Job 10 - Biblia en Guaraní - ?anderuete ?e’? Por? 2015

Job oñembyasyete ohasa asýgui

1Chekuerái che rekovégui, tove katu tachepyahẽ sãso añe’ẽ hag̃ua che py’aro oĩ haichaite che py’apýpe.

2Ha’ese Ñanderuetépe: Ani chehundítei, emyesakãmína chéve mba’érehepa ndepochy chendive.

3Hi’ã porã piko ndéve reporojopy ha remboyke hag̃ua nde po rembiapokuégui, reipytyvõ hag̃ua heko vaívape.

4Nde resa piko yvyariguáicha, térãpa rehecha ha’ekuéra ohecha háicha.

5Nde rekove piko imbyky avei yvyarigua áraicha térãpa ne añokuéra ojogua kuimba’e árape,

6ejesareko hag̃ua che reko vai rehe ha reheka hag̃ua che rembiapo vai.

7Reikuaa porã voi ndachereko ky’aiha ha ndaiporiha mba’eve ikatúva chepe’a nde pógui.

8Che Ruete, Nde po voi ningo cheapo ha chemboheteva’ekue, ha mba’éicha piko ko’ág̃a rejeréta chehundi hag̃ua.

9Nemandu’amína ñay’ũgui Nde cheapo hague, ha rejapose jevy piko chehegui yvy timbo.

10Nacheguenohẽipa ra’e kambýicha, ha kesúicha chembohypy’a.

11Chemonde pire ha to’ópe, ha rembojoapy che kangue tajyguekuérape.

12Tekove ha poriahuvereko reme’ẽ chéve, ha reñangareko cherehe che pytuhẽkuaa hag̃ua.

13Nde katu reñongatu ñemiháme nde py’apýpe ko pensamiénto kóva, che voi aikuaa porã peichaha.

14Añemohembiapo vai rire, nde rema’ẽvaiva’erãmo’ã cherehe ha ndacheguerekoiva’erãmo’ã heko potĩva ramo.

15Che rembiapo vai ramo, añehundíta. Ha che reko potĩ ramojepe nañakãrapu’ãmo’ãi, ñemotĩ ha jehasa asy omyenyhẽgui che rekove.

16Ha añemyakãrapu’ã jevy ramo ku leõicha Nde chemuña jevýta ha rehechaukáta chéve ne rembiapo techapyrãva (milágro).

17Nde voi regueru jevýta umi cherehe oñe’ẽvaívape ha remboheta hetavéta che jehasa asy, ku soldádo atýicha oñemoĩta cherehe hikuái.

18Ma’erãiko cherenohẽra’e che sy ryégui, amanonteva’erãmo’ã avave cherecha mboyve,

19ku araka’eve oikove’ỹvaicha, ha che retekue che sy ryégui ojeguerahava’erãmo’ã che tyvýpe.

20Mbyky ningo che rekove arakuéra, upévagui epoimína chehegui avy’ami jevy hag̃ua,

21che aha mboyve pe tetã iñypytũháme, ha omanóva retãgui ndajumo’ãvéi,

22pe tetã iñypytũ tapiaite ku pyhare pytéicha, ñemondýi oñemyasãi, ha hesape ojogua ypytũ anambusúpe.