Números 14 - Biblia en Guaraní - ?anderuete ?e’? Por? 2015

Umi Israelgua oñemoĩ Ñanderuete rehe

1Upéramo opaite tetãyguakuéra guive osapukái ha hasẽ pe pyhare pukukue.

2Ha Israel ñemoñarenguéra oñe’ẽvai Moises ha Aaron rehe; ha mayma Israelguakuéra he’i ichupekuéra: Romanonteva’erãmo’ã Egípto retãme, térã romanova’erãmo’ãra’e ko desiérto kóvape.

3Mba’upépa Ñanderuete oregueru ko yvýpe ro’a hag̃ua kyse puku rãimbépe, ore rembirekokuéra ha ore ra’ykuéra ho’áta ipopekuéra. Iporãve roho jevy Egípto retãme.

4Ha he’i ojupe hikuái: Jaiporavo peteĩ mburuvichaguasu jajevy hag̃ua Egíptope.

5Upémaramo Moises ha Aaron oñesũ tĩndyhápe Israel ñemoñarenguéra aty renondépe.

6Ha Josue, Nun ra’y, ha Caleb, Jefune ra’y, ohova’ekue avei Canaan yvy ohechávo, omondoro ijao,

7ha oñe’ẽ mayma Israel ñemoñarenguéra atýpe, ha he’i: Pe yvy rohova’ekue rohecha ningo yvy neporãitereíva.

8Ñanderuete hory ramo ñanendive, Ha’e ñandereraháta pe yvy pévape, ha ome’ẽta ñandéve pe yvy osyryhápe kamby ha eíra,

9upévagui ani peñemoĩ Ñanderuete rehe, ha ani pekyhyjétei hetãyguakuéragui, ñande ñamokõta ichupekuéra pan peh…nguéicha; ipytyvõhára ojeíma ichuguikuéra, ha ñanendive oĩ Ñanderuete, upévare ani pekyhyje ichupekuéra.

10Upémaramo umi ijatýva ojukase ichupekuéra itápe, Ñanderuete reko jajaipa katu ojehechauka pe óga jojohuha rendápe mayma Israel ñemoñarenguéra renondépe.

11Ha Ñanderuete he’i Moiséspe: Araka’e pevépa ko’ã tetãygua chembopochýta. Araka’e pevépa ndojeroviamo’ãi cherehe, jepevémo ajapo umi milágro ijapytepekuéra.

12Mba’asy vai rupi ahundíta ichupekuéra opa peve, ndehegui katu ajapóta peteĩ tetã ndetuicháva ha imbaretevéva ichuguikuéra.

13Moises katu ombohovái Ñanderuetépe: Upérõ umi Egiptoygua ohendúta ko’ã mba’e, ijapytégui reguenohẽva’ekue ko tetã kóva pu’aka ndetuicha rupi.

14Mba’épa he’íne avei umi ambue tetã, ohendu ramo ko’ã mba’e; Nde, ore Ruete, reikóva ore mbytépe, ore rovaképe rejehechauka hague ore Jára ramo, ha nde arai oĩha ore ári, arakuépe Nde reho ore renonderãme arai rupi ha pyharekuépe tata rupi.

15Nde rejukase ko’ã tetãyguakuérape peteĩ kuimba’eichaite ramo; ha umi ohendumava’ekue ne rerakuãguasu he’íne:

16Ijára (Jahve) ndaikatúigui omoinge ichupekuéra pe yvy Ha’e opromete haguépe, upévare ojukánte ichupekuéra desiértope.

17Ko’ág̃a che ajerure ndéve ehechauka nde reko añeteguáva, Nde ere haguéicha:

18Ore Ruete hasy ipochy hag̃ua ha tuicha iporiahuvereko, Nde reperdona umi kuimba’e ha kuña rembiapo vai ha heko pu’ãsévape, pe angaipavóra opoise’ỹva hembiapo vaígui katu Nde rehaviráta; Nde voi rehaviráta tuvakuéra, mbohapy térã irundy ñemoñarenguéra peve (generaciónes peve).

19 Eperdona jevy ko ne retã reko ñaña nde poriahuvereko tuicha rupi, reperdona haguéicha, rosẽ ramoguare Egíptogui ko’ág̃a peve.

Ñanderuete ohavira Israélpe

20Upémaramo Ñanderuete he’i: Che aperdonáta ichupekuéra nde rejerurégui.

21Añetehápe, Che rekovére, ha che reko jajaipa rehe omyenyhẽ háicha ko yvy,

22mayma ohechava’ekue guive che reko jajaipa ha che milagrokuéra ajapova’ekue Egíptope ha ko desiértope,

23ndohechamo’ãi pe yvy Che aprometeva’ekue ituvakuérape; chepy’ara’ã vaíguima 10 jevy (véces).

