1Ojehechauka chéve pe pa’iguasu Josue oĩvahína Ñanderuete yvága rembiguái renondépe, ha Satana oĩhína ipo akatúa gotýo oñe’ẽvai hag̃ua hese.
2Ha Ñanderuete ángel he’i Satanáme: Ñanderuete tandeja’o, nde Satana, Ñanderuete oiporavomava’ekue Jerusalénpe, tandeja’o. Kóa piko ndaha’éi peteĩ tata’y oñerenohẽva’ekue tatarendyguasúgui.
3Ha Josue oñemondehína ao ky’a vaípe ha péicha oĩhína pe yvága rembiguái renondépe.
4Ha pe yvága rembiguái oñe’ẽ ha he’i umi henondépe oĩvape: Peipe’a ichugui ijao ky’a vai. Ha ha’e he’i Josuépe: Péicha aipe’a ndehegui ne rembiapo vai, ha romondeuka ao ijeguakapávape.
5Upéi ha’e he’i: Pemoĩ iñakã rehe jeguaka akã rehegua ipotĩva, ha upéi pemonde hese ijaorã, ha upejave Ñanderuete yvága rembiguái oĩhína ñembo’yhápe.
6Ha pe yvága rembiguái oñe’ẽ Josuépe, ha he’i ichupe:
7Péicha he’i ángel atykuéra Jára: Reiko ramo che rapekuéra rehe, ha rejapo ramo che rembiapoukapy he’íva guive nde avei reisãmbyhýta che róga ha reñangarekóta avei che róga korapy rehe, ha ame’ẽta ndéve ne rendag̃ua ko’ãva apytépe.
8Ejapysaka ko’ág̃a, pa’iguasu Josue, nde ha ne irũnguéra ne renondépe oguapýva, peẽ, kuimba’ekuéra peikóta techaukahára ramo. Peikuaa porãke, Che aguerúta che rembiguaiguasurã (hérava) Hoky Pyahúva (Hesu Crísto).
9Pema’ẽ pe itaguasu amoĩva’ekue rehe Josue renondépe, ko itaguasu kóvape oĩ 7 tesa, ha Che voi ahaíta hi’ári, he’i ángel atykuéra Jára, ha aipe’áta peteĩ árape che retã rembiapo vaikue.
10Upe ára upévape, he’i ángel atykuéra Jára, peẽ pehenóita pene irũnguérape pende parral ha hígo guýpe.
Who We AreWhat We EelieveWhat We Do
2025 by iamachristian.org,Inc All rights reserved.
