Salmokuéra 116 - Biblia en Guaraní - ?anderuete ?e’? Por? 2015

Ñandeuete chepytyvõ porãite

1Avy’a, Ñanderuete ohendu ramo che ñe’ẽ ha che mba’ejerure asy.

2Ha’e oñakãity omoĩgui ijapysa cherendu hag̃ua, che ahenói guive héra.

3Ñemano sãnguéra chejurapa, omanóva retã megua kyhyje chemoĩ vaipáma, jejopy vai ha jepy’apy chejohúma.

4Upeichavéramo jepe ahenói Ñanderuete réra, ha’évo: Nde, ore Ruete, cheguenohẽ che jejopy vaietégui.

5Ñanderuete ipy’a porã ha hekojoja, Ñanderuete oporoporiahuvereko.

6Ñanderuete oñangareko umi ipópe oñeme’ẽmbáva rehe, chekangyete jave Ha’e chemoangapyhy jevy.

7Ejevýna, nde che ánga rejohu haguépe nde pytu’u, Ñanderuete katu ojapo ndéve g̃uarã mba’e iporãva.

8Ha’e cheguenohẽ che jejopy vaietégui, Ha’e omokã jevy che resay ha Ha’e chejoko ani hag̃ua che añepysãnga mba’evére.

9Aikóta Ñanderuete resa renondépe ha umi oikovéva retãme.

10Ajerovia gueteri, ha’e ramojepe: Ajepy’apy vaieteha.

11Che jepy’apy vaiete jave ha’éma: Ijapu ningo mayma kuimba’e ha kuñakuéra.

12Mba’éichapa amyengoviáne Ñanderuetépe opaite mba’eporã cherehe ojapova’ekue.

13Ajapyhýta pe váso tekove añete reheguáva, ha ahenóita Ñanderuete réra.

14Ko’ág̃a ajapóta opaite mba’e aprometeva’ekue Ñanderuetépe, opaite tetãyguakuéra renondépe.

15Hasy asy Ñanderuete resápe umi heko potĩva omano ramo.

16Nde, che Ruete, che añetehápe ne rembiguái, che ningo ne rembiguái membykuimba’e, Nde remondoho pe cadéna oñapytĩva che rekove rehe.

17Aikuave’ẽta ndéve kuave’ẽmby ñemomba’eguasu reheguáva, ha ahenóita nde réra, ore Ruete.

18Ajapóta che ñe’ẽ ame’ẽmava’ekue Ñanderuetépe mayma hetãyguakuéra renondépe.

19Ñanderuete róga korapýpe, Jerusalen mbytépe aikuave’ẽta. Alelúia, pemomba’eguasu Ñanderuetépe.