Ezequiel 3 - Biblia en Guaraní - ?anderuete ?e’? Por? 2015

1Ha Ñanderuete he’i chéve: Kuimba’e ra’y, he’u pe mba’e rejohúva; he’u ko kuatiañe’ẽ jokuapy, ha tereho eñe’ẽ Israelguakuérape.

2Ha ajejurupe’a, ha Ha’e ho’uka chéve pe kuatiañe’ẽ jokuapy.

3Ha he’i chéve: Kuimba’e ra’y, emokõ ko kuatiañe’ẽ jokuapy ha kóvagui emyenyhẽ nde py’a. Ha ha’u rire, eíraicha he’ẽ asy chéve g̃uarã.

4Ha upéi he’i chéve: Kuimba’e ra’y, tereho Israelguakuéra rendápe, ha ere ichupekuéra che ñe’ẽ.

5Nereñemondói peteĩ tetã iñe’ẽ iñypytũ ha hasyetereívape, reñemondo katu Israelguakuéra rendápe.

6Ha noromondói tetã iñe’ẽ reikua’ỹvape, romondo rire umía rendápe, ha’ekuéra nerenduva’erãmo’ã.

7Israelguakuéra katu nanerenduséi, nacherenduséi haguéicha avei; mayma Israelgua ningo iñakã hatã ha ipy’ahatã voi.

8Eikuaa porãke, Che amohatãma nde rova hovakuéra renondépe, ha nde py’a, ipy’a renondepekuéra.

9Che romohatãta diamánteicha (ita vera hatãitereíva), hatãvéva ambue itágui, upévare ani rekyhyje ichuguikuéra, ha ani rekyhyje henondepekuéra, ha’ekuéra voi ningo peteĩ tetã oñemoĩva cherehe.

10Ha Ñanderuete he’ive chéve: Kuimba’e ra’y, emoĩ nde py’apýpe opaite mba’e Che ha’étava guive ndéve, ha nde apysakuéra tacherendu porã.

11Ha tereho ha eike umi ojeguerahava’ekue jepokuapýpe, ne retãygua ra’ykuéra apytépe, ha eñe’ẽ ichupekuéra ha ere: Péicha he’i, Yvága Atykuéra Jára, pende Ruete: Pejapysakátapa térã ndapejapysakamo’ãi.

12Ha upérõ pe Pytu Porãmbáva chemopu’ã, ha ahendu che rapykue gotýo peteĩ ñe’ẽpu hyapuguasu he’íva: Ñanderuete reko jajaipa toñemomba’eguasu henda guive.

13Ha ahendu avei umi tekove pepokuéra ryapu ojáva jepi ojuehe, ha umi ruéda ryapu henondepekuéra, ha avei mba’e ryapu ndetuicháva.

14Ha pe Pytu Porãmbáva chemopu’ã ha chereraha; ha aha chepy’a ñembyasypópe, ha che ajepy’apy jave che angapýpe, Ñanderuete po katu oĩ hatã cheári.

15Ha péicha ag̃uahẽ umi ojeguerahava’ekue rendápe, Tel-abíbpe, oĩva pe ysyry Quebar rembe’ýpe, ha aguapy ha’ekuéra oguapyhápe, upépe apyta ijapytepekuéra py’andyipópe, 7 ára pukukue.

Ñanderuete ohenói Ezequiélpe oñangareko hag̃ua Israelguakuéra rehe

16Ha ohasa rire 7 ára Ñanderuete ñe’ẽ ou chéve ha he’i:

17Kuimba’e ra’y, Che romoĩma reñangareko hag̃ua Israel rogayguakuéra rehe ha opaite ñe’ẽ rehendúva guive che jurúgui, nde reñemoñe’ẽta ichupekuéra che rérape.

18Ág̃a Che ha’e ramo peteĩ heko ñañávape omanotaha, ha nde nerembohasái ramo che ñe’ẽ ichupe, opoi hag̃ua hembiapo vaígui ha oikove hag̃ua, ha’e omanóta hembiapo vai rupi, ndehegui katu ajeruréta huguykue reavisa’ỹ haguére ichupe.

19Ha nde reavisa ramo pe tekove ñañávape ha upeichavérõ ha’e ndopoíri hembiapo ha hape vaígui, ha’e omanóta heko vai rupi, nde katu resalváta ne ánga.

20Ha peteĩ heko potĩva oñemboyke ramo heko potĩ rekógui ojapo hag̃ua ivaíva, ha Che amoñepysãnga ramo ichupe omano hag̃ua ha nde nereavisáiri ramo ichupe, hembiapo vai rehe ha’e omanova’erã; hembiapo porã ojapomava’ekue rehe ndaiporimo’ãvéi mandu’a; huguykue katu ajeruréta nde pógui.

21Ha nde reavisa ramo pe heko potĩva’ekuépe ani hag̃ua oñemohembiapo vaive ohóvo ha ha’e nerendu ramo añetehápe ha’e oikovéta, reavisa haguére ichupe; ha nde resalváta ne ánga.

Pe proféta

iñe’ẽngúva

22Upéi ou cheári Ñanderuete ñe’ẽ, ha he’i chéve: Epu’ã ha esẽ pe ñúme, ha upépe añe’ẽta nendive.

23Ha apu’ã ha asẽ ñúme, ha péina upépe oĩhína Ñanderuete reko jajaipáva, ku ahecha haguéicha pe ysyry Quebar rembe’ýpe, ha ha’a che rova yvýre.

24Ha pe Pytu Porãmbáva oike chepype ha chemoñembo’y, ha oñe’ẽ chéve he’ívo: Eike ha eñemboty nde rógape.

25Ha nde, kuimba’e ra’y, péina ápe ojeitýta ndeári, ha neñapytĩta hikuái sã reheve, neresẽmo’ãvéi hag̃uáicha ijapyteguikuéra.

26Ha amboja hatãta ne kũ ne apekũ rehe, neñe’ẽngu hag̃ua, ha ndereikomo’ãvéima ichupekuéra g̃uarã kuimba’e oporoavisáva ramo, ha’ekuéra voi peteĩ tetã oñemoĩva cherehe.

27Ág̃a, Che añe’ẽ vove ndéve, rejejurupe’áta ha eréta ichupekuéra: Péicha he’i Yvága Atykuéra Jára, pende Ruete: Upe ohenduséva, tohendu; ha upe ohenduse’ỹva, tohendu’ỹ; ha’ekuéra voi peteĩ tetã oñemoĩséva cherehe.