Juéces 20 - Biblia en Guaraní - ?anderuete ?e’? Por? 2015

Pe ñorãirõ Benjamingua ndive

1Upémaramo opaite Israel ñemoñarenguéra oñembyaty Ñanderuete renondepe Mizpápe, peteĩ kuimba’e añoitécha, Dan guive Beerséba peve, ha Galaad retã guive.

2Ha opaite Israel tríbu ruvicha oĩmbaite Ñanderuete retãygua oñembyatyhápe, 400.000 kuimba’e yvy rupigua, ohekyikuaáva kyse puku.

3Ha umi Benjamin ñemoñarenguéra ohendu Israel ñemoñarenguéra ou hague Mizpápe. Ha oporandu hikuái pe Leviguápe: Ere mba’éichapa oiko ra’e ko ñaña reko.

4Upémaramo pe kuimba’e Levigua, ikuña omanova’ekue, he’i ichupekuéra: Che ag̃uahẽ Gibea, Benjamin távape, che rembireko ndive, upépe rohasa hag̃ua pe pyhare.

5Ha umi Gibeaygua opu’ã cherehe, omongora pe óga pyhare chejukaségui hikuái, che rembireko rehe katu oñembosarái vaipa omano meve.

6Upémaramo ajapyhy che kuña retekue aipehẽ’a hẽ’a, ha aguerahauka mayma Israel retãpy rehe, ojapógui hikuái ñaña reko ha jejuka rei Israélpe.

7Péina ápe peẽ mayma Israel ñemoñarenguéra, peje ko’ápe pene remiandu ha mba’épa iporã ojejapova’erã.

8Upévo mayma tetãygua, peteĩ kuimba’eichaite, opu’ã ha he’i hikuái: Avave ñande reheguáva ndohomo’ãi hóga rymba pirekueguiguápe, ñande apytépe avave ndojevymo’ãi hógape.

9Kóa jajapo Gibea rehe: Jaiporavo po’a jeporavo rupi Israel tribukuéragui:

10Meme 100 kuimba’e oñembyatývagui pemboyke 10, ha meme 1000 kuimba’e oñembyatývagui pemboyke 100, ha meme 10.000 kuimba’e oñembyatývagui pemboyke 1000 kuimba’e ogueraha hag̃ua pe tembi’u umi ohótava Gibea, Benjamin távape, omyengovia hag̃ua hembiapo vai ojejapova’ekue rehe Israel retãme.

11Ha oñembyaty mayma kuimba’ekuéra Israelgua ojeity hag̃ua pe táva péva ári, peteĩ kuimba’éicha oĩmbágui oñoñe’ẽme.

12Ha Israel tribukuéra omondo ñe’ẽ rerahahára opaite Benjamin tríbupe, ha he’iuka: Mba’eichagua ñaña rekópa ojejapova’ekue pende apytépe.

13Pemoĩ ore pópe umi kuimba’e ñaña oikóva Gibeápe, rojuka hag̃ua ichupekuéra, ha toroipe’a mba’evai Israelpýgui. Ha umi Benjamingua katu ndojaposéi umi ambue Israel ñemoñarenguéra oipotáva,

14opaite Benjamin ñemoñarenguéra oñembyaty uvei pe táva Gibeápe, oñorãirõ hag̃ua ambue Israel ñemoñarenguéra ndive.

15Ha ojepapávo umi Benjamingua oúva itávagui ojejohu 26.000 kuimba’e ohekyikuaáva kyse puku, ojepapa’ỹre umi Gibeaygua, upépe oĩve ambue 700 soldádo ikatupyrýva.

16Ha umi Benjamingua apytégui oĩ 700 kuimba’e poravopyre, ijasúva ha ikatúva ojapi peteĩ akãrague jepe peteĩ itápe ijita mombohápe (hondápe), ha ndojavýiri.

17Ha ojepapa avei ambue Israel tríbu kuimba’ekuérape ha ojejohu 400.000 kuimba’e ohekýi porãkuaáva kyse puku oñorãirõme.

18Upéi Israel ñemoñarenguéra opu’ã ha oho Ñanderuete rógape omba’eporandu hag̃ua Ñanderuetépe, he’ívo: Mávapa ohóta tenonde oñorãirõ hag̃ua Benjamin ñemoñarenguéra ndive. Ha Ñanderuete he’i: Juda ohóta tenondete.

19Ha opu’ã Israel ñemoñarenguéra pyhareve, ojeity hag̃ua Gibea ári.

20Ha Israel ñemoñarenguéra osẽ oho hag̃ua Gibeápe, ha og̃uahẽvo upépe oñemohenda porã Gibea ypýpe ojeity hag̃uáicha hi’ári.

21Ha Benjamin ñemoñarenguéra osẽ Gibeágui, ha pe árape ojuka 22.000 kuimba’e Israel ñemoñarenguéra apytégui.

22Ha oñemokyre’ỹ jevývo umi Israel ñemoñare, oñemohenda jevy oñorãirõ hag̃ua oñemohenda haguépe pe ára peteĩháme.

23Oñorãirõ mboyve Israel ñemoñarenguéra katu ojupi Betélpe ha jahe’opópe, omba’eporandu Ñanderuetépe, he’ívo: Roñorãirõ jevýtapa ore pehẽnguekuéra Benjamin ñemoñarenguéra ndive. Ha Ñanderuete he’i ichupekuéra: Tapeho.

24Upéicha rupi Israel ñemoñarenguéra oho jevy Benjamin ñemoñarenguérape pe ára mokõiháme.

25Ha pe ára mokõiháme Benjamingua osẽ jevy Gibeágui, ha ojuka ambue 18.000 Israel ñemoñarenguérape, opaite kuimba’e ohekýi porãkuaáva ikyse puku.

