Salmokuéra 97 - Biblia en Guaraní - ?anderuete ?e’? Por? 2015

Ñanderuete ombopoguypáta ha oisãmbyhy jevýta ko yvy opavave ohecha hag̃ua

1Ñanderuete oisãmbyhyhína, upévagui ovy’aite ko yvy tuichakue, ha horyete umi yvyarigua oikóva umi islakuérape (yguasu mbytépe).

2Arai iñypytũva oĩ ijerekuévo, justícia ha ñembojovake heko peguáva ojokohína iguapyhaguasu.

3Tata ohóta henonderãme, ohundi hag̃ua hese ija’e’ỹvape.

4Hi’aravera ohesapepa árare, pe yvy ohecha ha oryryipa okyhyjégui.

5Umi cérro araitýicha hykupa Ñanderuete renondépe, ko yvy tuichakue Ijára renondépe.

6Umi yvága omombe’u ijustícia, ha mayma tetã ohecháta heko jajaipa.

7Totĩ umi omomba’eguasúva ta’ãngakuéra, ha oñembotuicháva ijára ra’ãnga rupi. Opaite jára ojeityva’erã Ñanderuete renondépe.

8Jerusalen ohendúta vy’apópe ko’ã mba’e ha Juda tavakuéra nemomba’eguasúta; Nde, ore Ruete, ipy’a rory joa hikuái Nde rembojovake haguére hekoitépe.

9Nde ningo, ore Ruete, Nde ha’e pe Jára Ijyvatevéva opaite yvy ape ári, reñemboyvateve mayma ambue jarakuéragui.

10Peẽ pehayhúva Ñanderuetépe, peñemboyke mba’evaígui, Ha’e oñangarekohína heko potĩva ánga rehe, ha oguenohẽ ichupekuéra iñañáva poguýgui.

11Tesape oñemyasãi heko potĩvape g̃uarã, ha vy’a umi ipy’a potĩvape g̃uarã.

12Pevy’a joáke, peẽ heko potĩva Ñanderuete ndive, ha pemomba’eguasu héra porãite.