1Ou chéve Ñanderuete ñe’ẽ, ha he’i:
2Kuimba’e ra’y, emomarandu che rérape Israel profetakuérape, ha ere umi oporomomarandúva ipy’apýpe oĩvante: Pehendúke pende Ruete ñe’ẽ,
3péicha he’i pende Ruete: Cháke peẽ proféta tarova, ndapehechái mba’eve, pende py’apýpe oĩvante pemomarandu (peprofetiza).
4Umi aguara oiko háicha tapere rupi, upéicha Israel profetakuéra oiko avei.
5Peẽ ndapejapói mba’eve peñangareko porã hag̃ua Israel retã rehe ha napemopu’ãi peteĩ korapyjere yvate Israel róga jerekue rehe, ikatu hag̃uáicha pendepu’aka og̃uahẽ ramo Ñanderuete ñorãirõha ára.
6Ohecha hikuái techapáy (vision) gua’u ha ta’yvõmby ijapúva, upeichavérõ he’i hikuái: Péicha he’i Ñanderuete: Che katu ndajokuáiri ichupekuéra, ha hi’ári, oha’ãrõ hikuái Che amoañete opaite ñe’ẽ rei he’íva guive hikuái.
7Ndapehechái piko ra’e techapáy gua’u, ha ndapejéi piko ra’e ta’yvõmby japu, upeichavéramo jepe peje: Ñanderuete katu he’i, Che nda’éi mba’eve ichupekuéra.
8Upévare pende Ruete he’i: Peẽ peporombotavy ha pehechágui techapáy japu, Che, pende Ruete añemoĩta penderehe.
9Amopu’ãta che po umi oporomomarandu gua’úva rehe, umi ojehechaukáva payetépe ha imba’ekuaáva rehe, umía ndopytamo’ãvéima che retã apytépe, ha herakuéra ndojehaimo’ãi Israel róga kuatiañe’ẽme, ha nog̃uahẽmo’ãvéima hikuái Israel retãme; ha upévo peikuaáta Che ha’eha pende Ruete pe oikovéva.
10Ombotavy hikuái che retãyguakuérape he’ívo: Py’aguapy oĩha, ndaipóri ramo py’aguapy; ha’ete ku peteĩ omopu’ã vai vaíva peteĩ óga tápia, ha ambuekuéra pya’e omomorotĩ cálpe (ani hag̃ua avave ohecha hembiapo vaikue).
11Ha ere umi omomorotĩvape pe tápia cálpe: Ho’apáta ou vove amaguasu ha amandáu, ha yvytu’atã vai ojokapáta.
12Ha pe óga tápia ho’a vove, noporanduichéne piko ndéve hikuái: Mamóiko oime pe cal peiporuva’ekue pemomorotĩ hag̃ua pe tápia.
13Upévare, péicha he’i pende Ruete: Pochypópe ahejáta pe yvytu’atã, amaguasu ha amandáu ohundipa.
14Ha péicha aitypáta pe óga tápia peẽ pemomorotĩva’ekue cálpe, ha aitýta yvýre, ha nandi opytáta ipyenda (cimiénto) ho’apa peve, ha peñehundipáta iguýpe; upéichamante peikuaáta Che ha’eha pende Ruete.
15Péicha añohẽ che pochy pe óga tápia rehe ha umi omomorotĩva’ekue rehe, ha ha’éta peẽme: Ndaiporivéima pe óga tápia, ha ndaiporivéima umi omomorotĩva’ekue,
16umi Israel proféta omomarandúva Jerusalen rehe, ojehecháva payetépe he’i ohecha hague py’aguapy, ndaipóri ramojepe py’aguapy, he’i pende Ruete.
17Ha nde, kuimba’e ra’y, emoĩ nde rova umi ne retã rajykuéra rehe oprofetizáva ipy’apýgui reínte oĩva, ha eprofetiza ichupekuéra,
18ha ere: Péicha he’i pende Ruete: Umi oikóva ombovyvy pyapy ha akãre g̃uarã ao ipajéva (oiporu hag̃ua mbo’ýrõ guáicha mitã ha kakuaávape g̃uarã, oity hag̃ua iñuhãme yvyariguakuérape). Pemoñuhãse ningo che retãygua angakuérape pehundi hag̃ua ha ambuekuéra rupi peẽ peñemoĩ porãse peiko porã hag̃ua.
19Peẽ nachemomba’eguasúi che retãyguakuéra renondépe, michĩmi cebáda (ojogua trígope) ha pan pehẽngue rehe pejuka umi tapicha omano’ỹva’erãme, ha pemoingove umi tapicha oikove’ỹva’erãme, peẽ peiko pembotavy che retãyguakuérape ojapysakáva pene ñe’ẽ japu rehe.
20Upévare péicha he’i pende Ruete: Peikuaa porãke, Che apu’ãta penderehe ha aipe’áta pene mbo’y pende retégui, ha’ekuérarupi pemoñuhã pende rapicha angakuérape; Che aguenohẽta ichupekuéra pende pógui, ha apoíta hi’angakuéragui peẽ pemoñuhãmava’ekue ha toveve jevy guyráicha.
21Che amondoróta avei pene akã ñuvãha, aguenohẽ hag̃ua che retãyguakuéra pende poguýgui, ha ndoikomo’ãvéima pene ñuhãme; ha peikuaáta Che ha’eha pende Ruete.
22Pemongyhyje haguére umi heko porãvape pende japu rupi, ha pemokyre’ỹ iñañávape ani hag̃ua osẽ hape vaígui oikove puku hag̃ua,
23upévare ndapehechamo’ãveimava’erã visionkuéra (umi mba’e ojehechaukáva payetépe ni ndapeha’yvõveimava’erã); Che voi aguenohẽta che retã pende poguýgui, ha peikuaáta Che ha’eha pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
