Provérbios 22 - Biblia en Guaraní - ?anderuete ?e’? Por? 2015

1Pe terakuã porã ojeguerohoryeteve pirapire hetágui, ita vera ha óro potĩgui.

2Pe ipirapire hetáva ha imboriahúva oñokotevẽ; mokõivévape Ñanderuete ojapova’ekue.

3Pe iñarandúva ohecha pe mba’evai ha okañy, umi iñarandu’ỹva katu ohasánte ohóvo pe mba’evai ohupity peve ichupe.

4Pe ñemomirĩ repyrã ha kyhyje Ñanderuetégui ogueru mba’erepy, terakuã porã ha tekove añeteguáva.

5Ñuatĩ ha ñuhã oĩ itie’ỹ ñañáva rapére, upe hi’ánga rehe oñangarekóva katu oñemomombyry ichuguikuéra.

6Embo’e pe mitãme haperã rehe, ha ituja rire jepeve ndopiaiva’erã ichugui.

7Pe ipirapire hetáva oñembojára pe mboriahu rehe; pe omba’eporúva ha oiporukáva oikóta tembiguái ramo.

8Upe oñemitỹva ñaña reko omono’õ jevyva’erã ñaña reko ha tukumbo rupi oñehundiva’erã.

9Pe tesa oporoporiahuverekóva ojehovasava’erã, ome’ẽgui hembi’úgui pe imboriahúvape.

10Emosẽ pe oñembohorývape, ha opáta pe jeja’o ha pe ñorãirõ avei.

11Ojehayhuhína ipy’a potĩvape, iñe’ẽ juky rupi oikóta tetã ruvicha angirũ (amígo) ramo.

12Ñanderuete resa oñangarekohína umi iñarandúva rape rehe ha ombyaíta iñañáva rembipota.

13Pe iñate’ỹva he’i: Pe leõ oime okápe, amanóne upérupi (nomba’aposéigui, ndohoséi kokuépe).

14Yvykua ndepypukúva hína pe kuña reko vai juru, upe ohayhu’ỹva Ñanderuetépe ho’ava’erã ipype.

15Pe výro reko ojoajúma voi mitãrusu py’apy rehe, pe yvyra po’i katu omomombyryva’erã ichugui.

16Upe ojopy asýva mboriahúpe ombohetave hag̃ua imba’e repy, térã upe ome’ẽva jopói imba’e hetávape, añetehápe (mokõivéva) imboriahuva’erã.

17Ejapysaka ha ehendu porã umi iñarandúva ñe’ẽ, ha ejepy’amongeta che rekombo’e rehe,

18ha iporãitereíta reñongatu ramo umía nde py’apýpe ha opytapa ramo ne akãme.

19Ejeroviáke Ñanderuete rehe, aikuaauka haguéicha ndéve ko ára kóvape.

20Añete ningo che ahaíra’e ndéve g̃uarã ñe’ẽ arandu, tekombo’e ha mbo’epy.

21Aikuaauka hag̃ua ndéve umi ñe’ẽ añeteguáva, ikatu hag̃uáicha reikuaauka ñe’ẽ añeteguáva umi ndejokuaiva’ekuépe oporandúvo ndéve.

22Aníke remondátei imboriahúvagui, imboriahu haguére, ha ani remyangekõi ichupe táva rokẽme, mbojovakehára renondépe.

23Ñanderuete oñorãirõta ha’ekuéra rehehápe ha ombyaíta imondahare rekove.

24Ani rejehe’átei umi ipochy rekóva ndive, ha ani reñemoirũtei umi tapicha ipochy reíva ndive.

25Ani hag̃ua rejepokuaátei heko rehe, ha ne ánga ho’a iñuhãme.

26Ani reme’ẽ rei nde réra ambuépe (ojoguase ramo peteĩ mba’e), cháke, reikéta iñuhãme, ha amo ipahápe nde repagava’erã icuénta.

27Ha nde nandepirapiréi ramo avei, ojepe’ava’erã katuete ndehegui nde rupa jepeve.

28Ani rembotuicha nde yvy rembe’y, eheja hendaitépe umi ita (mojon) omboja’óva nde yvy pehẽngue (lóte), nde ypykuéra omoĩ hagueichaite.

29Oimeraẽ kuimba’e ikatupyryetéva hembiapópe omba’apokuaa tetã ruvichápe g̃uarã, natekotevẽi omba’apo oimeraẽvape g̃uarã.