Salmokuéra 35 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ - David purahéi

1Che Ruete, eñemoĩ umi cherehe oñemoĩva rehe, endyry umi chejukaséva rehe.

2Emonde nde rete mo’ãha michĩ ha tuicháva, ha epu’ãmína chepytyvõ hag̃ua.

3Ehekýi nde yvyra akua puku, ejoko umi chemuñávape, ha ere che ángape: Che ningo ne pytyvõharaguasu.

4Toñemotĩ ha tojeja’o umi chejukaséva, toguevi ha toñemotĩmba umi oñeha’ãmbáva ojapo vai hag̃ua cherehe.

5Toiko hikuái ku yvyra rogue pirukuéicha yvytu ogueraháva hendive, ha yvága rembiguái tombotyryry ichupekuéra.

6Hapekuéra ta’iñypytũ ha ta’isỹi, ha pe yvága rembiguái tomuña ichupekuéra.

7Reiete ha’ekuéra omoĩra’e iñuhã chéve g̃uarã, reiete ojo’o hikuái yvykua che ángape g̃uarã.

8Oikuaa’ỹre tou ichupekuéra angekõi ndetuicháva, ha umi iñuhã ombosako’iva’ekue chéve g̃uarã, ha’ekuéra voi to’a ipype angekõi ndetuicháva reheve.

9Upéicharamo che avy’aite Ñanderuete ndive, chepytyvõ porã haguére.

10Mayma che kanguekuéra he’iva’erã: Mávape piko ojogua che Ruetépe. Nde reipytyvõ ikangývape, ani pe imbaretevéva ipu’aka hese, ha Nde reguenohẽ pe imboriahúva pe mondaha pógui.

11Opu’ã cherehe umi techahare iñañáva ha oporandu chéve hikuái umi mba’e aikuaa’ỹva rehe.

12Che mba’eporã omyengovia hikuái mba’evaípe, oipy’apy asy hag̃ua che ángape.

13Che katu, hasyete jave hikuái, añemonde ao vosápe, che ajopy che ánga akaru’ỹre, ha che py’apýpe añembo’e jevy jey hesehápe,

14ku che irũ rehe ramoguáicha, ha che ryvy rehe ramoguáicha aikova’ekue tĩndyhápe, ku ta’ýra isy omano ramoguáicha che añembyasy.

15Ha upéi ha’ekuéra hory joa che ahasa asy jave, ha opuka joa hikuái, upéi oñembyaty hikuái che aikuaa’ỹre ha oñemoĩ cherehe chenupã hag̃ua opytu’u’ỹre.

16Umi oporombojuru he’ẽva oñemohyg̃uatã hag̃uánte oñembohoryete cherehe.

17Nde, che Ruete, araka’e pevépa rema’ẽtante ko’ã mba’ére. Eguenohẽmína che rekove ijapúvagui ha leõ jurúgui.

18Upéicharamo romomba’eguasúta heko potĩva atyguasúpe ha romboetéta tetãyguakuéra apytépe.

19Oñembohory rei umi cherehe ija’e’ỹva ha cherayhu’ỹva reiete oñembyesa’i cherehe.

20Umía noñe’ẽi ombopy’aguapy hag̃ua, ha’ekuéra oñeha’ãmbaite katu ombotavy hag̃ua umi oñemomirĩvape.

21Iñe’ẽguasu rei cherehe hikuái, ha he’i chéve: Nápye, nápye, ore resa ohechapáma rejapóva guive.

22Nde, che Ruete, rehechapáva, anína rekirirĩ, anína reñemomombyry chehegui.

23Epáy ha epu’ãmi chemoĩ porã jevy hag̃ua, Nde, che Ruete ha che Jaratee, chepytyvõmína aiko hag̃ua hekoitépe.

24Che Ruete chembojovake nde justícia rehe anive hag̃ua oñembohory hikuái cherehe.

25Anítei he’i hikuái ipy’apýpe: Ore rojapóma hese upe rojaposeva’ekue.

26Toñemotĩ umi ovy’áva ojehu haguére che rekovépe mba’evai, toñemotĩete umi oñembohorýva cherehe.

27Tovy’a ha tahory joa umi oipotáva asẽ porã jevy ha tapiaite te’i hikuái: Toñemomba’eguasu Ñanderuetépe, ohayhuetégui hembiguáipe oiko hag̃ua py’aguapýpe.

28Ha che juru toñe’ẽ tapia g̃uarã nde rembojovakeha hekoitépe ha toromomba’eguasu opaite árape.