Salmokuéra 38 - Biblia en Guaraní - ?anderuete ?e’? Por? 2015

David ojerure Ñanderuetépe Ha’e omopotĩ hag̃ua ichupe hembiapo vaígui

1Nde, che Ruete, ani cheja’o térã chehavira ndepochy jave.

2Nde hu’ykuéra chekutupa, ha nde po pohýi chehaviráva oĩhína cheári.

3Che ro’o hasypa ndepochýgui chendive ha che kanguekuéra nahesãivéima che rembiapo vai rupi.

4Che rembiapo vai ho’apa che akã ári, ipohyieterei chéve, ndachepu’akavéima.

5Inembáma ha opupa che aikuéra, chetavy haguére.

6Che añemomirĩ ha aiko tĩndyhápe, chetavýgui aikomíntema ha añembyasy aikóvo.

7Che rete iñakãnundupa, ha ndaipóri mba’eve hesãiva che ro’o rehe.

8Chekangypa ha chekane’õite, chepyahẽ asy che py’apy guive.

9Nde che Ruete, reikuaapa che aipotáva guive ha che pyahẽ nokañymo’ãi nde rovakégui.

10Operere ningo che py’a ha che mbaretekue ojeíma chehegui, ha che resakuéra jepeve iñypytũmbáma.

11Che amigokuéra ha che irũnguéra jepeve oñemomombyrypa che ahasa asy jave, che rogayguakuéra jepeve ojeíma chehegui.

12Umi chejukaséva ombosako’íma ñuhã chéve g̃uarã, ha umi oipotáva ojehu chéve mba’evai, oiko oñe’ẽvai cherehe, ára pukukuépe oñeha’ãmba chembotavy hag̃ua.

13Che katu nahendúi, ku ijapysapévaicha ha iñe’ẽngúvaicha aiko, nañe’ẽvéi ichupekuéra.

14Aiko ku kuimba’e ohendu’ỹvaicha, ijuru ikatu’ỹva ombohovái avavépe.

15Che aha’ãrõ, Nde, che Ruete, chepytyvõ hag̃ua, ha embohovái ichupekuéra (che rendaguépe).

16Che py’apýpe ha’e: Anítei ovy’a hikuái chepysyry ramo, anítei opuka hikuái cherehe.

17Ha che katu aime ha’a hag̃uáicha, ha che mba’asy opaite árape oĩ che retepýpe.

18Upévagui amombe’uva’erã che rembiapo vai, ha añembyasy ajapo vai haguére.

19Umi cherehe ija’e’ỹva imbarete joa hikuái, ha umi cherayhu’ỹva reiete oñemboheta hetave ohóvo.

20Ha umi omyengoviáva chéve mba’evai mba’eporã rehe, umía voi chemuña, che aikógui mba’eporã rapykuéri.

21Anína chereja rei, Nde, che Ruete, che Jaratee, anína reñemomombyry chehegui.

22Nde pya’emína eju chepytyvõ hag̃ua, che Jára, Nde ningo che Salvador.