Éxodo 38 - Biblia en Guaraní - ?anderuete ?e’? Por? 2015

1Upéicha ojapo hikuái avei pe kuave’ẽmby renda jehapypáva acácia yvyrágui, ipukukue 2,18 métro, ipekue avei 2,18 métro ha ijyvatekue 1,31 métro.

2Ha ojapo hatĩnguéra irundyve hakuahápe (esquínape), ha umía peteĩ hete rehe, ha oñu’ã bróncegui.

3Ojapopa hikuái kuave’ẽmby renda rembiporukuéra: Japepo (ólla), pála, ña’ẽmbe, ty’ãinguéra (gáncho) ha tanimbu mbyatyha; opaite tembiporukuéra ojejapo bróncegui.

4Ojapo avei pe kuave’ẽmby rendápe g̃uarã peteĩ parrílla bróncegui ipa’ũmimíva ha omoĩ pe kuave’ẽmby renda ryepýpe iku’a mbyte rupi.

5Omboyku avei irundy argólla pe parríllape g̃uarã bróncegui irundyve hakuahápe (esquínape) g̃uarã, umía rupi oñemoinge hag̃ua hi’yvakuéra.

6Hi’ýva ojejapo yvyra acáciagui ha ojejaho’i bróncepe.

7Hi’ýva oñemoinge umi argólla kuápe, oĩva pe kuave’ẽmby renda yke mokõivépe, ojegueraha hag̃ua; pe kuave’ẽmby renda ojejapo táblagui ha hyepýpe inandi (ikua).

8Ojapo avei peteĩ tacho broncegui; kóva ojejapo kuña espéjogui, umia omba’apóva pe óga jojohuha rokẽme.

Pe óga jojohuha korapy

9Upéi ojapo hikuái pe korapy; sur gotýo umi aosãingo líno inimbo jepokapyrégui ipuku 43,75 métro.

10Ha’ekuéra omosãingo umíva 20 póste rehe ha umíva omboguapy hikuái 20 pyenda ári; iclávo ha ijargólla ojapo óro morotĩgui.

11Ha yvate gotýo umi aosãingo ipuku 43,75 métro, ha omosãingo 20 póste rehe, ha umía omboguapy 20 pyenda ári; iclávo ha ijargólla ojejapo óro morotĩgui.

12Kuarahyreike gotyogua, umi aosãingo ipuku 21,87 métro ha omosãingo 10 póste rehe ha umíva omboguapy 10 pyenda ári, umi clávo ha ijargólla ojejapo óro morotĩgui.

13Kuarahyresẽ gotyogua aosãingo ipuku avei 21,87 métro.

14Peteĩ yke gotýo, ojeikehápe, pe aosãingo ipuku 6,56 métro, mbohapy ipóste reheve ha mbohapyve ipyendakuéra reheve;

15ambue yke gotýo, pe aosãingo ipuku avei 6,56 métro, mbohapyve ipóste reheve ha mbohapyve ipyendakuéra reheve.

16Opaite umi aosãingo pe korapyjere rehegua ojejapo líno inimbo jepokapyrégui.

17Umi póste pyenda ojejapo bróncegui; iclávo ha ijargólla ojejapo óro morotĩgui; péicha avei umi póste akã ojejaho’i óro morotĩme, opaite póste argólla ojejapo avei óro morotĩgui.

18Pe korapy ojeikehápe oĩ aosãingo ikatupyrýva rembiapokue; aorã (páño) hovýva, pytãva, pytãũva ha líno inimbógui ojejapova’ekue; ipuku 8,75 métro ha ipekue ha ijyvatekue peteĩcha, 2,18 métro; peichaite avei umi aosãingo korapy pegua.

19Oĩ irundy póste, ha irundy ipyenda bróncegui, iclávo, ijargólla ha póste akã jeguaka ojejapo óro morotĩgui.

20Opaite umi póste’i pe óga jojohuha korapy jerekue rehegua ojejapo bróncegui.

Tembiapo repy

21Kóva ningo pe óga jojohuha rembiapo repy. Moises ohejava’ekue Itamárpe ha’e omyakã hag̃ua; ha’e Aaron ra’y, Levi tríbugui.

22Ha Bezaleel, Uri ra’y, Hur ra’yre, Juda tríbugui, ojapo opaite mba’e Ñanderuete he’iva’ekue guive Moiséspe.

23Ha hendive oĩ Aholiab, Ahisamac ra’y, Dan tríbugui omba’apokuaáva ita rehe ha ojapokuaáva aorã hovýva, pytãva, pytãũva, líno inimbógui ha ombojeguakuaáva avei umía.

24Opaite óro ojeporu pe tembiapoguasúpe, Israelguakuéra ome’ẽva’ekue oñemopu’ã hag̃ua pe óga jojohuha ohupity 980 kílo.

25Ha pe pláta (óro morotĩ) Israelguakuéra ogueruva’ekue ohupity 3.371 kílo.

26 Médio síclo (5,585 grámo), pe óga jojohuha pegua sícloicha, peteĩteĩ kuimba’e Israel pegua ome’ẽva’erã; ha umi kuimba’e ome’ẽva’ekue ime’ẽmby ombotýva guive 20 áño, ohupity 603.550.

27Ojeporu 3.350 kílo óro morotĩ omboyku hag̃ua pe óga jojohuha pyenda ha ikorapy pyenda; 100 pyendápe g̃uarã ojeporu 3350 kílo, 33,50 kílo peteĩ pyendápe g̃uarã.

28Ha umi 21 kílo óro morotĩ hembýva ojeporu umi horcon akã jeguaka, ijargólla ha iclávope g̃uarã.

29Pe brónce oñeme’ẽva’ekue ohupity 2.371,8 kílo.

30Umívagui ojejapo pe óga jojohuha rokẽ pyenda, pe kuave’ẽmby renda parrílla, opaite tembiporu kuave’ẽmby rendápe g̃uarã,

31umi pyenda oĩva korapy jerekuévo, umi korapy rokẽ pyenda, opaite umi póste’i óga pegua ha opaite umi póste’i korapyjere peguáva.