26Upémaramo opaite Israel ñemoñarenguéra ou Ñanderuete rógape, ha jahe’opópe ohasa okaru’ỹre pe ára iñypytũ meve; ha oikuave’ẽ kuave’ẽmby ojehapypáva ha kuave’ẽmby py’aguapy reheguáva Ñanderuetépe g̃uarã.

27Ha umi Israel ñemoñare omba’eporandu Ñanderuetépe (ikarameg̃ua oĩ umi árape avei Mizpápe).

28Ha Finees, Eleazar ra’y, Aaron ra’y omba’apo henondépe umi árape, ha he’i hikuái: Rosẽ jevýtapa rojeity hag̃ua ore pehẽnguekuéra ári, Benjamin ñemoñarenguéra ári, térãpa ndorohomo’ãvéi. Ha Ñanderuete he’i: Tapeho, ko’ẽ ramo Che amoĩta ichupekuéra pende pópe.

29Ha Israel omoĩ ñuhã Gibea jerekue rehe.

30Ha pe mbohapyha árape Israel ñemoñarenguéra oho jevy ojeity hag̃ua Benjamin ñemoñarenguéra ári, ha oñemoĩ hikuái Gibea renondépe jepiguáicha.

31Ha umi Benjamin ñemoñarenguéra osẽ ipehẽnguekuéra rendápe, ha oñemomombyry hikuái itávagui; ha oñepyrũ ojuka mimi hikuái ichupekuéra pe tape juasa rehe, ohóva Betélpe ha ambue tape Gibea ñúme; ha ojuka hikuái Israélgui oiméne 30 kuimba’épe.

32Ha umi Benjamin ñemoñarenguéra he’i joa hikuái: Ho’a jevýta hikuái ñane renondépe jepiguáicha. Ha Israel ñemoñarenguéra katu he’i: Ñakañy gua’u ichuguikuéra ha ñañemomombyry itávagui umi tape rehe.

33Upévo opu’ãmba mayma Israelgua hendaguikuéra, ha oñemohenda oñorãirõ hag̃uáicha Baal-tamárpe; ha umi ambue Israelgua oñemohendava’ekue ñuhã ramo osẽ joa avei hendágui, Gibea ñuguasúgui.

34Ha ou Gibea ári 10.000 kuimba’e ojeporavopyréva mayma Israelgua apytégui, ha ijetu’utu’uve ohóvo pe ñorãirõ; Benjaminguakuéra ndoikuaái katu oñehunditaha.

35Ha Ñanderuete sarambi ojapo Benjamin rehe Israelguakuéra renondépe; ha umi Israel ñemoñare ojuka pe árape 25.100 Benjaminguápe, ohekýi porãkuaáva ikyse puku.

36Ha Benjamin ñemoñarenguéra ohechakuaáma ramo sarambi oikoha hesekuéra, Israel ñemoñarenguéra okañy gua’únte Benjaminguakuéragui, ojeroviágui hikuái pe ñuhã omoĩva’ekue rehe Gibea kupépe.

37Ha umi kuimba’e oñemoĩva’ekue ñuhã ramo pya’e ojeity Gibea ári, ha oike ha ojukapa kyse puku hãimbépe ojohúva guive Gibea ryepýpe.

38Umi Israelgua opytáva ñuhã ramo oñemoĩ peteĩ ñe’ẽme iñirũnguéra ndive omyatatĩtaha Gibea rehe, ipu’aka vove pe táva rehe.

39Ha umi Israelgua okañy gua’u ohóvo pe ñorãirõhágui upévagui Benjaminguakuéra ojuka jevy Israel atyguasúgui oiméne 30 kuimba’épe ha he’i hikuái: Añetehápe ho’a jevýta hikuái ñane renondépe, ho’a haguéicha mokõi jevýma.

40Ha pe tatatĩ araícha opu’ã Gibeágui, Benjaminguakuéra ojere oma’ẽ hapykue gotýo; ha péina ápe itávagui pe tatatĩ opu’ãma yvate ára rehe.

41Upévo Israel atyguasu ojere ha Benjaminguakuéra okyhyjeiterei, ohechágui oñehundipataha.

42Ha Benjaminguakuéra okañy ambue Israel ñemoñarenguéra renonderãme desiérto rape rehe; ha Gibeágui osẽ avei umi Israelgua opytava’ekue ñuhã ramo ha mbaretépe ondyry umi Benjamingua okañýva rehe.

43Péicha Benjaminguakuéra opyta mokõi Israelgua aty pa’ũme, oñemongorapa peve, ha omuña avei umi okañykuaava’ekuépe Menuha peve, opytáva Gibea rovái.

44Ha Benjamíngui ho’a 18.000 kuimba’e, mayma kuimba’e ikatupyrýva ñorãirõme.

45Upégui ojere ha okañy hikuái desiérto gotýo, pe Rimon itaguasu gotýo ha tape rehe ojejukave ichuguikuéra 5.000 kuimba’épe; ha omuña ichupekuéra Gidom peve, ha ojukave ichuguikuéra ambue 2.000 kuimba’épe.

46Opaite Benjamingua omanomava’ekue pe ára pévape oĩ 25.000 kuimba’e ohekýi porãkuaáva ikyse puku, ha’ekuéra kuimba’e ikatupyrýva ñorãirõ rembiapópe.

47Ha 600 Benjamingua okañykuaa Rimon itaguasu rendápe ha upépe oiko 4 jasy pukukue.

48Ha umi ambue Israelgua oñembojere ojuka hag̃ua opaite Benjamingua hembývape itavakuéra ha iñúme, ha upéi ohapy itavakuéra, ojukapaite avei hymbakuérape.