24Che rembiguái Calébpe katu oĩgui ipype ambue pytu, ha’e iñe’ẽrendu porãgui, Che amoingéta ichupe pe yvy ha’e oike haguépe, ha iñemoñarenguéra oguerekóta pe yvy imba’eteéva ramo,

25ko’ág̃a katu oiko gueteri upépe Amalecgua ha Canaangua umi cerrokuéra pa’ũme. Pejere jevy ko’ẽrõ ha pesẽ desiérto gotýo, pe Yguasu Pytã rape rehe.

26Ha Ñanderuete oñe’ẽ Moises ha Aarónpe, ha he’i:

27Araka’e pevépa ahendúne ko tetã ñaña oñe’ẽvaíva cherehe, ahendupa voi iñe’ẽvai he’imava’ekue cherehe.

28Upévare ere ichupekuéra: Che rekove rehe, he’i Jahve, pende Ruete, ha’ekuéra oñe’ẽ haguéicha chéve, upeichaite Che ajapóta avei hesekuéra.

29Opaite oñemoĩva cherehe ko desiértope omanóta avei ko desiértope, oimeraẽ oñe’ẽvaíva guive cherehe ha ombotýmava guive 20 áño oñeñotỹta ko desiérto kóvape.

30Ha’ekuéra añetehápe ndoikemo’ãi Canaan yvýpe, Che amopu’ã ramojepe che po ame’ẽvo che ñe’ẽ omoingetaha ipype; Caleb, Jefone ra’y, ha Josue, Nun ra’y katu oikeva’erã ipype.

31Ha pende ra’y michĩva, pejeva’ekue hesekuéra ho’apataha ambue tetã poguýpe, umíante amoingéta ha ha’ekuéra ohecháta Canaan yvy, peẽ ndape’apóigui mba’eve ramo.

32Pende retekue katu oñeñotỹta ko desiérto kóvape.

33Ha pende ra’ykuéra oikóta ovecha ñangarekohára ramo 40 áño pukukue ko desiérto rupi, ha’ekuéra ogueraháta ijehekuéra pene angaipa, pende retekuéra ikusuguepa peve ko desiértope.

34 Cuarénta ára pene mañahára ohova’ekue Canaan retãme, upévagui 40 áño pukukue pende ra’ykuéra oha’ãrõta oike hag̃ua Canaan retãme, peẽ peñandu hag̃ua pende retépe Che añemomombyry hague pendehegui.

35Che Jahve, pende Ruete, ame’ẽma che ñe’ẽ ha péicha ajapotaha ko tetã ñaña rehe oñemoĩ haguére cherehe; ko desiértope omanombáta ha ikusuguepáta.

Umi 10 mañahára ñaña omano

36Ha umi 10 mañahára ohova’ekue omaña hag̃ua Canaan yvýre ha ojevývo omoñe’ẽngururu Israelguakuérape ha oñemoĩ Ñanderuete rehe, ha oñe’ẽvai avei Canaan yvýre,

37umi 10 kuimba’e oñe’ẽvaiva’ekue Canaan yvy rehe, omanomba sapy’aitépe Ñanderuete renondépe.

38Josue, Nun ra’y, ha Caleb, Jefone ra’y katu nomanói, ojerovia porã haguére pende Ruete pu’aka rehe.

Hormápe ojejapo sarambi Israel ñemoñarenguéra rehe

39Ha Moises he’i ko’ã mba’e mayma Israel ñemoñarenguérape ha umi tetãygua ombyasyeterei.

40Ha opu’ã hikuái ambue pyhareve ha ojupi pe cérro ru’ãme, ha he’i hikuái: Ápe roime roho hag̃uáicha Canaan retãme Ñanderuete he’i haguéicha; ore roñemoangaipáma.

41Ha Moises he’i ichupekuéra: Mba’upépa pepyrũ Ñanderuete ñe’ẽ rehe. Ko’ã mba’e nosẽ porãmo’ãi peẽme.

42Ani pehótei, Ñanderuete noĩvéimagui pene mbytépe, ani hag̃ua pe’átei pende rayhu’ỹva poguýpe.

43Umi Amalecgua ha Canaangua oĩ pene renonderãme, ha pe’áta ikyse puku rãimbépe; peẽ napeneñe’ẽrenduséi haguére Ñanderuetépe, upévagui Ñanderuete noĩmo’ãvéima penendive.

44Upeichavéramo jepe oñembopy’ahatã hikuái ha oho ojupi pe cérro ru’ãme; Ñanderuete karameg̃ua ha Moises katu opyta Israel rekohápe.

45Ha umi Amalecgua ha umi Canaangua oikóva umi cerrokuéra rupi ou ojeity hag̃ua Israelguakuéra ári ha sarambi ojapo ichuguikuéra, omuñávo ichupekuéra Horma peve.