi omaldecikuaáva, ha oñeha’ãva ombopochy hag̃ua Leviatánpe (tejujaguaguasu nonga).
9Taiñypytũ umi mbyja ko’ẽtĩ, anítei ou pe ko’ẽju ha pe ára sakã.
10Nombotýi haguére che sy membyryru rokẽ aĩ haguépe, ha noñomírigui chehegui ko jehasa asy kóva.
11Mba’éguipa che namanóira’e che sy ryépe, térã namanóira’e asẽvo ichugui.
12Mba’upépa chemboguejy hapypa’ũme. Ha mba’upépa ajohúra’e ikáma akambu hag̃ua.
13Che amano rire, apytu’uva’erãmo’ã ko’ág̃a, ake rire yvyguýpe chepy’aguapyva’erãmo’ã ko’ág̃a.
14Umi tetã ruvicha ha umi oporohekombo’éva, omopu’ã ijupekuéra g̃uarã ityvy kotyguasurã (isepulturarã);
15térã umi mburuvicha ombyaty heta óro ha omyenyhẽ hogakuéra plátagui.
16Mba’éguipa namanóira’e ku mitã membykuaréicha, térã umi mitãmi araka’eve ohecha’ỹva ára resakã.
17Upépe umi tekove vai noporomyangekõivéima ha upépe opytu’u umi oiko asyva’ekue.
18Upépe avei opytu’u umi oñeñapytĩva’ekue (presokuéra), ha nohenduvéima hikuái upe oporojopýva ñe’ẽ.
19Upépe oñembojojáma michĩ ha tuicháva, ha pe tembiguái osẽma ijára poguýgui.
20Mba’érehepa Ñanderuete chembou yvy apére aiko asy hag̃ua, ha mba’érehepa Ha’e omoingove tetãyguakuéra ojejopyete hag̃uánte.
21Umía oha’ãrõnte hi’ára paha, ha nog̃uahẽséi, jepevémo oheka hikuái iñemanorã pláta yvyguy peguáicha.
22Ha’e ovy’aite, ha ipy’aroryete ojohu ramo ityvyrã.
23Mba’upépa oñeme’ẽ tekove upe kuimba’e ojejopyetereívape ha Ñanderuete ombotypáva henonderãme opaite tape ani hag̃ua osẽ ijejopy vaígui.
24Pyahẽ asy ningo che rembi’u ha che jahe’o osyry ýicha.
25Umi mba’e chemongyhejéva og̃uahẽma ha umi mba’e ajepy’apývare cherupitýma.
26Ndachepy’aguapýi ha ndapytu’ukuaái, py’a tarova katu chejopyete.
Who We AreWhat We EelieveWhat We Do
2025 by iamachristian.org,Inc All rights reserved.
